‘બાહુબલી’ સ્ટાર પ્રભાસે કો-સ્ટાર ઈમાનવીને આપી સ્પેશિયલ સરપ્રાઈઝ, સોશિયલ મીડિયા પર તસવીરો વાયરલ
આગામી ફિલ્મ ‘ફૌજી’ની હિરોઈનના જન્મદિવસે પ્રભાસે મોકલી ખાસ ટ્રીટ; અભિનેત્રીએ પોસ્ટ શેર કરી કહ્યું- ‘મારું દિલ અને પેટ બંને ભરાઈ ગયા’
saurashtrabhoomi 
મુંબઈ, તા.૨૨
'બાહુબલી' જેવી ઐતિહાસિક બ્લોકબસ્ટર ફિલ્મ દ્વારા સમગ્ર ભારતમાં પોતાની આગવી ઓળખ બનાવનાર અભિનેતા પ્રભાસ ફરી એકવાર ચર્ચામાં આવ્યા છે. બોક્સ ઓફિસ પર રેકોર્ડ્સ સર્જવાની સાથે પ્રભાસ પોતાના સહ-કલાકારો પ્રત્યેના પ્રેમાળ અને આતિથ્યશીલ સ્વભાવ માટે પણ જાણીતા છે. તાજેતરમાં પ્રભાસે પોતાની આગામી ફિલ્મના સેટ પર કો-સ્ટારને ખાસ સરપ્રાઈઝ આપીને ચાહકોના દિલ જીતી લીધા છે.
વર્ષ ૨૦૧૭માં રિલીઝ થયેલી 'બાહુબલી ૨'ની અભૂતપૂર્વ સફળતા બાદ પ્રભાસની કારકિર્દીમાં અનેક ચડાવ-ઉતાર આવ્યા હતા. 'સાહો'ને સરેરાશ સફળતા મળી હતી, જ્યારે 'રાધે શ્યામ' અને 'આદિપુરુષ' જેવી મોટા બજેટની ફિલ્મો બોક્સ ઓફિસ પર અપેક્ષા મુજબ પ્રદર્શન કરી શકી નહોતી. જોકે, ત્યારબાદ 'સલાર' અને ‘કલ્કિ ૨૮૯૮ એડી’ જેવી ભવ્ય ફિલ્મો દ્વારા પ્રભાસે બોક્સ ઓફિસ પર જોરદાર વાપસી કરી હતી.
હાલમાં પ્રભાસ જાણીતા દિગ્દર્શક હનુ રાઘવપુડીની આગામી ફિલ્મ 'ફૌજી'ના શૂટિંગમાં વ્યસ્ત છે. આ ફિલ્મમાં તેમની સાથે અભિનેત્રી ઈમાનવી ઈસ્માઈલ મુખ્ય ભૂમિકા ભજવી રહી છે. તાજેતરમાં ઈમાનવીના જન્મદિવસ નિમિત્તે પ્રભાસે તેને એક અનોખી અને યાદગાર સરપ્રાઈઝ આપી હતી.
પ્રભાસે પોતાની જાણીતી પરંપરા મુજબ ઈમાનવી માટે ખાસ સ્વાદિષ્ટ ભોજનની ભવ્ય વ્યવસ્થા કરી હતી. અભિનેત્રીએ આ ખાસ સરપ્રાઈઝ અને ભોજનની તસવીરો પોતાના સત્તાવાર ઈન્સ્ટાગ્રામ એકાઉન્ટ પર શેર કરી હતી, જે જોતજોતામાં સોશિયલ મીડિયા પર વાયરલ થઈ ગઈ હતી.
પ્રભાસ તરફથી મળેલી આ સુંદર ભેટ બદલ હૃદયપૂર્વક આભાર વ્યક્ત કરતાં ઈમાનવીએ ભાવુક પોસ્ટ લખી હતી કે, “મારું દિલ પણ ભરાઈ ગયું છે અને પેટ પણ.” સોશિયલ મીડિયા પર ચાહકો પ્રભાસના આ ઉદાર સ્વભાવની ભરપૂર પ્રશંસા કરી રહ્યા છે અને બંનેની ઓન-સ્ક્રીન કેમિસ્ટ્રી જોવા માટે ઉત્સુકતા દર્શાવી રહ્યા છે.
