શાહરૂખ ખાનની ‘કિંગ’માં અભિષેક બચ્ચન અને રાણી મુખર્જી ફરી સાથે, લાંબા સમય બાદ શેર કરશે સ્ક્રીન
અભિષેક બચ્ચન વિલનની ભૂમિકામાં હોવાની ચર્ચા; સિદ્ધાર્થ આનંદના દિગ્દર્શનમાં બની રહેલી ફિલ્મમાં બંનેના સમાંતર રોલ હોવાનો અહેવાલ
saurashtrabhoomi 
મુંબઈ, તા. ૮
શાહરૂખ ખાનની આગામી ફિલ્મ ‘કિંગ’ને લઈને સતત નવી વિગતો સામે આવી રહી છે. અહેવાલો અનુસાર ફિલ્મમાં અભિષેક બચ્ચન અને રાણી મુખર્જી લાંબા સમય બાદ ફરી એકસાથે સ્ક્રીન શેર કરતા જોવા મળશે. બંનેના પાત્રો ફિલ્મની વાર્તામાં મહત્ત્વના અને સમાંતર હોવાની ચર્ચા છે.
સિદ્ધાર્થ આનંદના દિગ્દર્શનમાં બની રહેલી ‘કિંગ’માં અભિષેક બચ્ચન નેગેટિવ ભૂમિકામાં જોવા મળશે તેવી ચર્ચા લાંબા સમયથી ચાલી રહી છે. જોકે તેમના પાત્ર અંગેની સંપૂર્ણ વિગતો હજુ જાહેર કરવામાં આવી નથી. હવે રાણી મુખર્જી પણ ફિલ્મનો હિસ્સો હોવાના અહેવાલો બાદ અભિષેક અને રાણીની જોડી ફરી ચર્ચામાં આવી છે.
અભિષેક બચ્ચન અને રાણી મુખર્જીએ અગાઉ અનેક ફિલ્મોમાં સાથે કામ કર્યું છે. બંને ૨૦૦૧માં આવેલી ‘બસ ઇતના સા ખ્વાબ હૈ’માં સાથે જોવા મળ્યા હતા. ત્યારબાદ ‘યુવા’, ‘બંટી ઔર બબલી’, ‘કભી અલવિદા ના કહેના’ અને ‘લાગા ચૂનરી મેં દાગ’ જેવી ફિલ્મોમાં પણ બંનેએ સ્ક્રીન શેર કરી હતી.
ખાસ કરીને ૨૦૦૫માં આવેલી ‘બંટી ઔર બબલી’માં અભિષેક અને રાણીની જોડીને દર્શકો તરફથી સારો પ્રતિસાદ મળ્યો હતો. હવે વર્ષો બાદ બંને ‘કિંગ’માં સાથે જોવા મળશે તેવી ચર્ચાએ ચાહકોમાં ફિલ્મ પ્રત્યે ઉત્સુકતા વધારી છે.
શાહરૂખ ખાન અભિનીત ‘કિંગ’ મોટા સ્તરે તૈયાર થઈ રહેલી ફિલ્મ છે. ફિલ્મમાં અભિષેક બચ્ચન અને રાણી મુખર્જીના પાત્રો કઈ રીતે એકબીજા સાથે જોડાશે તે અંગે હજુ સત્તાવાર રીતે સંપૂર્ણ માહિતી જાહેર કરવામાં આવી નથી.
