‘ટોક્સિક’ બાદ તારા સુતરિયાનો વીડિયો વાયરલ, નજીક આવેલા કેમેરાને હડસેલી આગળ વધી અભિનેત્રી
પાપારાઝી સાથેની ઘટના બાદ સોશિયલ મીડિયા પર મિશ્ર પ્રતિક્રિયા; કેટલાકે કરી ટીકા તો ચાહકોએ ‘પર્સનલ સ્પેસ’નો મુદ્દો ઉઠાવી કર્યો બચાવ
saurashtrabhoomi 
મુંબઈ, તા.૧૧
અભિનેત્રી તારા સુતરિયાનો મુંબઈનો એક વીડિયો સોશિયલ મીડિયા પર વાયરલ થઈ રહ્યો છે. વીડિયોમાં તારા એક સ્ટોરમાં પ્રવેશ કરતી વખતે તેની ખૂબ નજીક આવેલા કેમેરાને હાથથી હડસેલીને આગળ વધતી જોવા મળે છે. આ ઘટના બાદ સોશિયલ મીડિયા પર તેના વર્તનને લઈને અલગ-અલગ પ્રતિક્રિયાઓ સામે આવી રહી છે.
વાયરલ વીડિયોમાં તારા સફેદ રંગના આઉટફિટ અને બ્લેક સનગ્લાસમાં જોવા મળે છે. સ્ટાફ દ્વારા રાખવામાં આવેલી છત્રી નીચે તે સ્ટોરના પ્રવેશદ્વાર તરફ જઈ રહી હતી ત્યારે એક કેમેરાપર્સન અચાનક તેની ખૂબ નજીક આવી જાય છે. આ દરમિયાન તારા કેમેરાને હાથથી દૂર કરીને સ્ટોર તરફ આગળ વધી જાય છે. આસપાસ હાજર અન્ય પાપારાઝી પણ તસવીરો માટે તેનું નામ બોલાવતા સંભળાય છે.
આ ઘટનાને તારા સુતરિયાની તાજેતરની ફિલ્મ ‘ટોક્સિક’ના બોક્સ ઓફિસ પ્રદર્શન સાથે જોડીને પણ સોશિયલ મીડિયા પર કેટલાક યુઝર્સે પ્રતિક્રિયા આપી છે. જોકે તારા દ્વારા આ ઘટના અંગે કોઈ નિવેદન આપવામાં આવ્યું નથી અને વાયરલ વીડિયોના આધારે તેના વર્તનને ફિલ્મના પ્રદર્શનથી થયેલી કથિત નિરાશા સાથે સીધું જોડતું કોઈ સત્તાવાર પ્રમાણ સામે આવ્યું નથી.
બીજી તરફ તારાના કેટલાક ચાહકો તેના સમર્થનમાં આવ્યા છે. તેમનું કહેવું છે કે કેમેરાપર્સન અભિનેત્રીની પર્સનલ સ્પેસની ખૂબ નજીક પહોંચી ગયો હતો અને આવી સ્થિતિમાં તારાની પ્રતિક્રિયાને તેના ગુસ્સા કે હતાશા સાથે જોડવી યોગ્ય નથી. કેટલાક સોશિયલ મીડિયા યુઝર્સે પાપારાઝી દ્વારા સેલિબ્રિટીઝની ખૂબ નજીક જઈને ફોટો કે વીડિયો લેવાની રીત સામે પણ સવાલ ઉઠાવ્યા છે.
‘ટોક્સિક’માં તારા સુતરિયા યશ સાથે જોવા મળી છે અને ફિલ્મથી તેની કારકિર્દીને નવી ગતિ મળશે તેવી ચર્ચા અગાઉથી થતી રહી હતી. હવે વાયરલ થયેલા આ વીડિયોને લઈને સોશિયલ મીડિયા પર ચર્ચા શરૂ થઈ છે, પરંતુ તારા સુતરિયાએ સમગ્ર મામલે હજુ સુધી કોઈ સત્તાવાર પ્રતિક્રિયા આપી નથી.
){kind=small}
