જૂનાગઢના ખેડૂતોને ઓઈલ પામની ખેતી માટે સરકારની સહાય, રોપાઓથી લઈને ખેતીના સાધનો સુધી સબસિડીનો લાભ

જૂનાગઢ, તા.૦૮
જૂનાગઢ જિલ્લામાં ઓઈલ પામની ખેતીનો વિસ્તાર વધારવા અને ખેડૂતોને આવકના નવા વિકલ્પો ઉપલબ્ધ કરાવવાના હેતુથી રાજ્ય સરકારના કૃષિ અને ખેડૂત કલ્યાણ વિભાગ હેઠળના બાગાયત વિભાગ દ્વારા વિવિધ સહાય અને પ્રોત્સાહક લાભોની જાહેરાત કરવામાં આવી છે. નેશનલ મિશન ઓન એડિબલ ઓઈલ્સ – ઓઈલ પામ (NMEO-OP) યોજના અંતર્ગત ખેડૂતોને ઓઈલ પામના રોપાઓ, પાકની જાળવણી, આંતરપાક, સિંચાઈની સુવિધાઓ અને લણણી માટે જરૂરી સાધનોની ખરીદીમાં આર્થિક સહાય આપવામાં આવશે. જૂનાગઢ જિલ્લા સહિત રાજ્યના પાત્ર ખેડૂતો આ યોજનાનો લાભ મેળવી શકશે.
બાગાયત વિભાગ દ્વારા જાહેર કરાયેલી વિગતો અનુસાર ઓઈલ પામનું વાવેતર કરવા ઇચ્છતા ખેડૂતોને પ્લાન્ટિંગ મટીરિયલ્સ એટલે કે રોપાઓની ખરીદી માટે સહાય આપવામાં આવશે. જેમાં સ્વદેશી રોપાઓ માટે હેક્ટર દીઠ રૂ.20,000 અને આયાતી રોપાઓ માટે પરિવહન ખર્ચ સહિત હેક્ટર દીઠ રૂ.27,000ની સહાય મળવાપાત્ર રહેશે. આ સહાય ખેડૂત ખાતેદારની જમીન ધારણ અને યોજનાની પાત્રતાના ધોરણો મુજબ આપવામાં આવશે. ખેડૂતોને ઓઈલ પામ યોજના હેઠળ કાર્યરત માન્ય કંપનીઓની નર્સરીઓમાંથી જ રોપાઓ મેળવવાના રહેશે.
ઓઈલ પામના વાવેતર બાદ શરૂઆતના ચાર વર્ષના ગેસ્ટેશન સમયગાળા દરમિયાન પાકની જાળવણી અને આંતરપાક માટે પણ આર્થિક સહાયની જોગવાઈ કરવામાં આવી છે. આ સમયગાળા દરમિયાન મેઈન્ટેનન્સ અને આંતરપાક માટે હેક્ટર દીઠ રૂ.42,000ની સહાય આપવામાં આવશે. જેમાં બિયારણ, ખાતર, સંકલિત જીવાત વ્યવસ્થાપન (IPM), સંકલિત પોષકતત્ત્વ વ્યવસ્થાપન (INM), ફર્ટિગેશન, ટ્રી ગાર્ડ અને પાક સંરક્ષણ માટે જરૂરી રસાયણો સહિતના ખર્ચનો સમાવેશ થાય છે. નિર્ધારિત જોગવાઈ મુજબ સહાયમાંથી 75 ટકા ખર્ચ બિયારણ અને ખાતર માટે તથા બાકીના 25 ટકા ખર્ચ પાક સંરક્ષણ સંબંધિત કામગીરી માટે કરવાનો રહેશે.
ઓઈલ પામની ખેતીમાં સિંચાઈની સુવિધાઓ વિકસાવવા માટે પણ ખેડૂતોને સહાય ઉપલબ્ધ કરાવવામાં આવશે. યોજના હેઠળ બોરવેલ, પંપસેટ અને વોટર હાર્વેસ્ટિંગ સ્ટ્રક્ચર માટે NMEO-OPની માર્ગદર્શિકા મુજબ કુલ ખર્ચના 50 ટકા અથવા વધુમાં વધુ રૂ.50,000 પ્રતિ એકમની મર્યાદામાં સહાય મળવાપાત્ર રહેશે. આ જોગવાઈનો હેતુ ખેડૂતોને ઓઈલ પામના વાવેતર માટે જરૂરી પાણીની વ્યવસ્થા ઊભી કરવામાં આર્થિક મદદ કરવાનો છે.
આ ઉપરાંત ઓઈલ પામના પાકની લણણી અને સંચાલન માટે જરૂરી વિવિધ સાધનોની ખરીદી પર પણ સબસિડી આપવામાં આવશે. જેમાં હાથથી ચાલતા ઓઈલ પામ કટર માટે વધુમાં વધુ રૂ.2,500, પ્રોટેક્ટિવ વાયર મેશ માટે રૂ.20,000, મોટરાઈઝ્ડ ચીઝલ માટે રૂ.15,000 અને એલ્યુમિનિયમ પોર્ટેબલ લેડર અથવા પોલ્સ માટે રૂ.5,000 સુધીની સહાયની જોગવાઈ કરવામાં આવી છે. જ્યારે ચાફ કટર માટે વધુમાં વધુ રૂ.50,000 સુધીની આર્થિક સહાય મળવાપાત્ર રહેશે.
