ગીરના ચિત્રોડ નજીકના “સ્વાગત રિસોર્ટ” અને સાંગોદ્રા નજીકના “ધ ગીર પલ્સ રિસોર્ટ”માં દરોડા પાડી બંન્ને રીસોર્ટના સંચાલકો સહિત પોરબંદર, રાજકોટના ૧૨ નશાખોરો રંગેહાથ ઝડપાયા
ગીર પંથકના રીસોર્ટ ફાર્મ હાઉસોમાં ચાલતી દારૂની મહેફીલો સહિતની ગેરકાયદે પ્રવૃત્તિઓ ઉપર જીલ્લા ક્રાઇમ બ્રાન્ચે ઘોસ બોલાવી છે. ગતરાત્રીના ગીર પંથકના ૨લબે રીસોર્ટ ઉપર દરોડો પાડી પોરબંદર, રાજકોટ, ધોરાજીના નશાખોરોને દારૂની મહેફિલ માણતા રંગેહાથ ઝડપી લઈ તમામને જેલ હવાલે કરી કાયદેસરની કાર્યવાહી હાથ ધરતા ચકચાર પ્રસરી છે. સાસણ અને તાલાલા ગીરના જુદા જુદા ગામોમાં અસંખ્ય ફાર્મ હાઉસો અને રીસોર્ટ ધમધમી રહ્યા છે. જેમાંના ઘણાં રીસોર્ટ તેમજ ફાર્મ હાઉસોમાં સંચાલકો દ્વારા વિદેશી દારૂની મહેફિલો માટે સગવડતા કરી આપી ગ્રાહકોને આકર્ષે છે. છેલ્લા અમુક વર્ષોથી આવી પ્રવૃત્તિનું દુષણ દિન પ્રતિદિન વધી રહ્યુ છે અમુક અમુક રિસોર્ટના બદલે હવે આ દુષણ વ્યાપક પ્રમાણમાં વધી રહ્યું છે. ત્યારે સમયાંતરે આવી ગેરકાયદે પ્રવૃત્તિઓ ઉપર કાર્યવાહી કરવામાં આવતી હોય છે આમ છતાં આ દુષણને જળ મૂળથી ડામવું અઘરું બની ગયું હોય તેવું લાગી રહ્યું છે. આગામી દિવસોમાં નાતાલ અને થર્ટી ફર્સ્ટ આવી રહી છે ત્યારે ગીર પંથકના ફાર્મ હાઉસો અને રીસોર્ટમાં આવી પ્રવૃત્તિઓ ઉપર અંકુશ લાવવા જીલ્લા પોલીસવડા મનોહરસિંહ જાડેજા દ્વારા કડક નિર્દેશ આપવામાં આવ્યા છે. જે અંતર્ગત જીલ્લા ક્રાઇમ બ્રાન્ચ દ્વારા આવી પ્રવૃત્તિ ઉપર બાઝ નજર રાખવામાં આવી રહી છે. ગત રાત્રીના એલસીબી પી.આઈ એ.બી.જાડેજા, પીએસઆઈ એ.એસ. સિંધવ સહિતનો સ્ટાફ પેટ્રોલીંગમાં હતો. ત્યારે સાસણ ગીર નજીક ચિત્રોડ ગામની સીમમાં આવેલ સ્વાગત રીસોર્ટમાં દરોડો પાડતા વિદેશી દારૂની મહેફિલ માણતા રીસોર્ટ સંચાલક જેતપુરના રામજી મંદીર પાછળ રહેતો ૩૩ વર્ષીય વાણંદ પ્રશાંત જયસુખભાઈ ભટ્ટી, રાજકોટના નાન મવા સર્કલ નજીક રહેતા અને હોટલ વ્યવસાય ધરાવતા ૫૭ વર્ષીય પટેલ વિઠ્ઠલભાઇ ડાયાભાઇ અમીપરા, રાજકોટના મવડી પ્લોટ વિસ્તારમાં રહેતા ૪૩ વર્ષીય વેપારી પટેલ બિપીન મોહનભાઇ, રાજકોટ કોટડાસાંગાણીના પડવલા ગામે રહેતા દરબાર સહદેવસિંહ ચંદુભા જાડેજા, મહેન્દ્ર દેવજીભાઇ ચૌહાણ, પોરબંદરમાં આશાપુરા ચોકડી નજીક રહેતા ખારવા રમેશભાઇ જાદવભાઈ વાંદરીયા, ખારવા હિતેષભાઇ મેઘજીભાઇ બાદરશાહી, ખારવા નારણભાઇ બાબુભાઇ સલેટ, ખારવા નિલેશ માવજીભાઇ લોઢારી વિદેશી દારૂની મહેફિલ માણતા રંગેહાથ ઝડપાઈ આવ્યા હતા. આવી જ રીતે સાંગોદ્રા ગામના પાટીયા પાસે બોરવાવ ગીર ગામ ની સીમમાં આવેલ ધ ગીર પલ્સ નામના રીસોર્ટમાં દરોડો પાડતા રિસોર્ટ સંચાલક સાસણ ગીરના ખડાનેસનો ૨૧ વર્ષીય યુવક રબારી ભરત હાજાભાઈ મુછાળ રબારી, તાલાલાના ગુંદરણ ગામે માલધારી વસાહતમાં રહેતા રબારી સુરેશ રામભાઇ કરમટા અને રિસોર્ટમાં નોકરી કરતો રાજકોટના કોઠારીયા રોડ સુરભી પાર્ક-૧ માં રહેતો વાળંદ પરેશ મનસુખભાઈ કાલાવાડીયા વિદેશી દારૂની મહેફિલ માણતા રંગેહાથ ઝડપાઇ આવ્યા હતા. ઉપરોક્ત બન્ને રિસોર્ટમાં દારૂ ની મહેફિલ માણતા તમામ નશાખોરો સહિત રિસોર્ટ સંચાલકો વિરુદ્ધ તાલાલા પોલીસ સ્ટેશનમાં અલગ અલગ ગુન્હા નોંધી તમામને જેલ હવાલે કરી કાયદેસરની કાર્યવાહી હાથ ધરવામાં આવી છે. પ્રવાસન ક્ષેત્રે વિકાસની હરણફાળ ભરી રહેલ ગીર પંથકમાં આવેલા રીસોર્ટ ફાર્મ હાઉસોમાં ચાલતી વિદેશી દારૂની મહેફિલો સહિતની ગેરકાયદેસર પ્રવૃત્તિ પર જીલ્લા પોલીસવડા મનોહરસિંહ જાડેજા દ્વારા કડક કાર્યવાહી હાથ ધરવામાં આવી રહી છે. આ પ્રકારના દરોડા સતત ચાલુ રાખવામાં આવનાર હોવાનું જાણવા મળી રહ્યું છે.