પ્રખ્યાત યૂ-ટયુબર ધ્રુવ રાઠીને તેના નિવાસસ્થાનેથી જ કસ્ટડીમાં લઈ લેવાયો
saurashtrabhoomi 
દિલ્હી તા.૧૦ :
મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ દિલ્હીના જંતર મંતર ખાતે પ્રસ્તાવિત વિરોધ પ્રદર્શનમાં ભાગ લેવા માટે દિલ્હી પહોંચેલા પ્રખ્યાત યુટ્યુબર ધ્રુવ રાઠીની દિલ્હી અને ગુડગાઉં પોલીસ દ્વારા સંયુક્ત ઓપરેશન હાથ ધરીને ગુડગાઉંના એક રેસિડેન્શિયલ ફ્લેટમાંથી આજે સવારે અટકાયત કરવામાં આવી છે, તેમ ગુપ્તચર એજન્સીના સૂત્રો દ્વારા જણાવવામાં આવ્યું છે.
પ્રાપ્ત માહિતી અનુસાર, ધ્રુવ રાઠી ગુડગાઉંના સેક્ટર-૫૬ સ્થિત સેન્ટ્રલ પાર્ક વિહાર ફ્લેટમાં તેમના માતા-પિતા સાથે રોકાયા હતા. શુક્રવાર (૯ ઓક્ટોબર) મોડી રાતથી જ તેમના નિવાસસ્થાનની આસપાસ આશરે ૫૦ જેટલા પોલીસકર્મીઓ એકત્રિત થઈ ગયા હતા. આજે સવારે અંદાજે ૭:૪૮ વાગ્યે તેમના માતાએ દરવાજો ખોલ્યા બાદ દિલ્હી પોલીસના જવાનો ફ્લેટની અંદર પ્રવેશ્યા હતા અને ત્યારબાદ તેમને ગુડગાઉંમાં જ કોઈ અજ્ઞાત સ્થળે લઈ જવામાં આવ્યા હોવાનું મનાઈ રહ્યું છે.
આગામી વિરોધ પ્રદર્શનને ધ્યાનમાં રાખીને રાષ્ટ્રીય રાજધાનીમાં સુરક્ષા વ્યવસ્થા સઘન બનાવવામાં આવી છે અને પોલીસે જાહેર અવરજવર તથા વાહનવ્યવહાર પર પ્રતિબંધો લાદ્યા છે. આ પૂર્વે, શુક્રવારે ધ્રુવ રાઠીએ કર્તવ્ય પથ પરથી એક ઇન્સ્ટાગ્રામ વીડિયો પોસ્ટ કર્યો હતો, જેમાં તેમણે પ્રસ્તાવિત પ્રદર્શન અગાઉ લાદવામાં આવેલા વ્યાપક સુરક્ષા પ્રતિબંધો અને વાહનવ્યવહાર પરના નિયંત્રણો સામે સવાલો ઉઠાવ્યા હતા. આ પ્રતિબંધોમાં મધ્ય દિલ્હીના ભાગોમાં મેટ્રો સ્ટેશનો બંધ રાખવા, ટ્રેનો રદ કરવી અને મોબાઈલ ઇન્ટરનેટ સેવાઓ અસ્થાયી રૂપે સ્થગિત કરવા જેવા પગલાં સામેલ હોવાનું કહેવાય છે. આ અટકાયત દિલ્હીભરમાં ચાલી રહેલા વ્યાપક પોલીસ ઓપરેશનનો જ એક ભાગ હોવાનું માનવામાં આવે છે.
