હમ તો ડુબેંગે સનમ... તુમ કો ભી લે ડુબેેંગે... ટ્રમ્પે અમેરીકાને દેવાના દરિયામાં ડુબાડી દીધું !!
saurashtrabhoomi 
(એજન્સી) વોશિંગ્ટન તા.ર૦
અમેરિકાનું રાષ્ટ્રીય દેવું પહેલી વાર ૪૦ ટ્રિલિયન ડોલરને વટાવી ગયું છે. યુએસ ટ્રેઝરી ડિપાર્ટમેન્ટના ડેટા અનુસાર, મંગળવારે ટ્રેડિગના અંત સુધીમાં દેશનું કુલ દેવું વધીને ૪૦.૦૪૭ ટ્રિલિયન ડોલર થયું છે. આ આંકડો વિશ્વની સૌથી મોટી અર્થવ્યવસ્થા સામેના નાણાકીય પડકારોને દર્શાવે છે. સતત વધતી જતી બજેટ ખાધ, સરકારી ખર્ચ અને દેવા પર વધતું વ્યાજ હવે યુએસ અર્થતંત્ર માટે ગંભીર ચિતાનો વિષય બની રહ્યા છે.બુધવારે જાહેર કરાયેલા ડેટા દર્શાવે છે કે ડોનાલ્ડ ટ્રમ્પ અને જો બિડેનના કાર્યકાળ દરમિયાન આ દેવું બમણું થઈ ગયું છે અને દેવું ઐતિહાસિક સ્તરે પહોંચી ગયું છે. આ આંકડો એવા સમયે આવ્યો છે જ્યારે યુએસ સરકારી ખર્ચનો નોંધપાત્ર હિસ્સો સંરક્ષણ, સામાજિક સુરક્ષા અને મેડિકેર જેવા કાર્યક્રમો માટે ફાળવવામાં આવી રહ્યો છે. દેવા પર વ્યાજ પણ સરકારી ખર્ચનો નોંધપાત્ર ભાગ બની ગયું છે. નોંધપાત્ર રીતે, અમેરિકાનું દેવું દર પાંચ મહિને ૧ ટ્રિલિયન ડોલર વધી રહ્યું છે.
મહાસત્તાના કુલ દેવામાંથી, આશરે ૩૨.૨૬૬ ટ્રિલિયન ડોલર જાહેર જનતા, રોકાણકારો અને અન્ય સંસ્થાઓ પાસે સરકારી દેવાના રૂપમાં છે. અન્ય ૭.૭૮૨ ટ્રિલિયન ડોલર વિવિધ સરકારી વિભાગો અને સંસ્થાઓ પાસે છે, જેનો અર્થ એ છે કે સરકારે લાંબા સમયથી તેના ખર્ચને પહોંચી વળવા માટે મોટા પાયે ઉધાર લેવાનો આશરો લીધો છે. ૨૦૧૭ ની પરિસ્થિતિ સાથે સરખામણી કરીએ તો ચિત્ર વધુ સ્પષ્ટ થાય છે. ડોનાલ્ડ ટ્રમ્પ પહેલી વાર રાષ્ટ્રપતિ બન્યા ત્યારેની સરખામણીમાં, યુએસનું રાષ્ટ્રીય દેવું હવે બમણાથી પણ વધુ થઈ ગયું છે.
