ડોલર સામે રૂપિયો 96.22ની ઐતિહાસીક નીચી સપાટીએ પહોંચ્યો
saurashtrabhoomi 
(એજન્સી) નવી દિલ્હી તા.18:
વૈશ્વિક આર્થિક મોરચે ભારત માટે ચિંતાજનક સમાચાર સામે આવ્યા છે. સોમવારે ડૉલર સામે ભારતીય રૂપિયો અત્યાર સુધીની સૌથી નીચલી ઐતિહાસિક સપાટીએ પહોંચી ગયો છે. મધ્ય પૂર્વમાં ચાલી રહેલા ઇરાન યુદ્ધના કારણે ક્રૂડ ઓઇલ અને ઉર્જાના ભાવમાં સતત વધારો થઇ રહ્યો છે, જેને પગલે વૈશ્વિક બોન્ડ યીલ્ડમાં મોટો ઉછાળો આવ્યો છે. આ વૈશ્વિક પરિસ્થિતિઓની સીધી અસર દુનિયાના ત્રીજા સૌથી મોટા ક્રૂડ આયાતકાર દેશ ભારત પર જોવા મળી રહી છે.
સોમવારે કારોબાર દરમિયાન રૂપિયો 0.3 ટકા જેટલો તૂટીને ડૉલર સામે 96.2275 ના સ્તરે પહોંચી ગયો હતો, જે અત્યાર સુધીનો સૌથી મોટો ઘટાડો છે. ચાલુ વર્ષ 2026માં એશિયાના દેશોમાં સૌથી નબળું પ્રદર્શન કરનાર ભારતીય ચલણ સતત પાંચમા સત્રમાં રેકોર્ડ નીચલી સપાટીએ બંધ રહ્યું છે. ઇરાન યુદ્ધની શરૂઆત થઈ ત્યારથી અત્યાર સુધીમાં રૂપિયાના મૂલ્યમાં 5.5 ટકાનો મોટો ઘટાડો નોંધાયો છે.
બજારના નિષ્ણાતો અને ટ્રેડર્સના જણાવ્યા અનુસાર, જો રિઝર્વ બેંક દ્વારા ડૉલરના વેચાણની દરમિયાનગીરી કરવામાં ન આવી હોત તો રૂપિયામાં આનાથી પણ વધુ મોટો કડાકો જોવા મળ્યો હોત. રૂપિયાને ટેકો આપવા માટે ભારતીય નીતિ નિર્માતાઓ દ્વારા કેટલાક કડક નિયમનકારી પગલાં પણ લેવામાં આવ્યા છે, જેમાં તાજેતરમાં જ ચાંદીની મોટાભાગની આયાત પર પ્રતિબંધો લાદવાનો સમાવેશ થાય છે. બેંક ઓફ અમેરિકા ગ્લોબલ રિસર્ચના વિશ્લેષકોના મતે, આગામી સમયમાં જો ક્રૂડ ઓઇલના ભાવ આ જ રીતે ઊંચા રહેશે તો 2026ના મધ્ય સુધીમાં રૂપિયો હજુ વધુ નબળો પડીને 96 અને વર્ષના અંત સુધીમાં 98 ના સ્તરે પહોંચી શકે છે.
