રશિયા-યુક્રેન સંઘર્ષ વચ્ચે ૧૦૦ રાફેલ જેટની એન્ટ્રી થતાં બદલાશે યુદ્ધની દિશા

(સંપૂર્ણ સમાચાર સેવા) નવીદિલ્હી,તા.૧૯
યુક્રેન અને રશિયા વચ્ચે ચાલી રહેલા યુદ્ધમાં હવે એક મોટો વળાંક આવી શકે છે. સોમવારે યુક્રેનના પ્રમુખ વ્લાદિમીર ઝેલેન્સ્કી અને ફ્રાન્સના પ્રમુખ ઈમેન્યુઅલ મેક્રોને એક ઐતિહાસિક કરાર કર્યો છે. આ કરાર હેઠળ યુક્રેનને આગામી ૧૦ વર્ષમાં ફ્રાન્સ પાસેથી ૧૦૦ રાફેલ ફાઈટર જેટ, ડ્રોન, એર ડિફેન્સ સિસ્ટમ અને અન્ય હથિયાર મળશે. ઝેલેન્સ્કીએ તેને ‘વિશ્વની સૌથી મજબૂત એર ડિફેન્સ‘ ગણાવી છે. પરંતુ શું આ જેટ યુદ્ધની દિશા બદલી નાખશે? અને રશિયન પ્રમુખ વ્લાદિમીર પુતિનનો શું જવાબ હશે?
રાફેલ ફ્રાન્સનું સૌથી એડવાન્સ ફાઈટર વિમાન છે. તે ચોથી પેઢીનું મલ્ટી-રોલ જેટ છે, જે હવામાં લડાઈ, લાંબા અંતરના હુમલા અને મિસાઈલ રોકવાનું કામ કરી શકે છે. એક જેટની કિંમત લગભગ ૮૫૦ કરોડ રૂપિયા છે. ફ્રાન્સે અગાઉ યુક્રેનને મિરાજ જેટ આપ્યા હતા, પરંતુ  રાફેલ પહેલી વાર આપવામાં આવી રહ્યા છે.
આ જેટ અમેરિકન F-16 જેટની જેમ કામ કરે છે. યુક્રેન પાસે હાલમાં માત્ર ૯ F-16 અને 2 મિરાજ છે, બાકીના જૂના સોવિયેત વિમાનો છે. રાફેલ જેટની એન્ટ્રીથી યુક્રેનની હવાઈ તાકાત મજબૂત થશે. નિષ્ણાતો કહે છે કે, તે રશિયન મિસાઈલો અને ડ્રોનને સરળતાથી અટકાવી શકશે. જાેકે, પ્રથમ જેટ આવવામાં ઓછામાં ઓછા ત્રણ વર્ષ લાગશે, કારણ કે પાયલટ્સને ટ્રેનિંગ આપવી પડશે. 
૧૭ નવેમ્બર ૨૦૨૫ના રોજ પેરિસના વિલાકોબ્લે એરબેઝ પર બંને પ્રમુખોએ લેટર ઓફ ઈન્ટેન્ટ (કરાર પત્ર) પર હસ્તાક્ષર કર્યા. આ કોઈ ફાઈનલ કોન્ટ્રાક્ટ નથી પરંતુ ભવિષ્યની ખરીદ માટેની યોજના છે. 
- ૧૦૦ રાફેલ F4 જેટ: ૨૦૩૫ સુધીમાં ડિલીવરી.
- ડ્રોન અને રડાર: હવાથી હવામાં અને હવાથી જમીન પર હુમલો કરવા માટે.
- SAMP/T એર ડિફેન્સ  સિસ્ટમ: આ અમેરિકન પેટ્રિઅટ કરતાં રશિયન મિસાઈલોને વધુ સારી રીતે અટકાવે છે.
ફ્રાન્સ EU પ્રોગ્રામ અને રશિયાના ફ્રીઝ્ડ એસેટ્સ (જપ્ત સંપત્તિ)માંથી પૈસા આપશે. યુક્રેન પણ કો-પ્રોડક્શન પર વિચાર કરી રહ્યું છે, જેથી જેટ ખુદ બનાવી શકે. આ ડીલ સ્વીડન સાથે ૧૫૦ ગ્રિપેન જેટની ડીલ બાદ થઈ છે. યુક્રેનની યોજના ૨૫૦ નવા વિમાનોથી હવાઈ તાકાત બનાવવાની છે. 
યુક્રેનની હવાઈ શક્તિ એક મોટી સમસ્યા છે.
 રશિયા દર મહિને ૬,૦૦૦ ગ્લાઈડ બોમ્બ ફેંકે છે, જે સરહદ પરના શહેરોને તબાહ કરી રહ્યા છે. તાજેતરમાં જ ખાર્કિવ અને બાલાક્લિયામાં રશિયન હુમલાઓમાં ડર્ઝનો નાગરિકો માર્યા ગયા હતા. રાફેલથી યુક્રેન લાંબા અંતરના હુમલા કરી શકશે અને રશિયન વિમાનોને પાછળ ધકેલી શકશે. 
- શોર્ટ ટર્મમાં વધુ ફરક નહીં પડશે. ટ્રેનિંગ અને ડિલીવરીમાં સમય લાગશે. યુદ્ધ હાલમાં રશિયાના પક્ષમાં ચાલી રહ્યું છે, જે ધીમે-ધીમે જમીન પર કબજાે કરી રહ્યું છે. 
- લોન્ગ ટર્મમાં આ જેટ રશિયાને ડરાવશે. યુક્રેન લાંબા અંતરના હુમલા કરી શકશે, જેમ કે, રશિયાની અંદર સ્ટ્રાઈક. તે રશિયાને ભવિષ્યમાં હુમલા કરતા અટકાવશે. રાફેલ રશિયન જેટ્સને હરાવી શકશે. 
- જાેકે, બીજી તરફ પડકાર એ છે કે, યુક્રેને પૈસા એકઠા કરવા પડશે. અમેરિકાના ટ્રમ્પ વહીવટીતંત્રએ ઓછી મદદ કરી છે તેથી યુરોપ આગળ આવી રહ્યું છે. ફ્રાન્સે કહ્યું કે, તે યુક્રેનની આર્મીને ફરીથી બનાવશે.  આ ડીલના સમાચાર પર ક્રેમલિન તરફથી તાત્કાલિક કોઈ પ્રતિક્રિયા નથી આવી. પરંતુ રશિયાનું વલણ સ્પષ્ટ છે. પુતિન યુદ્ધવિરામની માગ ઠુકરાવી રહ્યા છે. તેમનું કહેવું છે કે યુક્રેન ધીમે-ધીમે હથિયાર જમા કરી લેશે. રશિયા ટ્રમ્પ પાસે વાતચીતની આશા રાખી રહ્યું છે, પરંતુ તેની શરતો નથી છોડી રહ્યું.
- જમીન પર કબજાે: રશિયા દોનેત્સક અને ઝાપોરિઝિયાના ગામડાઓ પર કબજાે કરી રહ્યું છે.
- હવાઈ હુમલામાં વધારો: મિસાઈલ અને ડ્રોનથી યુક્રેનના એનર્જી પ્લાન્ટ્સ પર હુમલા વધારી શકે છે.