ગોવિંદા-સુનીતા વચ્ચેના વિવાદમાં નવો ખુલાસો, કોર્ટ પહોંચવાનું કારણ આવ્યું સામે
જૂના છૂટાછેડા કેસને લઈને સુનીતા આહુજા બાંદ્રા ફેમિલી કોર્ટ પહોંચી હતી, મેનેજરે મામલે સ્પષ્ટતા કરી
saurashtrabhoomi 
મુંબઈ, તા. ૨૦
બોલિવૂડ અભિનેતા ગોવિંદા અને તેમની પત્ની સુનીતા આહુજાના સંબંધોને લઈને છેલ્લા કેટલાક સમયથી ચાલી રહેલી ચર્ચાઓ વચ્ચે હવે એક મહત્વની માહિતી સામે આવી છે. બંને વચ્ચે છૂટાછેડાની અટકળો ફરી તેજ બની હતી, પરંતુ ગોવિંદાના મેનેજરે આ મામલે સ્પષ્ટતા કરતાં જણાવ્યું છે કે સુનીતા આહુજા બાંદ્રા ફેમિલી કોર્ટમાં જૂના છૂટાછેડા કેસને પાછો ખેંચવાની પ્રક્રિયા માટે પહોંચી હતી.
મળતી માહિતી મુજબ, ડિસેમ્બર ૨૦૨૪ની આસપાસ ગોવિંદા અને સુનીતા વચ્ચે છૂટાછેડાને લગતી અરજી બાંદ્રા ફેમિલી કોર્ટમાં દાખલ કરવામાં આવી હતી. ત્યારબાદ બંને પક્ષના વકીલો દ્વારા મામલો ઉકેલવા માટે પ્રયાસો કરવામાં આવ્યા હતા. આ દરમિયાન ગોવિંદાએ પણ ભૂતકાળના મતભેદો હવે ધીમે ધીમે દૂર થઈ રહ્યા હોવાનું જણાવ્યું હતું.
છેલ્લા કેટલાક મહિનાઓથી ગોવિંદા અને સુનીતા પોતાના અંગત જીવનને લઈને સતત ચર્ચામાં રહ્યા છે. બંને તરફથી જાહેરમાં કરવામાં આવેલા કેટલાક નિવેદનોને કારણે તેમના સંબંધોને લઈને વિવિધ પ્રકારની અટકળો પણ શરૂ થઈ હતી. જોકે, ગોવિંદા તરફથી સામે આવેલા એક વીડિયોમાં તેમણે પત્ની સુનીતાને જાહેર સ્થળોએ ભાષા અંગે સાવચેતી રાખવાની સલાહ આપી હતી અને આવી બાબતો પરિવાર માટે યોગ્ય ન હોવાનું કહ્યું હતું.
સુનીતા આહુજા અગાઉ પણ ગોવિંદાના કથિત અફેર અંગે વાત કરી ચૂકી છે. તાજેતરમાં ગોવિંદા એક યુવા અભિનેત્રી સાથે મુંબઈ એરપોર્ટ પર જોવા મળ્યા બાદ આ મુદ્દાએ ફરી ચર્ચા જગાવી હતી. ત્યારબાદ સુનીતાએ ગોવિંદાના સંબંધોને લઈને કેટલાક આકરા નિવેદનો કર્યા હતા, જેના કારણે બોલિવૂડમાં પણ આ મામલો ચર્ચાનો વિષય બન્યો હતો.
ગોવિંદા અને સુનીતાના લગ્ન વર્ષ ૧૯૮૭માં થયા હતા. બંનેને બે સંતાનો છે, જેમાં દીકરીનું નામ ટીના અને પુત્રનું નામ યશવર્ધન છે. વર્ષ ૨૦૨૪માં છૂટાછેડા માટે અરજી કરવામાં આવી હોવાની વાત બાદ ફેબ્રુઆરી ૨૦૨૫માં ગોવિંદાના વકીલે પણ આ અંગે પુષ્ટિ કરી હતી. જોકે, ત્યારબાદ બંને સાથે હોવાની વાત સામે આવી હતી.
હવે સુનીતા આહુજા જૂના કેસને પાછો ખેંચવાની પ્રક્રિયા માટે કોર્ટમાં પહોંચી હોવાની માહિતી સામે આવતા ગોવિંદા અને સુનીતાના સંબંધોને લઈને ચાલી રહેલી ચર્ચાઓને નવી દિશા મળી છે. મેનેજરની સ્પષ્ટતા બાદ બંને વચ્ચેના સંબંધોને લઈને ચાલી રહેલી અટકળો કેટલી હદ સુધી સાચી છે તે અંગેની તસવીર પણ વધુ સ્પષ્ટ થતી જોવા મળી રહી છે.
