દીપાવલી તહેવાર યુનેસ્કોની સાંસ્કૃતિક વારસાની અમૂર્ત ધરોહરમાં સ્થાન પામ્યો જૂનાગઢના ઉપરકોટ કિલ્લા ખાતે ગૌરવપૂર્ણ સિદ્ધિને દિવાળી પર્વની જેમ કલાત્મક રંગોળી બનાવી અને દીપ પ્રજ્વલિત કરી વધાવવામાં આવી
ઉપરકોટના કિલ્લામાં ઢળતી સાંજે અનોખો માહોલ સર્જાયો : સાંસ્કૃતિક ગીતો પણ રજૂ કરાયા
saurashtrabhoomi 
જૂનાગઢ તા.૧૧
ભારતના સૌથી મહત્વપૂર્ણ ગણાતા દીપાવલી તહેવાર યુનેસ્કોની અમૂર્ત સાંસ્કૃતિક વારસાની ધરોહરમાં સ્થાન પામ્યો છે, આ ગૌરવપૂર્ણ સિદ્ધિના જૂનાગઢના ઉપરકોટના કિલ્લામાં રાણકદેવી મહેલના પ્રાંગણમાં દિપાવલી પર્વે જેમ કલાત્મક રંગોળી બનાવવામાં આવે છે. તેવી જ રીતે જુદી જુદી વિદ્યાલયોના વિદ્યાર્થી- વિદ્યાર્થીનીઓએ રંગબેરંગી રંગોળી બનાવી અને દીપ પ્રજ્વલિત કરી વધામણા કરવામાં આવ્યા હતાં. આ ગૌરવપ્રદ ઉજવણીમાં મેયર ધર્મેશભાઈ પોશિયા, સ્ટેન્ડિંગ કમિટીના ચેરપર્સન પલ્લવીબેન ઠાકર, કમિશનર તેજસ પરમાર, શાસક પક્ષના નેતા મનન અભાણી, ડેપ્યુટી કમિશનર ડી.જે. જાડેજા સહિતના મહાનુભાવો સહભાગી બન્યાં હતાં.
ભારતીય સંસ્કૃતિ અને જૂનાગઢની અસ્મિતાને ઉજાગર કરતી કલાત્મક રંગોળીઓ નિહાળી અભિભૂત થયા હતા. સાથે જ આ રંગોળી બનાવનાર વિદ્યાર્થી-વિદ્યાર્થીનીઓની કળાને બિરદાવી પ્રોત્સાહિત કર્યા હતા. આ પ્રસંગે એન.બી. કાંબલીયા કન્યા વિદ્યામંદિર, કે.જી. ચૌહાણ વિદ્યામંદિર, બહાઉદ્દીન સાયન્સ કોલેજ, ગવર્મેન્ટ આયુર્વેદિક કોલેજ- જૂનાગઢ, આર.જે. કનેરિયા ગર્લ્સ સ્કૂલ, સ્વ. ટી.એલ. વાળા કન્યા વિદ્યામંદિર, એમ.જી. ભુવા કન્યા વિદ્યામંદિર તથા મેંદરડા ખાતેની નાગલપુર પ્રાથમિક શાળાના વિદ્યાર્થી - વિદ્યાર્થીનીઓએ રંગબેરંગી અને કલાત્મક રંગોળી બનાવી હતી. આ ઉપરાંત સપ્તક સંગીત વિદ્યાલયના કલાકારોએ પણ સાંસ્કૃતિક ગીતોની પણ પ્રસ્તુતિ આપી હતી. જિલ્લા યુવા વિકાસ અધિકારી શ્રીમતી નીતાબેન વાળા, પ્રાંત યુવા વિકાસ અધિકારી ડાંગરે આ કાર્યક્રમને સફળ બનાવવા માટે જરૂરી સંકલન કર્યું હતું. ઉલ્લેખનીય છે કે, ભારત સરકારના સંસ્કૃતિ મંત્રાલય દ્વારા યુનેસ્કોનું ૨૦ મું આંતરસરકારી સમિતિનું સત્ર ૭-૧૩ ડિસેમ્બર દરમ્યાન લાલ કિલ્લો, નવી દિલ્હી ખાતે આયોજિત થયેલ છે. આ સત્રમાં ૧૮૦ થી વધુ દેશોના ૧૦૦૦ થી વધુ પ્રતિનિધિ, સમિતિના સભ્યો, યુનેસ્કો અધિકારીઓ, એનજીઓ અને વારસાગત પરંપરાના ધારકો- ભાગ લઈ રહ્યા છે.
.jpg)
