દ્વારકામાં બોગસ દસ્તાવેજના આધારે મોટું જમીન કૌભાંડ ઝડપાયું
saurashtrabhoomi 
(પ્રતિનિધિ દ્વારા)
દ્વારકા તા.૧૦
દ્વારકા તાલુકાના વરવાળા ગામે એક જમીન કૌભાંડનો પર્દાફાશ થયો છે. પ્રાંત અધિકારી દ્વારા કરવામાં આવેલી તપાસમાં વેચાણ દસ્તાવેજમાં બનાવટી આધાર પુરાવાઓ રજૂ કરીને આ કૌભાંડ કરવામાં આવ્યું હોવાનું ખુલવા પામ્યું છે. આ પ્રકરણમાં દ્વારકા પોલીસે ત્રણ શખ્સોની અટકાયત કરી ત્રણ દિવસના રિમાન્ડ મેળવ્યા છે. દ્વારકા તાલુકાના વરવાળા ગામે સવા ચાર એકર જમીન વર્ષ ૧૯૬૦માં સરકાર દ્વારા ખાતેદાર ગોરધનદાસ કાલુમલને ફાળવવામાં આવી હતી, તે જમીનની માર્ચ ૨૦રપમાં દ્વારકાની કચેરીમાં વેચાણ દસ્તાવેજના આધારે નોંધણી કરવામાં આવી હતી. જેમાં વાંધા અરજી રજૂ થતાં પ્રાંત અધિકારી દ્વારા ઓનલાઈન ખરાઈ કરવામાં આવતા ચૂંટણી કાર્ડ બનાવટી હોવાનું જાહેર થયું હતું. જેથી સબ રજિસ્ટ્રાર નરેશભાઈ કરમટા દ્વારા પોલીસ મથકમાં ફરિયાદ નોંધાવવામાં આવતા પોલીસે આરોપી દ્વારકાના નરસંગ ટેકરી વિસ્તારના રહીશ ભગવાનજી રામચંદ્રભાઈ જોશી (ઉ.વ.૬૦) અને ભીમરાણા ગામના રાજા વજા ઉર્ફે વેજા ખાંભલા તેમજ ટીવી સ્ટેશન વિસ્તારમાં રહેતા કિશન રજનીકાંત અસવાર નામના ત્રણ શખ્સો સામે ગુનો નોંધી, ત્રણેયની અટકાયત કરી રિમાન્ડ પર લીધા છે. જેમાં આરોપી રાજા ખાંભલા અને કિશન અસવારે દસ્તાવેજ નોંધણી વખતે વેચાણ આપનારને તેઓ ઓળખતા હોય અને દસ્તાવેજમાં જણાવેલા નામવાળા જ વ્યક્તિ હોવાનું જણાવી ખોટી ઓળખ આપ્યાનો ગુનો દાખલ કરાયો છે. વધુ તપાસ દ્વારકાના પી.આઈ.એ.એલ. બારસીયા ચલાવી રહ્યા છે.
