એનિમલ લવર્સ ચેરિટેબલ ટ્રસ્ટ દ્વારા એક જ દિવસમાં ચાર અજગરનું સફળ રેસ્ક્યુ કરાયું
saurashtrabhoomi 
(પ્રતિનિધિ દ્વારા)
જામ ખંભાળિયા તા.ર૩
ભાણવડમાં જીવદયાના ઉમદા હેતુ સાથે કાર્યરત ‘એનિમલ લવર્સ ચેરિટેબલ ટ્રસ્ટ’ દ્વારા માનવ વસ્તીમાં આવી ચડેલા ચાર જેટલા અજગરનું એક જ દિવસમાં સફળતાપૂર્વક રેસ્ક્યુ કરીને તેમને કુદરતી વાતાવરણમાં પુન:મુક્ત કરવાનો સરાહનીય પ્રયાસ કરવામાં આવ્યો છે.
ભાણવડની આસપાસના વિસ્તારોમાં રક્ષણ અને સલામતીના ભાગરૂપે ટ્રસ્ટના અનુભવી રેસ્ક્યુઅર અશોકભાઈ ભટ્ટની આગેવાની હેઠળ આ ઓપરેશન હાથ ધરવામાં આવ્યું હતું. આ રેસ્ક્યુ ઓપરેશનમાં ટ્રસ્ટના ઉત્સાહી સભ્યો દત્ત દેસાઈ, દૂદાભાઈ ભરવાડ, હરીશભાઈ વાઘેલા અને પરાગ પીઠિયાએ સલામતીપૂર્વક કામગીરી કરી ચારેય અજગરને સક્ષમ રીતે બચાવી લીધા હતા. આ તમામ અજગરને વન વિભાગની સૂચના અને માર્ગદર્શન હેઠળ ‘બરડાના પ્રાકૃતિક આવાસમાં સુરક્ષિત અને કુદરતી પર્યાવરણમાં મુક્ત કરવામાં આવ્યા છે.
