Thursday, December 8

સલાયાના ચકચારી ડ્રગ્સ પ્રકરણમાં અન્ય નામથી ફિશિંગ બોટ મારફતે હેરાફેરી કરનારા શખ્સો સામે વધુ એક ફરિયાદ નોંધાઇ

0

ખંભાળિયા પંથકમાંથી આજથી આશરે ત્રણેક માસ પૂર્વે બે સ્થળોએથી ઝડપાયેલા કુલ રૂપિયા ત્રણસો પંદર કરોડની તોતિંગ કિંમતના ડ્રગ્સ પ્રકરણમાં પાકિસ્તાન બોર્ડર ઉપરથી ખંભાળિયા તાલુકાના સલાયા ગામે ઉતારવામાં આવેલા આ ડ્રગ્સ સંદર્ભે પોલીસે અન્ય બોટના નામે ખોટા રજીસ્ટ્રેશન નંબર દર્શાવી માછીમારી બહાને ડ્રગ્સ લઈ આવ્યા સબબ અડધો ડઝન જેટલા શખ્સો સામે ગુનો નોંધ્યો છે. ખંભાળિયા-જામનગર રોડ ઉપરના આરાધનાધામ પાસેથી ગત તારીખ ૯ નવેમ્બરના રોજ મોડી રાત્રીના સમયે મુંબઈના એક શખ્સ પાસેથી પોલીસે આશરે રૂપિયા ૮૮.૨૫ કરોડની કિંમતનો ડ્રગ્સનો જથ્થો કબજે કર્યો હતો. આ અંગેની વધુ તપાસમાં જિલ્લા પોલીસે વધુ રૂપિયા ૨૨૫ કરોડની કિંમતનો ડ્રગ્સનો જથ્થો સલાયાના બે શખ્સોના રહેણાંક મકાનમાંથી જપ્ત કર્યો હતો. કુલ રૂપિયા ૩૧૫ કરોડના તોતિંગ કિંમતના ઝડપાયેલા ડ્રગ્સના આ સમગ્ર પ્રકરણ સંદર્ભે પોલીસે નાઇજીરિયન તથા મુંબઈના શખ્સો ઉપરાંત સલાયાના રહીશ સલીમ યાકુબ કારા તેના ભાઈ અલી અસગર યાકુબ કારા નામના બે બંધુઓ બાદ પાકિસ્તાન બોર્ડર ઉપરથી ડ્રગ્સ લઈને આવેલા સલાયાના સલીમ ઉંમર જુસબ જસરાયા તથા તેના ભાઈના નામો પોલીસ ફરિયાદમાં ખુલવા પામ્યા હતા. જેની પોલીસે ધરપકડ કરી વિવિધ દિશામાં તપાસ આરંભી હતી. આ સમગ્ર પ્રકરણમાં ઉંડાણપૂર્વકની તપાસમાં જે બોટમાં પાકિસ્તાન બોર્ડર ઉપરથી ડ્રગ્સનો જથ્થો લઈ આવવામાં આવ્યો હતો, તે ફારૂકી-૧ નામની બોટ કે જેના અગાઉ મૂળ માલિક જૂનાગઢ જિલ્લાના થોરડી ગામના રહીશ અને હાલ રૂપેણ બંદર ખાતે રહેતા અજગરઅલી છોટુમિયા સૈયદ હોવાનું ખુલવા પામ્યું છે, તેની સામે પણ તપાસ ચલાવતા આ પ્રકરણમાં દ્વારકાના રૂપેણ બંદર ખાતે રહેતા આમદ જુસબ ભેસલીયા દ્વારા બોટના કાગળો આરોપી સલીમ તથા અલી કારાને આપ્યા હોવાનું ખુલવા પામ્યું છે. આ અંગે અહીંના સી.પી.આઈ. પટેલની ફરિયાદ ઉપરથી દ્વારકા પોલીસે આરોપી શખ્સો દ્વારા સુનિયોજિત કાવતરૂ રચી, ગેરકાયદે રીતે વગર માત્ર માછીમારી બોટ ફારૂકી-૧ કે જેના રજીસ્ટ્રેશન નંબર આઈ.એન.ડી.-જી.જે.-૩૭- એમ.ઓ.-૭૨૯ના રજીસ્ટ્રેશન કાગળોની વેંચાણ-ખરીદી કરી, વેંચાણ અંગેનો ખોટો દસ્તાવેજ બનાવી, રજીસ્ટ્રેશન વગરની અજગરઅલી છોટુમિયા સૈયદની ફાઈબરની અજમેરી લખેલી બોટનું વેંચાણ-ખરીદી કરવા અંગેનું કૌભાંડ આચરી, ફારૂકી-૧ બોટ ન હોવા છતાં ઉપરોક્ત નામ અને નંબરનું લખાણ કરી અને ફિશરીઝ ગાર્ડ પાસેથી માછીમારી કરવા અંગેની વિધિવત રીતે નોંધ કરાવી, તારીખ ૨૮ ઓક્ટોબરથી તારીખ ૯ નવેમ્બર સુધીના સમયગાળા દરમ્યાન ઉપરોક્ત શખ્સોની મીલીભગતથી ગુનો આચરવામાં આવ્યો હતો. આ સમગ્ર પ્રકરણ અંગે દ્વારકા પોલીસે સલીમ યાકુબ કારા, અલી અસગર કારા, સલીમ ઉંમર જસરાયા, દ્વારકાના આમદ જુસબ ભેસલીયા અને અજગર અલી છોટુમીયા સૈયદ ઉપરાંત સંભવિત રીતે સંડોવાયેલા મનાતા અન્ય શખ્સો સામે આઈ.પી.સી. કલમ ૪૬૩, ૪૬૫, ૪૬૮, ૪૭૧, ૪૭૩ તથા ૧૨૦(બી) મુજબ ગુનો નોંધ્યો છે.

#saurashtrabhoomi #media #news #gujarat #junagadandgandhinagar #marketing #radio #photography #socialmedia #entertainment #instagram #tv #business #podcast #branding #like#advertising #press #doubletap #saurashtranews #gujaratnews

error: Content is protected !!