જૂનાગઢ શહેરમાં બુધવારની સાંજે સુખનાથ ચોક પાસે ઇકો કારમાં આગ લાગતાં અફરા તફરી ગઈ હતી. ફાયર બ્રિગેડે આગને કાબુમાં લીધી હતી. સદનસીબે જાનહાની ટળી હતી. શહેરના સુખનાથ ચોક નજીક સાંજે ૫ઃ૩૦ વાગ્યાના અરસામાં જીજે ૧૧ પીએચ ૦૨૩૨ નંબરની ઇકો કારમાં ઓચિંતા જ આગ ફાટી નીકળી હતી. આ અંગેની જાણ થતા ફાયર બ્રિગેડના દિપક જાની સહિતનો સ્ટાફ દોડી ગયો હતો અને પાણીનો મારો ચલાવી આગને કાબુમાં લીધી હતી. આગની ઘટનામાં કોઈ પ્રકારની જાનહાની થઈ ન હતી. પરંતુ કારને ભારે નુકસાન થયું હતું. કારના માલિક ફેઝ કાદરી હોવાનું સામે આવ્યું હતું. આ ઘટનામાં અમિનભાઇ સુમરાને સામાન્ય ઇજા થતાં ૧૦૮ એમ્બ્યુલન્સ મારફત સિવિલ હોસ્પિટલમાં સારવાર માટે ખસેડવામાં આવ્યા હતા.