ભાજપના અખબારમાં મુસ્લિમ લીગના ગુણગાન સાથેનું આખુ પેજ છપાઈ ગયું : કેરળમાં બનેલી ઘટના
saurashtrabhoomi 
(એજન્સી) તિરુવનંતપુરમ તા.૨:
કેરળમાં ચોંકાવનારી ઘટના સામે આવી છે. જેમાં ભાજપ સમર્થક અખબાર જન્મભૂમિમાં મુસ્લિમ લીગના નેતાનું તંત્રી પાનું છપાઈ ગયું હતું, જેને જોઇને વાચકો પણ ચોંકી ઉઠયા હતા. આ ભૂલ હાલ તો રાજનીતિમાં ચર્ચાનું અને હાસ્યનું કેન્દ્ર બની છે. ઉત્તર કેરળના બે જિલ્લાઓ કોઝીકોડ અને કન્નુરમાં ‘‘જન્મભૂમિ‘‘ નું એડિટોરિયલ પેજ આખેઆખું બદલાઈ ગયું હતું. પૃષ્ઠ પરનો મુખ્ય લેખ મુસ્લિમ લીગ કેરળના વડા સૈયદ સાદિકલી શિહાબ થંગલનો હતો, જેમાં તેમણે વર્ષ ૨૦૨૫ ની સમીક્ષા કરી હતી. અન્ય અગ્રણી મુસ્લિમ લીગ નેતાઓ, એમ.કે. મુનીર અને મોહમ્મદ શાહના લેખો પણ તે જ પેજ પર જોવા મળ્યા હતા. વળી આટલું જ નહિ પણ જે તંત્રી લેખ છપાયો હતો તે પણ મુસ્લિમ લીગના મુખપત્ર, ‘‘ચંદ્રિકા‘‘ માંથી જ હતો, જે તાજેતરની સ્થાનિક સંસ્થાઓની ચૂંટણીઓમાં ન્ડ્ઢહ્લ ના વિઘટન પર કેન્દ્રિત હતો.
મીડિયા અહેવાલ અનુસાર, આ કોઈ જાણી જોઇને કરવામાં આવેલી રાજકીય ચાલ ન હતી, પરંતુ એક તકનીકી અને માનવીય ભૂલ હતી. ‘જન્મભૂમિ‘ અને ‘ચંદ્રિકા‘ સહિત અનેક સમાચાર પત્રોની ‘પ્લેટ્સ‘ એક જ પ્રાઈવેટ સેન્ટર પર તૈયાર કરવામાં આવે છે. છાપકામની પ્રક્રિયા દરમિયાન ભૂલથી ‘ચંદ્રિકા‘નું તંત્રી પાનું ‘જન્મભૂમિ‘ના પ્રિન્ટિંગ સેક્શનમાં જતું રહ્યું, જેના કારણે હજારો નકલો મુસ્લિમ લીગના કન્ટેન્ટ સાથે છપાઈ ગઈ.
