મિસ વર્લ્ડ ૨૦૨૬માં નિકિતા પોરવાલ અને પાકિસ્તાની બ્યુટી ક્વીન વચ્ચે ટક્કર!
સોશિયલ મીડિયા પર બંને દેશોની સુંદરીઓના ઈન્ટરવ્યુ, રેમ્પ વોક અને ફેશન સેન્સની થઈ રહી છે ચર્ચા
saurashtrabhoomi 
મુંબઈ, તા.૧૩:
મિસ વર્લ્ડ ૨૦૨૬ને લઈને વિશ્વભરમાં ઉત્સાહ જોવા મળી રહ્યો છે. આંતરરાષ્ટ્રીય મંચ પર વિવિધ દેશોની સુંદરીઓ પોતપોતાના દેશનું પ્રતિનિધિત્વ કરી રહી છે. ભારત તરફથી ફેમિના મિસ ઈન્ડિયા વર્લ્ડ નિકિતા પોરવાલ સ્પર્ધામાં ઉતરી છે, જ્યારે પાકિસ્તાન તરફથી પણ બ્યુટી ક્વીન પોતાની દાવેદારી રજૂ કરી રહી છે.
ભારત અને પાકિસ્તાનની બંને સ્પર્ધકોને લઈને સોશિયલ મીડિયા પર ખાસ ચર્ચા જોવા મળી રહી છે. યુઝર્સ બંનેના ઈન્ટરવ્યુ, રેમ્પ વોક, ડ્રેસિંગ સ્ટાઈલ અને ફેશન સેન્સની સરખામણી કરી રહ્યા છે. બંને દેશોના સમર્થકો પોતાના મનપસંદ સ્પર્ધકને સોશિયલ મીડિયા પર સપોર્ટ કરી રહ્યા છે.
મધ્ય પ્રદેશના ઉજ્જૈનની નિકિતા પોરવાલે ફેમિના મિસ ઈન્ડિયા ૨૦૨૪નો ખિતાબ જીત્યો હતો. મોડેલિંગ ઉપરાંત તે થિયેટર આર્ટિસ્ટ અને રાઈટર તરીકે પણ ઓળખ ધરાવે છે. મિસ વર્લ્ડના મંચ પર નિકિતા ભારતીય સંસ્કૃતિ અને પરંપરાગત પોશાક સાથે આધુનિક વિચારસરણીનું સુંદર સંયોજન રજૂ કરી રહી છે. તેના વિવિધ ગ્લેમરસ અને રોયલ લુક્સ પણ સોશિયલ મીડિયા પર ચર્ચામાં છે.
મિસ વર્લ્ડ જેવી આંતરરાષ્ટ્રીય સ્પર્ધામાં માત્ર સુંદરતા જ નહીં, પરંતુ આત્મવિશ્વાસ, બુદ્ધિમત્તા, વ્યક્તિત્વ અને સામાજિક કાર્યોને પણ મહત્વ આપવામાં આવે છે. નિકિતા પોરવાલે સામાજિક મુદ્દાઓ અને મહિલા સશક્તિકરણ સાથે જોડાયેલા પ્રોજેક્ટ્સ પર પણ ધ્યાન કેન્દ્રિત કર્યું છે.
બીજી તરફ, પાકિસ્તાની સ્પર્ધક પણ પોતાના પરંપરાગત તેમજ આધુનિક લુક અને આત્મવિશ્વાસથી લોકોનું ધ્યાન ખેંચી રહી છે. જેના કારણે બંને દેશોની સ્પર્ધકો વચ્ચેની સરખામણી સોશિયલ મીડિયા પર વધુ રસપ્રદ બની છે.
