કતારમાં આવેલા વિશ્વના સૌથી મોટા ગેસ ફિલ્ડ પર ઈરાનનો હુમલો
યુધ્ધ અત્યંત ભયાનક તબક્કામાં પહોંચી ગયું : વિશ્વવ્યાપી ગંભીર પરિણામો આવશે
saurashtrabhoomi 
(એજન્સી) નવી દિલ્હી તા.૧૯:
ઈરાન અને અમેરિકા-ઈઝરાયલ વચ્ચે ચાલી રહેલો સંઘર્ષ હવે ખૂબ જ ખતરનાક તબક્કામાં પ્રવેશી ગયો છે. વિશ્વના સૌથી મોટા ગેસ પ્લાન્ટ પૈકીના એક કતારના રાસ લાફાન પર ઈરાનના મોટા હુમલાએ વૈશ્વિક ઉર્જા બજારમાં ગભરાટ ફેલાવી દીધો છે. આ હુમલા બાદ કતાર એનર્જીના ઉત્પાદન બંધ થવાથી ભારત જેવા દેશોમાં રસોઈ ગેસ (LPG) અને કુદરતી ગેસ (LNG) ની તીવ્ર અછતનો ભય ઉભો થયો છે. આ મિસાઈલ હુમલો ઈરાનના પારસ ગેસ ક્ષેત્ર પર તાજેતરમાં ઈઝરાયલી હુમલા સામે બદલો લેવાની કાર્યવાહી હોવાનું માનવામાં આવે છે. ઈઝરાયલી હુમલા પછી તરત જ, ઈરાને સાઉદી અરેબિયા, સંયુક્ત આરબ અમીરાત (UAE) અને કતારને ખુલ્લેઆમ ચેતવણી આપી હતી કે આગામી કલાકોમાં તેમના તેલ અને ગેસ પ્લાન્ટને નિશાન બનાવવામાં આવી શકે છે. અમેરિકા-ઇઝરાયલી હુમલા પછી મધ્ય પૂર્વમાં વીસમા દિવસે પણ ભયંકર યુદ્ધ ચાલુ છે. ઇરાનના ટોચના નેતૃત્વને નોંધપાત્ર નુકસાન થયું છે, પરંતુ તેહરાન ખાડી અને ઇઝરાયલમાં યુએસ બેઝ પર મિસાઇલો છોડવાનું ચાલુ રાખે છે. ઇઝરાયલ હવાઈ હુમલા પણ કરી રહ્યું છે. મધ્ય પૂર્વમાં ચાલી રહેલ યુદ્ધ હવે ફક્ત લશ્કરી સંઘર્ષ નથી; છેલ્લા ૨૪ કલાકમાં, તે સીધું તેલ યુદ્ધ બની ગયું છે. ઉર્જા સ્થાપનો પર સીધા હુમલા થઈ રહ્યા છે, જેની અસર વિશ્વના ઘણા અન્ય પ્રદેશો પર પડી રહી છે. વૈશ્વિક તેલ પુરવઠો ખોરવાયો છે, જેના કારણે તેલના ભાવમાં તીવ્ર વધારો થયો છે.
મધ્ય પૂર્વના સંઘર્ષમાં એક મોટો વળાંક ત્યારે આવ્યો જ્યારે ઇઝરાયલે ઇરાનના દક્ષિણ પાર્સ ગેસ ક્ષેત્ર પર હુમલો કર્યો. અખાત સ્થિત આ ગેસ ક્ષેત્ર વિશ્વનું સૌથી મોટું છે. તે ઈરાન અને કતાર વચ્ચે વહેંચાયેલું છે. ઈરાની બાજુએ, તેને દક્ષિણ પાર્સ કહેવામાં આવે છે અને કતારની બાજુએ, તેને ઉત્તર ક્ષેત્ર કહેવામાં આવે છે.
