SIR અને મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે INDIA ગઠબંધનનું શક્તિપ્રદર્શન; રાહુલે કહ્યું, 'આ શિવજીની જાન છે, કોઈપણ જોડાઈ શકે'; દિલ્હીમાં કડક સુરક્ષા વચ્ચે 6 મેટ્રો સ્ટેશન બંધ, CJIએ કાયદાકીય પ્રક્રિયા દ્વારા કોર્ટમાં રજૂઆત કરવા જણાવ્યું

નવી દિલ્હી તા.12
દેશની રાજધાની દિલ્હીમાં મતદાર યાદીની વિશેષ સઘન સુધારણા પ્રક્રિયા (SIR) અને મુખ્ય ચૂંટણી કમિશનર જ્ઞાનેશ કુમાર સામે વિપક્ષનું આંદોલન વધુ ઉગ્ર બન્યું છે. સોમવાર, 12 ઓક્ટોબરના રોજ લોકસભામાં વિપક્ષના નેતા રાહુલ ગાંધીના નેતૃત્વમાં INDIA ગઠબંધનના નેતાઓએ સુપ્રીમ કોર્ટ તરફ માર્ચ યોજી હતી. મતદાર યાદીમાં કથિત ગેરરીતિઓ, મતચોરીના આક્ષેપો અને મુખ્ય ચૂંટણી કમિશનરના રાજીનામાની માંગ સાથે વિપક્ષે આ વિરોધ પ્રદર્શન યોજ્યું હતું. દરમિયાન સુપ્રીમ કોર્ટે કોંગ્રેસના 10થી 15 સભ્યોના પ્રતિનિધિમંડળને કોર્ટ પરિસરના ફાઇલિંગ કાઉન્ટર સુધી જઈ અરજી દાખલ કરવાની મંજૂરી આપી હોવાનું સામે આવ્યું છે. જોકે, મુખ્ય ન્યાયાધીશ સાથે સીધી મુલાકાત માટે વિપક્ષને મંજૂરી આપવામાં આવી નથી. 
રાહુલ ગાંધી સહિત વિપક્ષના નેતાઓ કૉન્સ્ટિટ્યુશન ક્લબથી બસ મારફતે બારાખંભા રોડ તરફ રવાના થયા હતા. ત્યાંથી સુપ્રીમ કોર્ટ સુધી માર્ચ યોજવાનું આયોજન કરવામાં આવ્યું હતું. આ વિરોધ પ્રદર્શન દરમિયાન કોંગ્રેસ સહિત INDIA ગઠબંધનના નેતાઓએ ચૂંટણી પ્રક્રિયામાં પારદર્શિતા જાળવવાની અને મતદાર યાદીમાં થયેલી કથિત ગેરરીતિઓની તપાસ કરવાની માંગ ઉઠાવી હતી. વિપક્ષનો આરોપ છે કે SIR પ્રક્રિયાના કારણે મોટી સંખ્યામાં પાત્ર મતદારોના નામ યાદીમાંથી દૂર થઈ રહ્યા છે, જે લોકશાહી અને મતાધિકાર માટે ગંભીર પ્રશ્ન છે. જોકે, ચૂંટણી પંચ અને ભાજપે આ આરોપોને નકારી કાઢ્યા છે અને મતદાર યાદીની સુધારણા પ્રક્રિયાને અયોગ્ય તથા ડુપ્લિકેટ નામો દૂર કરવા માટે જરૂરી ગણાવી છે. 
માર્ચ પહેલાં રાહુલ ગાંધીએ પત્રકારો સાથેની વાતચીતમાં આંદોલન અંગે મહત્વપૂર્ણ નિવેદન આપ્યું હતું. તેમણે વિરોધ પ્રદર્શનની સરખામણી ભગવાન શિવની જાન સાથે કરતાં જણાવ્યું હતું કે આ શિવજીની બારાત છે અને તેમાં કોઈપણ વ્યક્તિ જોડાઈ શકે છે. તેમણે આ આંદોલનને બંધારણ અને લોકશાહીના રક્ષણ માટેની લડત ગણાવી હતી. રાહુલે વધુમાં જણાવ્યું હતું કે આ સંઘર્ષ કોઈ એક દિવસ કે એક કાર્યક્રમ પૂરતો મર્યાદિત નથી અને જરૂરી બનશે તો લાંબા સમય સુધી લડત ચાલુ રાખવામાં આવશે. તેમણે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ પણ ફરી દોહરાવી હતી. 
મુખ્ય ચૂંટણી કમિશનર જ્ઞાનેશ કુમાર સાથે વાતચીત અંગે પૂછાયેલા સવાલના જવાબમાં રાહુલ ગાંધીએ જણાવ્યું હતું કે તેમના તરફથી સંદેશાઓ આવતા રહે છે અને તેઓ આ પત્રકાર પરિષદ પણ જોઈ રહ્યા હશે. રાહુલે કેન્દ્ર સરકાર પર ચૂંટણી પંચના વડાને રાજકીય રક્ષણ આપવાનો આક્ષેપ કર્યો હતો. તેમણે જણાવ્યું હતું કે ચૂંટણી પ્રક્રિયા અંગે ઊભા થયેલા સવાલોનો જવાબ મળવો જોઈએ અને લોકશાહીમાં મતદારોના અધિકારોનું રક્ષણ થવું જોઈએ. 
