નાનકડી માલતીના ગાયત્રી મંત્રના જાપે જીત્યાં ચાહકોનાં દિલ
પ્રિયંકા ચોપરાની ચાર વર્ષની દીકરીએ માતાના ખોળામાં બેસીને કર્યો મંત્રોચ્ચાર, વેકેશનની તસવીરો અને વીડિયો સોશિયલ મીડિયા પર વાયરલ
મુંબઈ, તા. 20
બોલિવૂડથી લઈને હોલિવૂડ સુધી પોતાની ઓળખ બનાવનાર અભિનેત્રી પ્રિયંકા ચોપરા હાલમાં પોતાના પરિવાર સાથે વિતાવેલી યાદગાર પળોને કારણે ચર્ચામાં છે. પ્રિયંકાએ તાજેતરમાં વેકેશનની કેટલીક તસવીરો અને વીડિયો સોશિયલ મીડિયા પર શેર કર્યા છે. જોકે, આ પોસ્ટમાં સૌથી વધુ ધ્યાન તેની ચાર વર્ષની દીકરી માલતી મેરીએ ખેંચ્યું છે. માલતીએ પોતાના મીઠા અવાજમાં ગાયત્રી મંત્રનું પઠન કરતાં ચાહકોને આશ્ચર્યચકિત કરી દીધા છે.
પ્રિયંકા દ્વારા શેર કરવામાં આવેલા વીડિયોમાં માલતી તેની માતાના ખોળામાં બેસીને ઘરના પૂજાસ્થળ સામે ગાયત્રી મંત્ર બોલતી જોવા મળે છે. નાનકડી માલતી 'ૐ ભૂર્ભુવઃ સ્વઃ' શબ્દોથી મંત્રોચ્ચારની શરૂઆત કરે છે. આટલી નાની ઉંમરે તેને સુંદર રીતે મંત્ર બોલતી સાંભળીને સોશિયલ મીડિયા પર ચાહકો તેની પ્રશંસા કરી રહ્યા છે. વીડિયોમાં માતા અને દીકરી વચ્ચેનો પ્રેમ અને આત્મીયતા પણ સ્પષ્ટ જોવા મળે છે. વીડિયો પૂરો થતી વખતે પ્રિયંકા પણ આ ક્ષણને ખૂબ જ સુંદર ગણાવતી સંભળાય છે.
પ્રિયંકાએ પોતાની પોસ્ટમાં માત્ર આ વીડિયો જ નહીં, પરંતુ પરિવાર સાથે માણેલા વેકેશનની કેટલીક તસવીરો પણ શેર કરી છે. એક તસવીરમાં તે દીકરી માલતી સાથે કેમેરા સામે પોઝ આપતી જોવા મળે છે, જ્યારે અન્ય તસવીરમાં બંને દરિયાકિનારે આનંદ માણી રહ્યાં છે. માલતી બીચ પર રેતીમાંથી નાની-નાની કલાકૃતિઓ બનાવતી પણ નજરે પડે છે. આ તસવીરોમાં માતા-દીકરીની મસ્તી અને પરિવાર સાથે વિતાવેલી ખુશીની પળો જોવા મળે છે.
આ વેકેશન દરમિયાન પ્રિયંકાની માતા મધુ ચોપરા પણ પરિવાર સાથે જોવા મળી રહ્યાં છે. એક તસવીરમાં તેઓ દરિયાકિનારે આરામની પળો માણતાં નજરે પડે છે. પ્રિયંકાએ વ્યસ્ત કામકાજ વચ્ચે પરિવાર સાથે સમય પસાર કરીને આ યાદગાર ક્ષણોને સોશિયલ મીડિયા પર પોતાના ચાહકો સાથે વહેંચી છે.
પોસ્ટ શેર કરતી વખતે પ્રિયંકાએ જણાવ્યું હતું કે હાલ તે વ્યસ્ત હોવા છતાં એક સુંદર સ્થળે સમય વિતાવી રહી છે. સાથે જ તેણે પોસ્ટમાં 'માલતી' અને 'સાઉન્ડ ઑન'નો ઉલ્લેખ કરીને ચાહકોને વીડિયોનો અવાજ ચાલુ રાખીને સાંભળવાની સૂચના આપી હતી.
માલતીના ગાયત્રી મંત્રના આ વીડિયોને સોશિયલ મીડિયા પર સારો પ્રતિસાદ મળી રહ્યો છે. ચાહકો હાર્ટ અને પ્રેમ દર્શાવતા ઇમોજી સાથે પોતાની પ્રતિક્રિયાઓ આપી રહ્યા છે. નાનકડી માલતીના મંત્રોચ્ચાર અને તેની નિર્દોષ અભિવ્યક્તિએ ફરી એકવાર પ્રિયંકાના પરિવારની આ પોસ્ટને ચર્ચામાં લાવી દીધી છે.


