મુખ્યમંત્રી ભૂપેન્દ્ર પટેલની ઉપસ્થિતિમાં વાસણા બેરેજ ખાતે વૃક્ષારોપણ કાર્યક્રમ યોજાયો
saurashtrabhoomi 
મુખ્યમંત્રીશ્રી ભૂપેન્દ્ર પટેલની ઉપસ્થિતિમાં વાસણા બેરેજ ખાતે વૃક્ષારોપણ કાર્યક્રમનું આયોજન
અમદાવાદ: ગુજરાતના મુખ્યમંત્રી ભૂપેન્દ્ર પટેલની હાજરીમાં વાસણા બેરેજ કમ્પાઉન્ડ ખાતે એક વૃક્ષારોપણ કાર્યક્રમનું આયોજન કરવામાં આવ્યું હતું. આ પ્રસંગે, મુખ્યમંત્રીશ્રીએ પોતે 'એક પેડ માં કે નામ' અભિયાન અંતર્ગત વૃક્ષારોપણ કર્યું હતું.
આ કાર્યક્રમનું આયોજન એલિસબ્રિજના ધારાસભ્ય અમિતભાઈ શાહ દ્વારા તેમના દિવંગત સ્વજનોના સ્મરણાર્થે કરવામાં આવ્યું હતું. આ કાર્યક્રમ દરમિયાન 370 જેટલા વિવિધ પ્રકારના વૃક્ષોના રોપા વાવવામાં આવ્યા હતા.
કોરોનાકાળથી પર્યાવરણ સંરક્ષણની પહેલ:
ઉલ્લેખનીય છે કે, સિંચાઈ વિભાગ અને અમદાવાદ મ્યુનિસિપલ કોર્પોરેશનના સહયોગથી, ધારાસભ્ય અમિતભાઈ શાહે કોરોના મહામારી શરૂ થઈ ત્યારથી અત્યાર સુધીમાં વાસણા બેરેજ કમ્પાઉન્ડમાં આશરે 72,000 જેટલા વૃક્ષો વાવી તેનો ઉછેર કર્યો છે. આ એક પ્રશંસનીય કાર્ય છે, જે શહેરના પર્યાવરણને વધુ હરિયાળું બનાવવામાં મદદરૂપ બન્યું છે.
આજે યોજાયેલો કાર્યક્રમ ધારાસભ્યશ્રીના માતા-પિતા, અન્ય દિવંગત સ્વજનો અને તેમની પત્નીના સ્મરણાર્થે આયોજિત કરાયો હતો. આ કાર્યક્રમ પર્યાવરણની જાળવણી અને સ્વજનોની યાદને જીવંત રાખવા માટે એક પ્રેરણાદાયક ઉદાહરણ પૂરું પાડે છે.
આ પ્રસંગે, અમદાવાદના મેયર શ્રીમતી પ્રતિભાબેન જૈન, પ્રદેશ ભાજપ કોષાધ્યક્ષ શ્રી સુરેન્દ્રભાઈ પટેલ (કાકા), સાંસદ શ્રી દિનેશભાઈ મકવાણા, શહેર ભાજપ અધ્યક્ષ શ્રી પ્રેરકભાઈ શાહ, ડેપ્યુટી મેયર શ્રી જતીનભાઈ પટેલ, સ્ટેન્ડિંગ કમિટીના ચેરમેન શ્રી દેવાંગભાઈ દાણી, મ્યુનિસિપલ કમિશનર શ્રી બંછાનિધિ પાની, તેમજ અન્ય કોર્પોરેટરઓ, પદાધિકારીઓ સહિતના લોકો ઉપસ્થિત રહ્યા હતા.
)