દરમિયાન વિપક્ષના નેતાઓએ સુપ્રીમ કોર્ટના મુખ્ય ન્યાયાધીશ સૂર્યકાંત સાથે મુલાકાત કરવા માટે રવિવારે પત્ર લખ્યો હતો. લોકસભામાં વિપક્ષના નેતા રાહુલ ગાંધી અને રાજ્યસભામાં વિપક્ષના નેતા મલ્લિકાર્જુન ખડગેએ સોમવારે સાંજે 4થી 5 વાગ્યા દરમિયાન મુલાકાતનો સમય માંગ્યો હતો. આ મુલાકાત દરમિયાન SIR, મતચોરીના કથિત આક્ષેપો, ચૂંટણી પંચની કામગીરી અને દિલ્હીમાં વિરોધ પ્રદર્શન દરમિયાન પોલીસ કાર્યવાહી સહિતના મુદ્દાઓ પર આવેદનપત્ર રજૂ કરવાની યોજના હતી. જોકે, મુખ્ય ન્યાયાધીશે સીધી મુલાકાતની વિનંતી સ્વીકારી નહોતી. 
મુખ્ય ન્યાયાધીશ સૂર્યકાંતે સ્પષ્ટ કર્યું હતું કે વિપક્ષ દ્વારા ઉઠાવવામાં આવેલા કેટલાક મુદ્દાઓ પહેલેથી જ સુપ્રીમ કોર્ટમાં ન્યાયિક વિચારણા હેઠળ છે. આવી સ્થિતિમાં વહીવટી સ્તરે મુલાકાત કરીને નિર્ણય લેવો યોગ્ય નથી. તેમણે જણાવ્યું હતું કે સુપ્રીમ કોર્ટના દરવાજા સામાન્ય નાગરિકોથી લઈને ચૂંટાયેલા જનપ્રતિનિધિઓ સુધી સૌ માટે ખુલ્લા છે. કોઈપણ વ્યક્તિ કાયદાકીય પ્રક્રિયા અનુસરી અરજી દાખલ કરી શકે છે અને કોર્ટ તેની સુનાવણી કાયદા મુજબ કરશે. સંબંધિત કેટલાક મુદ્દાઓ પર મંગળવાર, 13 ઓક્ટોબરે સુનાવણી નિર્ધારિત હોવાનું પણ સામે આવ્યું છે. 
વિપક્ષની માર્ચને ધ્યાનમાં રાખીને દિલ્હી પોલીસ દ્વારા રાજધાનીના સંવેદનશીલ વિસ્તારોમાં સુરક્ષા વ્યવસ્થા વધુ સઘન બનાવવામાં આવી હતી. સુપ્રીમ કોર્ટ તરફ જતા માર્ગો અને મહત્વના વિસ્તારોમાં પોલીસ દળ તૈનાત કરવામાં આવ્યું હતું. વિરોધ પ્રદર્શનના પગલે દિલ્હીના છ મેટ્રો સ્ટેશન બંધ રાખવામાં આવ્યા હતા અને કેટલાક માર્ગો પર વાહનવ્યવહાર નિયંત્રિત કરવામાં આવ્યો હતો. સુરક્ષા વ્યવસ્થાના ભાગરૂપે વોટર કેનન સહિતની તૈયારીઓ પણ કરવામાં આવી હતી. અગાઉના વિરોધ પ્રદર્શનો દરમિયાન મોટી સંખ્યામાં કાર્યકરોની અટકાયત કરવામાં આવી હોવાના અહેવાલો વચ્ચે સોમવારની માર્ચને લઈને પોલીસ તંત્ર સતર્ક બન્યું હતું. 
આ સમગ્ર વિવાદમાં એક તરફ વિપક્ષ ચૂંટણી પ્રક્રિયામાં ગેરરીતિના આક્ષેપો સાથે મુખ્ય ચૂંટણી કમિશનરના રાજીનામાની માંગ કરી રહ્યો છે, તો બીજી તરફ ચૂંટણી પંચ અને ભાજપ આ આરોપોને નકારી રહ્યા છે. હવે સુપ્રીમ કોર્ટમાં વિપક્ષ દ્વારા કરવામાં આવનારી કાયદાકીય રજૂઆત અને સંબંધિત અરજીઓની સુનાવણી પર રાજકીય વર્તુળોની નજર કેન્દ્રિત થઈ છે. સુપ્રીમ કોર્ટના મુખ્ય ન્યાયાધીશે પણ સ્પષ્ટ કર્યું છે કે રાજકીય વિરોધ અને ન્યાયિક પ્રક્રિયા વચ્ચેનો ભેદ જાળવવો જરૂરી છે અને કોઈપણ મુદ્દાનો નિર્ણય કાયદા તથા બંધારણીય જોગવાઈઓના આધારે જ કરવામાં આવશે.