ટાઈગર શ્રોફ પર ફાયરિંગ કેસમાં ગેંગસ્ટર અનિલ પંડિત વોન્ટેડ જાહેર: શસ્ત્રો સપ્લાય કરનાર બે મહિલા સહિત ચાર આરોપી ૨૬ ઑક્ટોબર સુધી પોલીસ કસ્ટડીમાં
યુએસથી ઓપરેટ કરતા અનિલ પંડિતના ઇશારે અમૃતસરથી હથિયારો લવાયા હોવાનો ખુલાસો; દિલ્હીથી પકડાયેલા ચારેય આરોપીઓને મુંબઈ લાવી કોર્ટમાં રજૂ કરાયા
saurashtrabhoomi 
મુંબઈ, તા.૨૩
મુંબઈના જુહુ વિસ્તારમાં અભિનેતા ટાઈગર શ્રોફ પર કરવામાં આવેલા ગોળીબારના સનસનાટીભર્યા કેસમાં પોલીસે મોટી કાર્યવાહી હાથ ધરી છે. આ હુમલાની જવાબદારી સ્વીકારનારા ગેંગસ્ટર અનિલ પંડિતને આ કેસમાં સત્તાવાર રીતે વોન્ટેડ આરોપી જાહેર કરવામાં આવ્યો છે. આ ઉપરાંત, શૂટરો સુધી ગેરકાયદે શસ્ત્રો અને કારતૂસ પહોંચાડવામાં સામેલ દિલ્હીથી પકડાયેલી બે મહિલા સહિત ચાર આરોપીઓને મેજિસ્ટ્રેટ કોર્ટે ૨૬ ઑક્ટોબર સુધી પોલીસ કસ્ટડીમાં મોકલવાનો આદેશ કર્યો છે.
અહેવાલો અનુસાર, લોરેન્સ બિશ્નોઈ ગેંગ સાથે સંકળાયેલો અનિલ પંડિત યુએસથી ગેંગની ગતિવિધિઓ ઓપરેટ કરતો હોવાનું સામે આવ્યું છે. તેણે સોશિયલ મીડિયા પર પોસ્ટ શેર કરીને ૧૮ ઑક્ટોબરે ટાઈગર શ્રોફ પર થયેલા ગોળીબારની જવાબદારી સ્વીકારી હતી. પોલીસે જણાવ્યું હતું કે આ સમગ્ર હુમલો અનિલ પંડિતના સીધા નિર્દેશ હેઠળ અંજામ આપવામાં આવ્યો હતો.
આ કાવતરામાં લોજિસ્ટિક્સ અને હથિયારોની હેરાફેરી માટે પોલીસે ઉત્તર પ્રદેશની રહેવાસી રાધા (૨૩) અને બબિતા (૨૩) તેમજ હરિયાણાના સોનીપત જિલ્લાના કુણાલ (૨૧) અને સુમિત (૧૯)ની ધરપકડ કરી હતી. ચારેય આરોપીઓને દિલ્હીથી ટ્રાન્ઝિટ રિમાન્ડ પર મુંબઈ લાવ્યા બાદ કોર્ટ સમક્ષ રજૂ કરવામાં આવ્યા હતા.
પોલીસે રિમાન્ડની માગણી કરતાં કોર્ટને જણાવ્યું હતું કે પંડિતના નિર્દેશ પર કુણાલ અને સુમિતે અમૃતસરથી પિસ્તોલ તેમજ ૨૦ જીવતા કારતૂસ મેળવ્યા હતા. ત્યારબાદ રાધા અને બબિતા આ હથિયારો લઈને દિલ્હીથી ટ્રેન મારફતે મુંબઈ પહોંચી હતી અને શૂટરોને સોંપ્યાં હતાં. આરોપીઓએ કાવતરામાં સક્રિય ભૂમિકા ભજવી હોવાથી ઊંડાણપૂર્વકની તપાસ માટે કસ્ટડી જરૂરી છે.
બીજી તરફ, બચાવ પક્ષના વકીલો અજિંક્ય મિરગુલ અને સત્યવ્રત જોશીએ કસ્ટડીની અરજીનો વિરોધ કરતાં દલીલ કરી હતી કે આરોપીઓ સામે કોઈ નક્કર પુરાવા નથી અને માત્ર શંકાના આધારે જ તેમની ધરપકડ કરવામાં આવી છે. જોકે, બંને પક્ષોની દલીલો સાંભળ્યા બાદ કોર્ટે ચારેય આરોપીઓને ૨૬ ઑક્ટોબર સુધી પોલીસ રિમાન્ડ પર સોંપ્યા છે.
નોંધનીય છે કે જુહુ વિસ્તારમાં પુષ્પા પાર્ક નજીક ટાઈગર શ્રોફની કાર પર પાંચથી છ રાઉન્ડ અંધાધૂંધ ફાયરિંગ કરવામાં આવ્યું હતું. આ હુમલામાં ટાઈગર શ્રોફનો આબાદ બચાવ થયો હતો, પરંતુ તેના ડ્રાઈવર સહિત બે લોકો ઘાયલ થયા હતા. મુંબઈ પોલીસે આ કેસમાં ત્રણ મુખ્ય શૂટર્સ સહિત અત્યાર સુધીમાં કુલ ૧૦ આરોપીઓની ધરપકડ કરી લીધી છે.
)
