નેપાળમાં ભયાનક પૂરઃ 105 ભારતીયો સહિત 384 લોકો ગુમ, કૈલાસ માનસરોવર યાત્રાળુઓની સુરક્ષા અંગે ચિંતા
તિબેટ તરફથી આવેલા અચાનક પૂરે રસુવા જિલ્લામાં મચાવી તબાહી, ટિમુરે અને સ્યાફ્રુબેસી વિસ્તારમાં ભારે નુકસાન
saurashtrabhoomi 
રસુવા તા.ર૬
નેપાળના રસુવા જિલ્લામાં બુધવારે તિબેટ તરફથી આવેલા અચાનક પૂરે ભારે તબાહી મચાવી છે. ભોટેકોશી નદીમાં અચાનક પાણીનો પ્રવાહ વધતા ટિમુરે, સ્યાફ્રુબેસી અને આસપાસના વિસ્તારોમાં અનેક મકાનો, રસ્તાઓ અને અન્ય માળખાઓને નુકસાન થયું છે. કેટલાક હાઇડ્રોપાવર પ્રોજેક્ટ પણ પૂરની ઝપેટમાં આવ્યા છે અને એક પ્રોજેક્ટ તણાઈ ગયો હોવાનું સામે આવ્યું છે.
આ દુર્ઘટનામાં અત્યાર સુધીમાં મૃત્યુઆંક અંગે અલગ-અલગ અહેવાલો સામે આવી રહ્યા છે અને બચાવ કામગીરી હજુ પણ ચાલુ છે. અધિકારીઓએ મોટી સંખ્યામાં લોકો ગુમ હોવાની માહિતી આપી છે. નેપાળ ટુરિઝમ બોર્ડની પ્રાથમિક યાદી પ્રમાણે 384 લોકોનો સંપર્ક થઈ શક્યો નથી, જેમાં 291 વિદેશી અને 93 નેપાળી નાગરિકો સામેલ છે. ગુમ થયેલા લોકોમાં 105 ભારતીય નાગરિકો પણ છે.
ખાસ ચિંતા કૈલાસ માનસરોવર યાત્રા માટે તિબેટ તરફ જઈ રહેલા યાત્રાળુઓને લઈને છે. અહેવાલો મુજબ મોટી સંખ્યામાં યાત્રાળુઓ બુધવારે રસુવા-રસુવાગઢી સરહદ પાર કરીને તિબેટ તરફ જવાના હતા, પરંતુ પૂરથી માર્ગ અને અન્ય માળખાને ભારે નુકસાન થતાં તેમનો સંપર્ક તૂટી ગયો છે.
પૂર કેવી રીતે આવ્યું તેને લઈને પણ તપાસ ચાલી રહી છે. પ્રાથમિક વૈજ્ઞાનિક આકલન મુજબ તિબેટ વિસ્તારમાં બરફ અને ખડકોનો ધસારો નદીના પ્રવાહને રોકી શકે છે, જેના કારણે પાણીનો જથ્થો એકઠો થયા બાદ અચાનક નીચેની તરફ ધસી આવ્યો હોવાની શક્યતા વ્યક્ત કરવામાં આવી છે. કેટલાક અહેવાલોમાં ભૂકંપને સંભવિત ટ્રિગર તરીકે પણ દર્શાવવામાં આવ્યો છે, પરંતુ પૂરનું ચોક્કસ કારણ હજુ સત્તાવાર રીતે નિશ્ચિત થયું નથી.
હાલ નેપાળની સેના, પોલીસ અને અન્ય સુરક્ષા એજન્સીઓ દ્વારા બચાવ અને રાહત કામગીરી હાથ ધરવામાં આવી છે. અસરગ્રસ્ત વિસ્તારોમાં ફસાયેલા લોકોને બહાર કાઢવા માટે હેલિકોપ્ટર અને ડ્રોનની મદદ પણ લેવામાં આવી રહી છે. ભારે નુકસાનને કારણે અનેક વિસ્તારોમાં પહોંચવું મુશ્કેલ બન્યું છે.
નેપાળ-તિબેટ સરહદ વિસ્તારમાં સર્જાયેલી આ કુદરતી આફતને કારણે કૈલાસ માનસરોવર યાત્રા પર ગયેલા ભારતીય યાત્રાળુઓના પરિવારજનોમાં પણ ચિંતા વધી છે. ગુમ થયેલા તમામ લોકોનો સંપર્ક સ્થાપિત કરવા અને તેમની સ્થિતિ જાણવા માટે શોધ અને બચાવ કામગીરી સતત ચાલી રહી છે.
