છ વર્ષ બાદ કરણ જોહરે ફરી જીવંત કર્યો RAWના સ્થાપક આર.એન. કાઓનો બાયોપિક પ્રોજેક્ટ, 2028માં રિલીઝની તૈયારી
નિતિન ગોખલેના પુસ્તક ‘જેન્ટલમેન સ્પાયમાસ્ટર’ પરથી બનનારી ફિલ્મમાં RAWની રચના અને આર.એન. કાઓની સફર પર રહેશે ફોકસ; 11 ઓગસ્ટ 2028ની રિલીઝ જાહેર
saurashtrabhoomi 
મુંબઈ, તા.૨૨
ફિલ્મમેકર કરણ જોહરે ભારતની ગુપ્તચર સંસ્થા રિસર્ચ એન્ડ એનાલિસિસ વિંગ એટલે કે RAWના સ્થાપક વડા રામેશ્વર નાથ કાઓના જીવન પર આધારિત પોતાના મહત્વાકાંક્ષી ફિલ્મ પ્રોજેક્ટને ફરી આગળ વધારવાની જાહેરાત કરી છે. આ ફિલ્મની જાહેરાત લગભગ છ વર્ષ પહેલાં જાન્યુઆરી 2020માં કરવામાં આવી હતી, પરંતુ ત્યારબાદ પ્રોજેક્ટ આગળ વધી શક્યો નહોતો. હવે ફિલ્મને ફરી રિવાઇવ કરીને તેની રિલીઝ માટે 11 ઓગસ્ટ 2028ની તારીખ જાહેર કરવામાં આવી હોવાનું જણાવાયું છે.
રામેશ્વર નાથ કાઓ, જેઓ આર.એન. કાઓ તરીકે વધુ જાણીતા હતા, ભારતના ગુપ્તચર તંત્રના ઇતિહાસમાં મહત્વપૂર્ણ નામ ગણાય છે. વર્ષ 1968માં તત્કાલીન વડાપ્રધાન ઇન્દિરા ગાંધીના કાર્યકાળ દરમિયાન RAWની સ્થાપના કરવામાં આવી હતી અને આર.એન. કાઓ તેના પ્રથમ વડા બન્યા હતા. તેમણે વર્ષ 1977 સુધી સંસ્થાનું નેતૃત્વ સંભાળ્યું હતું.
કરણ જોહરની આ ફિલ્મ લેખક અને રાષ્ટ્રીય સુરક્ષા વિષયોના નિષ્ણાત નિતિન એ. ગોખલેના પુસ્તક ‘R.N. Kao: Gentleman Spymaster’ પરથી આધારિત હોવાનું જણાવાયું છે. ફિલ્મમાં કાઓના જીવનની સાથે ભારતની બાહ્ય ગુપ્તચર સંસ્થા RAWની રચના અને તેના શરૂઆતના સમયગાળાને આવરી લેવાની યોજના છે.
વર્ષ 2020માં કરણ જોહરે આ પ્રોજેક્ટની જાહેરાત કરી ત્યારે જ ફિલ્મને એક ઇન્ટેલિજન્સ અને સ્પાય ડ્રામા તરીકે રજૂ કરવાની ચર્ચા હતી. જોકે ત્યારબાદ લાંબા સમય સુધી પ્રોજેક્ટ અંગે કોઈ મોટી પ્રગતિ સામે આવી નહોતી. હવે છ વર્ષ બાદ તેને ફરી આગળ વધારવાની જાહેરાત થતાં ફિલ્મ ફરી ચર્ચામાં આવી છે.
આર.એન. કાઓના જીવન પર આધારિત પ્રોજેક્ટની ચર્ચા માત્ર મોટા પડદા પૂરતી મર્યાદિત નથી. વર્ષ 2022માં ફિલ્મમેકર હંસલ મહેતાએ પણ પૂર્વ RAW અધિકારી આર.કે. યાદવના પુસ્તક ‘Mission R&AW’ પરથી એક OTT વેબ સિરીઝ બનાવવાની જાહેરાત કરી હતી. જોકે ત્યારબાદ આ વેબ સિરીઝની પ્રગતિ અંગે ખાસ નવી માહિતી સામે આવી નથી.
હવે કરણ જોહરના પ્રોજેક્ટ માટે 11 ઓગસ્ટ 2028ની થિયેટ્રિકલ રિલીઝ જાહેર કરવામાં આવી હોવાનું જણાવાયું છે. ફિલ્મમાં આર.એન. કાઓની ભૂમિકા કોણ ભજવશે, તેનું દિગ્દર્શન કોણ કરશે તેમજ અન્ય કલાકારો કોણ હશે તે અંગેની સંપૂર્ણ વિગતો હજુ સામે આવવાની બાકી છે.
RAWના સ્થાપનાકાળ અને આર.એન. કાઓની કામગીરીને કેન્દ્રમાં રાખતી આ ફિલ્મમાં ભારતીય ગુપ્તચર તંત્રના શરૂઆતના સમયગાળાની ઘટનાઓને કેવી રીતે રજૂ કરવામાં આવે છે તેના પર પણ નજર રહેશે. લાંબા સમયથી અટકેલો પ્રોજેક્ટ ફરી શરૂ કરવાની જાહેરાત બાદ હવે તેની સ્ટારકાસ્ટ અને શૂટિંગ શેડ્યૂલ અંગેની આગામી જાહેરાતોની રાહ જોવાઈ રહી છે.
