જૂનાગઢ કૃષિ યુનિવર્સિટીમાં વિશ્વ કપાસ દિવસની ઉજવણી, સંકર જાતોની વિશેષતાઓ અંગે વૈજ્ઞાનિકોએ આપ્યું માર્ગદર્શન
કપાસ સંશોધન કેન્દ્ર ખાતે DUS લાક્ષણિકતાઓ વિષય પર તાલીમ કાર્યક્રમ યોજાયો; ગુજરાત રાજ્ય બીજ પ્રમાણન એજન્સીના અધિકારીઓ અને કર્મચારીઓએ લીધો ભાગ
saurashtrabhoomi 
જૂનાગઢ, તા.૦૮
જૂનાગઢ કૃષિ યુનિવર્સિટીના કપાસ સંશોધન કેન્દ્ર ખાતે ગત તા.૦૭/૧૦/૨૦૨૬ના રોજ વિશ્વ કપાસ દિવસની ઉજવણી કરવામાં આવી હતી. આ પ્રસંગે કપાસની સંકર જાતો અને તેની DUS લાક્ષણિકતાઓ અંગે વિશેષ તાલીમ કાર્યક્રમનું આયોજન કરવામાં આવ્યું હતું. જેમાં ગુજરાત રાજ્ય બીજ પ્રમાણન એજન્સી તથા કપાસ સંશોધન કેન્દ્રના અધિકારીઓ અને કર્મચારીઓએ ભાગ લીધો હતો.
વિશ્વ કપાસ દિવસની ઉજવણીના ભાગરૂપે કપાસ સંશોધન કેન્દ્રના ફાર્મ ખાતે વિશેષ રેલી યોજવામાં આવી હતી. આ રેલીમાં કપાસની ખેતી માટે ભલામણ કરાયેલી ટેકનોલોજી અંગે માહિતી આપતા બેનરો પ્રદર્શિત કરવામાં આવ્યા હતા. સાથે જ વિવિધ સૂત્રોચ્ચાર દ્વારા કપાસની ખેતીમાં વૈજ્ઞાનિક પદ્ધતિઓ અને આધુનિક ટેકનોલોજીના ઉપયોગ અંગે જાગૃતિ ફેલાવવાનો પ્રયાસ કરવામાં આવ્યો હતો.
રેલી બાદ યોજાયેલા ઉદ્ઘાટન સમારંભમાં જૂનાગઢ કૃષિ યુનિવર્સિટીના કુલપતિ ડૉ. વી.પી. ચોવટીયા, સંશોધન નિયામક ડૉ. એ.જી. પાનસુરીયા, કુલસચિવ ડૉ. વાય.એચ. ઘેલાણી, વિસ્તરણ શિક્ષણ નિયામક ડૉ. એન.બી. જાદવ અને કપાસ સંશોધન કેન્દ્રના વડા ડૉ. એમ.જી. વળુ સહિત યુનિવર્સિટીના વિવિધ અધિકારીઓ અને કર્મચારીઓ ઉપસ્થિત રહ્યા હતા.
આ કાર્યક્રમ દરમિયાન કપાસની સંકર જાતો અને તેની DUS લાક્ષણિકતાઓ વિષય પર કપાસ સંશોધન કેન્દ્રના વિવિધ વૈજ્ઞાનિકો દ્વારા વ્યાખ્યાનો આપવામાં આવ્યા હતા. જેમાં કપાસની અલગ-અલગ સંકર જાતોની ઓળખ, તેમની વિશિષ્ટતા, એકરૂપતા અને સ્થિરતા જેવી મહત્ત્વપૂર્ણ લાક્ષણિકતાઓ અંગે વિગતવાર સમજ આપવામાં આવી હતી. આ ઉપરાંત કપાસની જાતો સંબંધિત તકનીકી બાબતો અંગે પણ ઉપસ્થિત અધિકારીઓ અને કર્મચારીઓને માર્ગદર્શન પૂરું પાડવામાં આવ્યું હતું.
તાલીમ કાર્યક્રમમાં કપાસની વર્તમાન પરિસ્થિતિને ધ્યાનમાં રાખીને ઊભા થતા વિવિધ પ્રશ્નો અંગે ચર્ચા કરવામાં આવી હતી. વૈજ્ઞાનિકોએ આ પ્રશ્નોના વૈજ્ઞાનિક અભિગમ સાથે ઉકેલ મેળવવા માટે જરૂરી માહિતી આપી હતી. ખાસ કરીને કપાસની સંકર જાતોની લાક્ષણિકતાઓને યોગ્ય રીતે સમજવા અને તેની ઓળખ માટે જરૂરી બાબતો અંગે તાલીમાર્થીઓને માહિતગાર કરવામાં આવ્યા હતા.
વિશ્વ કપાસ દિવસની ઉજવણી સાથે આયોજિત આ તાલીમ કાર્યક્રમને સફળ બનાવવા કપાસ સંશોધન કેન્દ્રની સમગ્ર ટીમ દ્વારા વિશેષ જહેમત ઉઠાવવામાં આવી હતી. કાર્યક્રમ અંગેની માહિતી જૂનાગઢ કૃષિ યુનિવર્સિટીના વિસ્તરણ શિક્ષણ નિયામક ડૉ. એન.બી. જાદવ દ્વારા પ્રસિદ્ધ કરાયેલી યાદીમાં આપવામાં આવી છે.
.jpg)
