‘દાદાસાહેબ ફાળકે એવોર્ડ કર્ણાટકને સમર્પિત’, અનંત નાગે કહ્યું- ‘અહીંના દર્શકો અને સંસ્કૃતિએ મારી પાંચ દાયકાની સફર ઘડી’

મુંબઈ, તા.૧૯
દિગ્ગજ કન્નડ અભિનેતા અનંત નાગે પોતાને મળનારો પ્રતિષ્ઠિત દાદાસાહેબ ફાળકે એવોર્ડ કર્ણાટકના લોકો અને રાજ્યની સમૃદ્ધ ફિલ્મ સંસ્કૃતિને સમર્પિત કરવાનો નિર્ણય કર્યો છે. પાંચ દાયકાથી વધુ સમયથી ભારતીય સિનેમા સાથે જોડાયેલા અનંત નાગે પોતાની લાંબી કારકિર્દીનો શ્રેય કર્ણાટકના ફિલ્મકારો, કલાકારો અને ખાસ કરીને દર્શકો તરફથી મળેલા સહયોગને આપ્યો છે.
અનંત નાગના જણાવ્યા પ્રમાણે કર્ણાટકના સાંસ્કૃતિક વાતાવરણ અને દર્શકોની વિવિધ પ્રકારના સિનેમાને સ્વીકારવાની ક્ષમતાને કારણે જ તેમને પોતાની કારકિર્દીમાં આર્ટ ફિલ્મોથી લઈને કમર્શિયલ સિનેમા સુધી અલગ-અલગ પ્રકારનાં પાત્રો અને ફિલ્મોમાં કામ કરવાની તક મળી. તેમણે કહ્યું કે આવી વિવિધતાપૂર્ણ કારકિર્દી કદાચ અન્ય કોઈ રાજ્યમાં શક્ય ન બની હોત.
77 વર્ષીય અનંત નાગે કર્ણાટકના દર્શકોને ખૂબ જ શિક્ષિત અને પારખુ ગણાવ્યા હતા. તેમના મતે રાજ્યના નિર્માતાઓ, દિગ્દર્શકો, અભિનેતા-અભિનેત્રીઓ અને દર્શકો દ્વારા ઊભું થયેલું સાંસ્કૃતિક વાતાવરણ તેમની અભિનય સફર ઘડવામાં મહત્વપૂર્ણ રહ્યું છે. આ જ કારણથી પોતાને મળનારા દાદાસાહેબ ફાળકે એવોર્ડને પણ તેઓ કર્ણાટકને સમર્પિત કરવા માગે છે.
અનંત નાગનો જન્મ વર્ષ 1948માં ઉત્તર કન્નડ જિલ્લાના શિરાલી ખાતે થયો હતો. 12 વર્ષની ઉંમરે તેઓ મુંબઈ આવ્યા હતા. કોલેજના અભ્યાસ દરમિયાન તેમણે બેંકમાં નોકરી પણ કરી હતી. જોકે અભિનય પ્રત્યેના રસને કારણે 18 વર્ષની ઉંમરે તેઓ રંગમંચ સાથે જોડાયા હતા.
લગભગ પાંચ વર્ષ સુધી થિયેટરમાં કામ કરીને અભિનયનો અનુભવ મેળવ્યા બાદ તેમણે ફિલ્મોની દુનિયામાં પ્રવેશ કર્યો. વર્ષ 1973થી શરૂ થયેલી તેમની ફિલ્મી કારકિર્દી પાંચ દાયકાથી વધુ સમય સુધી વિસ્તરી છે. આ દરમિયાન તેમણે 200થી વધુ કન્નડ ફિલ્મોમાં અભિનય કરીને પોતાની આગવી ઓળખ ઊભી કરી છે.
અનંત નાગ દિવંગત અભિનેતા અને દિગ્દર્શક શંકર નાગના નાના ભાઈ છે. લાંબી કારકિર્દી દરમિયાન તેમણે અલગ-અલગ પ્રકારનાં પાત્રો ભજવીને કન્નડ સિનેમામાં મહત્વપૂર્ણ સ્થાન મેળવ્યું છે. આર્ટ સિનેમા હોય કે મુખ્યધારાની કમર્શિયલ ફિલ્મો, બંને પ્રકારના પ્રોજેક્ટ્સમાં તેમની હાજરી જોવા મળી છે.
અનંત નાગને વર્ષ 2025માં પદ્મ ભૂષણથી પણ સન્માનિત કરવામાં આવ્યા હતા. તે સમયે પણ તેમણે આ સન્માન કર્ણાટકના લોકોને સમર્પિત કર્યું હતું. હવે ભારતીય સિનેમાના સર્વોચ્ચ સન્માનોમાં ગણાતા દાદાસાહેબ ફાળકે એવોર્ડને પણ તેઓ રાજ્યના લોકો અને ફિલ્મ સંસ્કૃતિને અર્પણ કરશે.
અનંત નાગને 22 સપ્ટેમ્બરે યોજાનારા 72મા નેશનલ ફિલ્મ એવોર્ડ સમારોહમાં દાદાસાહેબ ફાળકે એવોર્ડ એનાયત કરવામાં આવશે. ભારતીય સિનેમાના વિકાસ અને પ્રગતિમાં નોંધપાત્ર યોગદાન આપનાર ફિલ્મી હસ્તીઓને આ સન્માન આપવામાં આવે છે.
આ એવોર્ડ અંતર્ગત સ્વર્ણ કમલ ચંદ્રક, શાલ અને રૂ.10 લાખનું રોકડ પુરસ્કાર આપવામાં આવે છે. પાંચ દાયકાથી વધુ સમયની પોતાની અભિનય સફર બાદ આ સન્માન મેળવવા જઈ રહેલા અનંત નાગે તેને વ્યક્તિગત સિદ્ધિ તરીકે જોવાને બદલે કર્ણાટકના દર્શકો, ફિલ્મકારો અને રાજ્યની ફિલ્મ સંસ્કૃતિ સાથે જોડ્યું છે.