ભારત સહિત અનેક દેશો પર ભયંકર દુષ્કાળ અને અસહ્ય ગરમીનો ખતરો
આગામી કેટલાક અઠવાડીયામાં સુપર અલનીનોનો અત્યંત ખતરનાક તબક્કો શરૂ થશે : ચોમાસુ વિલંબમાં પડતા ખેતીને ભારે નુકશાન થશે
saurashtrabhoomi 
(એજન્સી) નવી દિલ્હી,તા.3:
વૈશ્વિક ક્લાઈમેટ ચેન્જની ગંભીર અસરો વચ્ચે હવે ભારતીય ચોમાસા પર સંકટના વાદળો ઘેરાય ગયા છે. સંયુક્ત રાષ્ટ્ર (UN) અને વિશ્વ હવામાન વિજ્ઞાન સંગઠન (WMO)એ ચેતવણી જાહેર કરી છે કે આગામી થોડા જ અઠવાડિયામાં 'અલ નીનો' નો એક અત્યંત ખતરનાક તબક્કો શરૂ થવા જઈ રહ્યો છે. હવામાન એજન્સીઓના મતે આ વખતે આવી રહેલો અલ નીનો અત્યાર સુધીનો સૌથી શક્તિશાળી હોઈ શકે છે, જેને નિષ્ણાતો 'સુપર અલ નીનો' તરીકે ઓળખાવી રહ્યા છે. આ અસાધારણ ભૌગોલિક ઘટનાના કારણે વર્ષ 2026ના બાકીના મહિનાઓમાં વિશ્વભરમાં ભારે ઉથલપાથલ જોવા મળશે અને ભારત સહિત અનેક દેશોમાં ભયંકર દુષ્કાળ અને અસહ્ય ગરમીનો ખતરો વધી ગયો છે. મંગળવારે પ્રકાશિત થયેલા એક અપડેટમાં, વિશ્વ હવામાન સંગઠન (WMO) એ ચેતવણી આપી છે કે પેસિફિક મહાસાગરના ગરમ પાણીમાં ઝડપથી અલ નીનોનો વિકાસ થઈ રહ્યો છે. આનાથી વૈશ્વિક તાપમાન અને વરસાદની પેટર્ન પર ઊંડી અસર પડશે, અને આગામી મહિનાઓમાં હવામાનની ઘટનાઓમાં વધારો થવાનું જોખમ છે.
આ વર્ષે, તીવ્ર ગરમીએ ભારતમાં પરિસ્થિતિ વધુ ખરાબ કરી છે. વધુમાં, ચોમાસામાં પણ વિલંબ થયો છે. ભારતમાં, ચોમાસું ફક્ત હવામાનની ઘટના નથી, પરંતુ લાખો લોકોના જીવનની ધબકારા છે. પછી ભલે તે લીલાછમ ખેતરો હોય, ડેમોમાં પાણી હોય કે શહેરોમાં વીજળી ઉત્પાદન હોય, બધું ચોમાસાની ગતિ પર આધાર રાખે છે. પરંતુ આ વખતે, આકાશમાંથી આવતા સમાચાર ભય પેદા કરી રહ્યા છે.
