વાડલા ગામમાં મધરાતે 4થી 5 સિંહણોના આંટાફેરા, ગ્રામજનોમાં ભય

વંથલી તાલુકાના વાડલા ગામમાં રાત્રે રહેણાક વિસ્તાર નજીક સિંહણોનું ટોળું દેખાયું; વાડલા અને મધુરમ આસપાસ છેલ્લા 15 દિવસથી સિંહોની અવરજવર

વાડલા ગામમાં મધરાતે 4થી 5 સિંહણોના આંટાફેરા, ગ્રામજનોમાં ભય

જૂનાગઢ, તા. 21
જૂનાગઢ જિલ્લાના વંથલી તાલુકાના વાડલા ગામમાં છેલ્લા કેટલાક દિવસોથી સિંહોની અવરજવર વધી રહી છે. ગત રાત્રે આશરે 12 વાગ્યાના અરસામાં 4થી 5 સિંહણોનું ટોળું ગામના રહેણાક વિસ્તાર નજીક આવી પહોંચતાં સ્થાનિક રહીશોમાં ચિંતા અને ભયનો માહોલ સર્જાયો હતો. શિકારની શોધમાં સિંહણો ગામ તરફ આવી હોવાની શક્યતા વચ્ચે મોડી રાત્રે અચાનક વન્યજીવો દેખાતાં લોકોમાં દોડધામ જેવી સ્થિતિ જોવા મળી હતી.
હાલ જૂનાગઢમાં ગિરનાર લીલી પરિક્રમાનો માહોલ ચાલી રહ્યો છે. આ દરમિયાન ગિરનાર જંગલ અને તેની આસપાસના વિસ્તારોમાં સિંહોની અવરજવરના વીડિયો પણ અગાઉ સોશિયલ મીડિયા પર સામે આવ્યા છે. બીજી તરફ, સિટી ગ્રુપ તરીકે ઓળખાતા સિંહોના ટોળાની ગ્રામ્ય વિસ્તારોની સાથે શહેરની સોસાયટીઓ તરફ પણ અવરજવર થતી હોવાની ચર્ચાઓ વચ્ચે વાડલા ગામમાં સિંહણોના ટોળાની હાજરીએ સ્થાનિકોની ચિંતા વધારી છે.
સ્થાનિકોના જણાવ્યા અનુસાર, છેલ્લા આશરે 15 દિવસથી વાડલા અને મધુરમ આસપાસના વિસ્તારોમાં સિંહોની સતત અવરજવર જોવા મળી રહી છે. ખાસ કરીને રાત્રિના સમયે રહેણાક વિસ્તારો નજીક વન્યજીવો દેખાતા લોકો સાવચેતી રાખી રહ્યા છે. મોડી રાત્રે બહાર નીકળવાનું ટાળવા સાથે ગ્રામજનોમાં સુરક્ષાને લઈને ચિંતા વધી છે.
વાડલા ગામમાં મધરાતે સિંહણોનું ટોળું આવી પહોંચવાની ઘટના બાદ સ્થાનિકોએ વન વિભાગ દ્વારા આ વિસ્તારોમાં સતત દેખરેખ રાખવામાં આવે તેવી અપેક્ષા વ્યક્ત કરી છે. છેલ્લા પખવાડિયાથી સિંહોની હાજરી નોંધાતી હોવાથી લોકોની સુરક્ષા અને વન્યજીવોની સલામતી બંનેને ધ્યાનમાં રાખીને યોગ્ય તકેદારી રાખવાની જરૂરિયાત ઊભી થઈ છે.