આલિયા ભટ્ટની ‘ડાર્લિંગ્સ’ ફેમ અભિનેત્રી દિવ્યા વિનકરનું 40 વર્ષની વયે અચાનક નિધન
ફિલ્મમાં લેડી કોન્સ્ટેબલનું પાત્ર ભજવી જાણીતી બનેલી અભિનેત્રીના અણધાર્યા અવસાનથી બોલિવૂડ સ્તબ્ધ; આરજે રોહિણીએ ભાવુક પોસ્ટ શેર કરી આપી માહિતી
saurashtrabhoomi 
મુંબઈ, તા.૨૨
બોલિવૂડ અને મનોરંજન જગતમાંથી એક અત્યંત આઘાતજનક અને દુઃખદ સમાચાર સામે આવ્યા છે. આલિયા ભટ્ટ અભિનીત લોકપ્રિય ફિલ્મ ‘ડાર્લિંગ્સ’માં મહિલા કોન્સ્ટેબલની ભૂમિકા ભજવનાર પ્રતિભાશાળી અભિનેત્રી દિવ્યા વિનકરનું માત્ર 40 વર્ષની વયે આકસ્મિક અવસાન થયું છે. આ અણધાર્યા નિધનના સમાચાર સામે આવતાં જ ફિલ્મ ઈન્ડસ્ટ્રી, સાથી કલાકારો અને ચાહકોમાં ઘેરા શોકની લાગણી પ્રસરી ગઈ છે.
દિવ્યા વિનકરના નિધનની માહિતી તેમની અત્યંત નજીકની મિત્ર અને જાણીતી રેડિયો જોકી (RJ) રોહિણી રામનાથને સોશિયલ મીડિયા પ્લેટફોર્મ પર એક ભાવુક પોસ્ટ દ્વારા આપી હતી. રોહિણીએ ઈન્સ્ટાગ્રામ પર લખ્યું હતું કે દિવ્યાનું જવું અત્યંત આકસ્મિક અને ક્યારેય ન પુરી શકાય તેવી ખોટ સમાન છે. તેમણે દિવ્યાને સ્નેહપૂર્વક ‘DV’ તરીકે સંબોધતાં જણાવ્યું કે તે અંગત અને વ્યાવસાયિક બંને મોરચે એક મજબૂત આધારસ્તંભ હતી. તેનું સમર્પણ, દયાળુ સ્વભાવ અને સમજણ તેને અન્યોથી તદ્દન અલગ બનાવતા હતા. આ સાથે જ રોહિણીએ આ દુઃખદ ઘડીમાં દિવ્યાના પરિવારની પ્રાઇવસીનું સન્માન કરવા જાહેર અપીલ પણ કરી હતી.
વર્ષ 2022માં નેટફ્લિક્સ પર રિલીઝ થયેલી ફિલ્મ ‘ડાર્લિંગ્સ’માં દિવ્યા વિનકરે ભજવેલા લેડી કોન્સ્ટેબલના પાત્રને દર્શકો તરફથી વિશેષ પ્રશંસા મળી હતી. જસ્મીત કે. રીન દ્વારા દિગ્દર્શિત આ ફિલ્મમાં આલિયા ભટ્ટ, શેફાલી શાહ, વિજય વર્મા અને રોશન મેથ્યુ જેવા દિગ્ગજ કલાકારો મુખ્ય ભૂમિકામાં હતા. આ ઉપરાંત દિવ્યા વિદ્યા બાલન અને શેફાલી શાહ અભિનીત ચર્ચિત ફિલ્મ ‘જલસા’ (2022)ના સ્ક્રીન ક્રેડિટ્સમાં પણ સામેલ હતી. જોકે તેણે મોટા પડદા પર મર્યાદિત પ્રોજેક્ટ્સમાં કામ કર્યું હતું, પરંતુ પોતાની સહજ અભિનયશૈલીથી દર્શકોના દિલમાં આગવી છાપ છોડી હતી.
અભિનય ઉપરાંત દિવ્યા વિનકર એક બહુમુખી પ્રતિભા ધરાવતી કલાકાર હતી. તે ડિજિટલ કન્ટેન્ટ ક્રિએટર, ફ્રીલાન્સ રાઈટર અને કવયિત્રી પણ હતી. મનોરંજન ક્ષેત્રે પ્રવેશતાં પહેલાં તેણે લગભગ એક દાયકા સુધી ડિજિટલ માર્કેટિંગ ક્ષેત્રે સફળ કારકિર્દી બનાવી હતી. ત્યારબાદ વર્ષ 2018થી તેણે પર્ફોર્મિંગ આર્ટ્સમાં ઝંપલાવ્યું અને અભિનયની સાથોસાથ લેખનકાર્યમાં પણ સતત સક્રિય રહી હતી.
અભિનેત્રીના નિધન પાછળનું ચોક્કસ કારણ હજુ સુધી સત્તાવાર રીતે સામે આવ્યું નથી. જોકે, માત્ર 40 વર્ષની નાની વયે તેના આકસ્મિક વિદાયથી સમગ્ર સિનેમા જગત અને કલાકારો ઊંડા આઘાતમાં સરી પડ્યા છે.
