માતા-પિતા બંનેએ પ્યુનની નોકરી કરી અને તેમના બંને સંતાનોને ગવર્મેન્ટમાં શિક્ષક બનાવ્યા : સમાજ માટે પ્રેરણા રૂપ કિસ્સો
saurashtrabhoomi 
(પ્રતિનિધિ દ્વારા)
જૂનાગઢ તા.૧
જૂનાગઢમાં વંથલી રોડ પર આવેલી સ્વ. ટી.એલ. વાળા કન્યા વિદ્યાલયમાં પ્યુન તરીકે નોકરી કરનાર બાલકૃષ્ણ મુકુન્દરાય ત્રિવેદી અને પુલકિત માધ્યમિક શાળામાં પ્યુન તરીકે નોકરી કરનાર કાશ્મીરાબેન બાલકૃષ્ણ ત્રિવેદી બંને તેમના બંને સંતાનો પુત્ર યસ અને પુત્રી મોહિની બંનેને ઉચ્ચ અભ્યાસ કરાવી પીટીસી બીએડ કરાવ્યું અને ટાટ અને ટેટ પરીક્ષામાં પણ ઊંચ ગુણાંક પ્રાપ્ત કરાવ્યા અને બંને માતા પિતાએ તેમના બંને સંતાનોને ગવર્મેન્ટમાં શિક્ષક તરીકે નિમણૂક અપાવી અને સમાજ માટે પ્રશંસનીય અને પ્રેરણાદાયી ઉદાહરણ પૂરૂ પાડ્યું છે. એવું કહેવાય છે કે જેમને ઉડવું છે તેમને ગગન મળી જ રહે છે આ ઉક્તિ તેમણે સાર્થક કરી બતાવી છે. બંને માતા પિતાએ સંયુક્ત કુટુંબમાં રહીને નોકરી કરવાની સાથે સાથે પણ તેમના સંતાનોને ઊંચ શિક્ષણ આપી અને તેમની ઉન્નત કારકિર્દીનું નિર્માણ કર્યું છે. દરેક માતા-પિતા માટે આ પ્રેરણા રૂપ પ્રસંગનું ઉદાહરણ તેમણે પૂરૂ પાડ્યું છે કે તમે ભલે ગમે તે વ્યવસાય કે નોકરી કરતા હોય પરંતુ તમારા સંતાનોને ઊંચ શિક્ષણ આપો અને તેમને તમે જ્યાં ઇચ્છો ત્યાં સુધી પહોંચાડી શકો છો આમાંથી દરેક માતા પિતાએ બોધપાઠ લેવો જોઈએ કે આપણે ભલે ગમે તે વ્યવસાય કે નોકરી કરતા હોય પરંતુ આપણા સંતાનોને ઊંચ શિક્ષણ આપી અને ઉચ્ચ સ્થાને આપણે અવશ્ય બેસાડી શકીએ છીએ યસ અને મોહિનીને બંને શાળા પરિવાર તરફથી અભિનંદન આપવામાં આવે છે. પણ વિશેષ અભિનંદન તો તેમના માતા-પિતાને છે કે તેમણે તેમના સંતાનો ઉચ્ચ કારકિર્દી બનાવવામાં જે યોગદાન આપ્યું છે. તે બદલ ટી.એલ. વાળા કન્યા વિદ્યાલય પરિવાર અને પુલકીત માધ્યમિક શાળા પરિવાર તરફથી ખુબ ખુબ શુભેચ્છાઓ અને અભિનંદન પાઠવવામાં આવે છે.
