પાંચ હજાર રૂપિયા લઈને મુંબઈ આવેલા સુવિંદર વિક્કીની ૫૦ વર્ષની ઉંમરે બદલાઈ કિસ્મત
વર્ષો સુધી નાના-મોટા રોલ માટે સંઘર્ષ કર્યા બાદ ‘કોહરા’ અને ‘આવારાપન ૨’થી મળી મોટી ઓળખ
saurashtrabhoomi 
મુંબઈ, તા. ૨૦
મુંબઈમાં ફિલ્મી દુનિયામાં નામ બનાવવાનું સપનું લઈને દર વર્ષે અનેક લોકો આવે છે, પરંતુ લાંબા સંઘર્ષ બાદ સફળતા મેળવનારા કલાકારોની કહાની હંમેશા પ્રેરણાદાયી રહે છે. અભિનેતા સુવિંદર વિક્કીની સફર પણ આવી જ છે. આજે તેઓ પોતાના અભિનય માટે જાણીતા છે, પરંતુ આ સ્થાન સુધી પહોંચવા માટે તેમણે વર્ષો સુધી મુશ્કેલીઓનો સામનો કર્યો છે.
પંજાબના સામાન્ય પરિવારમાં જન્મેલા સુવિંદર વિક્કીને નાનપણથી જ અભિનય પ્રત્યે રસ હતો. તેમણે પટિયાલાની પંજાબી યુનિવર્સિટીમાંથી થિયેટર અને ટેલિવિઝનમાં માસ્ટર ડિગ્રી મેળવી હતી. અભિનયને જ કારકિર્દી બનાવવાના સપના સાથે તેઓ મુંબઈ પહોંચ્યા હતા, પરંતુ અહીં શરૂઆતનો સમય તેમના માટે સરળ રહ્યો નહોતો.
સુવિંદરે એક ઇન્ટરવ્યૂમાં જણાવ્યું હતું કે એક નાટકમાંથી મળેલા માત્ર પાંચ હજાર રૂપિયા લઈને તેઓ મુંબઈ આવ્યા હતા. જોકે, શહેરમાં રહેવા અને જીવનનિર્વાહના ખર્ચને કારણે આ રકમ થોડા જ સમયમાં પૂરી થઈ ગઈ. આર્થિક મુશ્કેલી એટલી વધી ગઈ હતી કે ખાવા-પીવા માટે પણ મુશ્કેલીનો સામનો કરવો પડ્યો. અંતે તેમને થોડા સમય માટે ફરી પંજાબ પરત ફરવું પડ્યું હતું.
સંઘર્ષના દિવસોમાં તેમણે ગુજરાન ચલાવવા માટે ઇન્સ્યુરન્સ પોલિસી વેચવાનું કામ પણ કર્યું હતું. જોકે, આ મુશ્કેલીઓ વચ્ચે તેમણે અભિનય છોડ્યો નહીં. વર્ષ ૨૦૦૪માં ‘દેશ હોગા પરદેસ’ ફિલ્મથી તેમની ફિલ્મી સફરની શરૂઆત થઈ. ત્યારબાદ લાંબા સમય સુધી પંજાબી ફિલ્મોમાં વિવિધ પાત્રો ભજવ્યા. શરૂઆતમાં તેમને મોટાભાગે કાકા, મામા કે અન્ય સહાયક ભૂમિકાઓ મળતી હતી.
હિન્દી સિનેમામાં પણ તેમણે ધીમે ધીમે પોતાની હાજરી નોંધાવી. ‘ઉડતા પંજાબ’ અને ‘કેસરી’ જેવી ફિલ્મોમાં નાના પાત્રોમાં જોવા મળેલા સુવિંદર માટે વેબ સિરીઝ ‘કોહરા’ ખાસ મહત્વપૂર્ણ સાબિત થઈ. આ સિરીઝમાં તેમના અભિનય અને ગ્રે શેડવાળા પાત્રની દર્શકો તેમજ સમીક્ષકોએ પ્રશંસા કરી હતી. ‘કોહરા’ બાદ તેમની ઓળખ વધુ મજબૂત બની અને તેઓ મોટા વર્ગના દર્શકો સુધી પહોંચ્યા.
હવે સુવિંદર વિક્કી ઇમરાન હાશમીની ‘આવારાપન ૨’ની સફળતાનો આનંદ માણી રહ્યા છે. ફિલ્મમાં તેમના અભિનયને પણ દર્શકોનું ધ્યાન મળ્યું છે. ખાસ વાત એ છે કે જે કલાકાર એક સમયે માત્ર પાંચ હજાર રૂપિયા લઈને મુંબઈ આવ્યો હતો, તેણે પાંચ દાયકાની ઉંમરે પોતાની કારકિર્દીમાં એક મહત્વપૂર્ણ સ્થાન બનાવ્યું છે.
સુવિંદરની સફર દર્શાવે છે કે ફિલ્મ ઉદ્યોગમાં સફળતા હંમેશા ઝડપથી મળતી નથી. વર્ષોની મહેનત, સતત સંઘર્ષ અને પોતાની કળા પર વિશ્વાસ રાખવાથી મોડે મળેલી સફળતા પણ ખૂબ ખાસ બની શકે છે.
)
