‘પહેલા મારી પાસેથી રાઇટ્સ લો પછી ફિલ્મ બનાવો’, ‘ઈન્ડિયાઝ ગોટ લેટેન્ટ’માં પોતાના પર થયેલી મજાકનો અદનાન સામીએ આપ્યો જવાબ
આયુષ્યમાન ખુરાનાની ‘ઉડતા તીર’માં પાકિસ્તાની જાસૂસના પાત્રની ચર્ચા દરમિયાન કોમેડિયન કલ્લૂએ લીધો અદનાન સામીનો ઉલ્લેખ; વાયરલ વીડિયો પર સિંગરે પણ રમૂજી અંદાજમાં આપી પ્રતિક્રિયા
saurashtrabhoomi 
મુંબઈ, તા.૩૦
સિંગર અદનાન સામી ફરી એકવાર સોશિયલ મીડિયા પર ચર્ચામાં આવ્યા છે. ‘ઈન્ડિયાઝ ગોટ લેટેન્ટ’ના તાજેતરના એપિસોડમાં આયુષ્યમાન ખુરાનાની આગામી ફિલ્મ ‘ઉડતા તીર’ના પાકિસ્તાની જાસૂસના પાત્રની વાત દરમિયાન અદનાન સામીને લઈને મજાક કરવામાં આવી હતી. આ વીડિયો સોશિયલ મીડિયા પર વાયરલ થયા બાદ અદનાન સામીએ પણ તેના પર રમૂજી અંદાજમાં જવાબ આપ્યો છે.
આ એપિસોડમાં અભિનેતા આયુષ્યમાન ખુરાના સાથે કોમેડિયન કલ્લૂ, રજત સૂદ અને મેન્ટલિસ્ટ સુહાની શાહ પેનલિસ્ટ તરીકે જોવા મળ્યા હતા. શો દરમિયાન સમય રૈનાએ આયુષ્યમાનને તેની આગામી ફિલ્મ ‘ઉડતા તીર’ અંગે પૂછ્યું હતું. ત્યારબાદ આયુષ્યમાને ફિલ્મની કહાની અને પોતાના પાત્ર અંગે કેટલીક વિગતો શેર કરી હતી.
આયુષ્યમાનના જણાવ્યા પ્રમાણે ‘ઉડતા તીર’ એક પેટ્રિઓટિક અને સ્પાય કોમેડી ફિલ્મ છે. ફિલ્મમાં તે એક પાકિસ્તાની જાસૂસનું પાત્ર ભજવી રહ્યો છે, જે ભારત આવે છે. જોકે એક અકસ્માત બાદ તે પોતાની યાદશક્તિ ગુમાવી બેસે છે અને પોતાને ભારતીય માનવા લાગે છે.
આયુષ્યમાને ફિલ્મના પાત્ર અંગે સમજાવતાં કહ્યું હતું કે જાસૂસને પોતાની દેશભક્તિ તો યાદ રહે છે, પરંતુ તે કયા દેશનો છે એ જ ભૂલી જાય છે. ફિલ્મના આ પ્લોટની વાત સાંભળ્યા બાદ કોમેડિયન કલ્લૂએ તરત જ અદનાન સામીનું નામ લીધું હતું. આ ટિપ્પણી બાદ શોમાં હાજર લોકો હસી પડ્યા હતા.
આ મજાકનો સંદર્ભ અદનાન સામીના પાકિસ્તાન સાથેના અગાઉના નાગરિકત્વ અને બાદમાં ભારતીય નાગરિક બનવા સાથે જોડાયેલો હતો. જોકે અદનાન સામીએ આ ટિપ્પણીને ગંભીરતાથી લેવાને બદલે પોતે પણ રમૂજી અંદાજમાં તેનો જવાબ આપ્યો હતો.
શોનો આ ભાગ સોશિયલ મીડિયા પર વાયરલ થયા બાદ અદનાન સામીએ વીડિયો પર કોમેન્ટ કરતાં લખ્યું હતું કે, ‘પહેલા મારી પાસેથી રાઇટ્સ લો અને પછી ફિલ્મ બનાવો.’ સિંગરની આ પ્રતિક્રિયા બાદ તેની કોમેન્ટ પણ સોશિયલ મીડિયા યુઝર્સનું ધ્યાન ખેંચી રહી છે.
અદનાન સામી લાંબા સમયથી ભારતીય સંગીત જગત સાથે જોડાયેલા છે. તેમને વર્ષ 2016માં ભારતીય નાગરિકત્વ આપવામાં આવ્યું હતું. આ પહેલાં તેઓ પાકિસ્તાની નાગરિક હતા. આ જ પૃષ્ઠભૂમિને ધ્યાનમાં રાખીને શોમાં કરવામાં આવેલી મજાકનો અદનાન સામીએ પણ હળવા અંદાજમાં જવાબ આપ્યો હતો.
બીજી તરફ આયુષ્યમાન ખુરાનાની ‘ઉડતા તીર’ની કહાનીમાં દેશભક્તિ અને જાસૂસી સાથે કોમેડીનું મિશ્રણ જોવા મળવાનું છે. ફિલ્મના પાત્ર વિશે આયુષ્યમાને કરેલી વાતચીત વચ્ચે અદનાન સામીનો ઉલ્લેખ થતાં આ એપિસોડનો વીડિયો હવે સોશિયલ મીડિયા પર ચર્ચામાં આવ્યો છે.
)
