'તનુ વેડ્સ મનુ ૩'માં જૂની જોડી યથાવત્, માધવન અને કંગના વિના ફિલ્મ નહીં બને: આનંદ એલ. રાય
નવી સ્ટારકાસ્ટની ચર્ચાઓ વચ્ચે દિગ્દર્શકે સ્પષ્ટતા કરી; ત્રીજા જ નહીં, ચોથા અને પાંચમા ભાગમાં પણ બંને કલાકારો જરૂરી હોવાનું જણાવ્યું
saurashtrabhoomi 
મુંબઈ, તા. ૩
'તનુ વેડ્સ મનુ ૩'માં નવી સ્ટારકાસ્ટ જોવા મળશે તેવી ચર્ચાઓ વચ્ચે ફિલ્મના દિગ્દર્શક આનંદ એલ. રાયે સ્પષ્ટતા કરી છે કે આર. માધવન અને કંગના રનૌત વિના આ ફિલ્મ બની શકે નહીં. તેમના મતે ફિલ્મનો ત્રીજો જ નહીં, પરંતુ ચોથો કે પાંચમો ભાગ બને તો પણ આ બંને કલાકારોનો સમાવેશ જરૂરી છે.
પીટીઆઈ સાથેની વાતચીતમાં આનંદ એલ. રાયે જણાવ્યું હતું કે માધવન વિના 'તનુ વેડ્સ મનુ'ની કલ્પના શક્ય નથી. તેમણે કહ્યું કે ફિલ્મનો ત્રીજો, ચોથો કે પાંચમો ભાગ બને તો તેમાં માધવન અને કંગના જ જોવા મળશે. આ નિવેદન સાથે તેમણે ફિલ્મની ત્રીજી કડીમાં નવી સ્ટારકાસ્ટ હોવાની અટકળો પર સ્પષ્ટતા કરી છે.
અગાઉ એવી ચર્ચા હતી કે 'તનુ વેડ્સ મનુ ૩' નવી સ્ટારકાસ્ટ અને સ્વતંત્ર વાર્તા સાથે બનાવવામાં આવશે. આ ઉપરાંત આનંદ એલ. રાયે ફિલ્મ ઉદ્યોગમાં વારંવાર બદલાતા ટ્રેન્ડ અંગે પણ પોતાના વિચારો રજૂ કર્યા હતા. તેમના જણાવ્યા અનુસાર, નિર્માતાઓએ પોતાની શક્તિ અને વિશેષતા ઓળખવી જોઈએ. એક જ પ્રકારનું કામ વારંવાર કરવું યોગ્ય નથી, પરંતુ જે ક્ષેત્રમાં પોતાની પકડ હોય તેમાં નવી શક્યતાઓ શોધવી જરૂરી છે.
ઉલ્લેખનીય છે કે વર્ષ ૨૦૧૧માં રિલીઝ થયેલી 'તનુ વેડ્સ મનુ'માં આર. માધવન અને કંગના રનૌત મુખ્ય ભૂમિકામાં હતાં. આ ફિલ્મે બોક્સ ઓફિસ પર સફળતા મેળવી હતી. ત્યારબાદ વર્ષ ૨૦૧૫માં આવેલી 'તનુ વેડ્સ મનુ રિટર્ન્સ'માં કંગનાએ ડબલ રોલ ભજવ્યો હતો. આ ફિલ્મે વિશ્વભરમાં ૨૫૦ કરોડ રૂપિયાથી વધુની કમાણી કરી હતી અને હિન્દી સિનેમાની સફળ મહિલા-કેન્દ્રિત ફિલ્મોમાં સ્થાન મેળવ્યું હતું.