ખેડૂતોને ખેતીની કામગીરીમાં યાંત્રિક સુવિધાઓ ઉપલબ્ધ કરાવવા માટે 20 HP સુધીના મિની ટ્રેક્ટર અને ટ્રોલીની ખરીદી પર પણ સહાયની જાહેરાત કરવામાં આવી છે. આ માટે કુલ ખર્ચના 40 ટકા અથવા જાહેર કરાયેલી વિગતો મુજબ વધુમાં વધુ રૂ.20 લાખની મર્યાદામાં સહાયની જોગવાઈ દર્શાવવામાં આવી છે. જોકે આ સહાયની ચોક્કસ મહત્તમ મર્યાદા અને પાત્રતા અંગે ખેડૂતોને અરજી કરતાં પહેલાં બાગાયત વિભાગ પાસેથી પુષ્ટિ મેળવવાની સલાહ આપવામાં આવે છે. આ લાભ ત્રણ વર્ષથી વધુ જૂનું અને ઓછામાં ઓછું 0.50 હેક્ટર ઓઈલ પામનું વાવેતર ધરાવતા પાત્ર ખેડૂતોને મળવાપાત્ર રહેશે.
યોજના અંતર્ગત જૂના ઓઈલ પામના બગીચાની ફેરરોપણી માટે પણ સહાયની જોગવાઈ કરવામાં આવી છે. જે ખેડૂતોના ઓઈલ પામના બગીચા 27થી 30 વર્ષ જૂના થઈ ગયા હોય, તેમને જૂના છોડ દૂર કરવા, નવા છોડ માટે ખાડા તૈયાર કરવા અને ફેરરોપણી સંબંધિત કામગીરી માટે ખર્ચના 50 ટકા લેખે વધુમાં વધુ રૂ.250 પ્રતિ છોડની મર્યાદામાં સહાય આપવામાં આવશે. આ જોગવાઈથી જૂના બગીચાનું નવીનીકરણ કરવા ઇચ્છતા ખેડૂતોને આર્થિક મદદ મળી શકશે.
જૂનાગઢ જિલ્લાના ખેડૂતોને ઓઈલ પામના ઉત્પાદનના વેચાણ માટે બજારની સુવિધા મળી રહે તે હેતુથી બાયબેક કરારની વ્યવસ્થા પણ કરવામાં આવી છે. બાગાયત વિભાગની યાદી મુજબ સરકાર દ્વારા માન્ય Pre Unique India Pvt. Ltd. કંપની સાથે ઓઈલ પામના ફળના બંચના ઉત્પાદનની ખરીદી માટે બાયબેક કરાર કરવામાં આવ્યો છે. આ વ્યવસ્થા હેઠળ ખેડૂતોને ઉત્પાદનના વેચાણ માટે નિર્ધારિત ખરીદદાર ઉપલબ્ધ રહે તેવી જોગવાઈ કરવામાં આવી છે. ઉપરાંત સરકાર દ્વારા દર વર્ષે ખરીદીના ભાવ નક્કી કરવામાં આવતા હોવાનું પણ જણાવાયું છે.
ઓઈલ પામનું વાવેતર કરનારા ખેડૂતોને ઉત્પાદનના પરિવહનમાં સરળતા રહે તે માટે વાવેતર કરાયેલા ગામથી 20થી 30 કિલોમીટરની અંદર કલેક્શન સેન્ટરની સુવિધા ઉપલબ્ધ કરાવવાની પણ જોગવાઈ દર્શાવવામાં આવી છે. આ વ્યવસ્થાથી ખેડૂતોને પોતાના ખેતરમાંથી મેળવેલા ઓઈલ પામના ફળના બંચ નજીકના કેન્દ્ર સુધી પહોંચાડવામાં સરળતા રહેવાની અપેક્ષા છે.
બાગાયત વિભાગના જણાવ્યા અનુસાર ઓઈલ પામની ખેતીને પ્રોત્સાહન આપવાથી ખેડૂતો માટે આવકના નવા વિકલ્પો ઊભા થવાની સાથે કૃષિ ક્ષેત્ર અને ગ્રામ્ય અર્થતંત્રને વેગ મળવાની સંભાવના છે. જોકે ઓઈલ પામ લાંબા ગાળાનો પાક હોવાથી વાવેતર પહેલાં સ્થાનિક જમીન, હવામાન, પાણીની ઉપલબ્ધતા અને બજાર વ્યવસ્થાનું મૂલ્યાંકન કરવું ખેડૂતો માટે જરૂરી છે.
NMEO-OP યોજના અંતર્ગત ઉપલબ્ધ વિવિધ સહાય, પાત્રતાના માપદંડો અને અરજી પ્રક્રિયા અંગે વધુ માહિતી મેળવવા માટે જૂનાગઢ જિલ્લાના ખેડૂતો નાયબ બાગાયત નિયામકની કચેરી, લઘુ કૃષિ ભવન, જૂનાગઢ ખાતે રૂબરૂ સંપર્ક કરી શકે છે. આ ઉપરાંત કચેરીના ફોન નંબર 0285-2635019 પર અથવા સંબંધિત તાલુકા કક્ષાના બાગાયત અધિકારીનો સંપર્ક કરીને પણ જરૂરી માર્ગદર્શન મેળવી શકાશે. આ અંગેની માહિતી નાયબ બાગાયત અધિકારી, જૂનાગઢ દ્વારા પ્રસિદ્ધ કરવામાં આવેલી યાદીમાં આપવામાં આવી છે.