‘રામાયણ’ના VFX પર સવાલો વચ્ચે રણબીર કપૂરનો જવાબ, કહ્યું- ટ્રેલર જોઈને તરત નિર્ણય ન લેવો
30 જુલાઈએ ટ્રેલર રિલીઝ થયા બાદ વિઝ્યુઅલ્સની ચર્ચા તેજ; અભિનેતાએ VFX પાછળની લાંબી મહેનતનો કર્યો ઉલ્લેખ
saurashtrabhoomi 
મુંબઈ, તા. 17:
નિતેશ તિવારીની મોસ્ટ અવેટેડ ફિલ્મ ‘રામાયણ’નું ટ્રેલર 30 જુલાઈએ રિલીઝ થયા બાદથી જ ફિલ્મના ભવ્ય વિઝ્યુઅલ્સ અને VFX ચર્ચામાં છે. એક તરફ દર્શકો ફિલ્મના વિશાળ કેનવાસની પ્રશંસા કરી રહ્યા છે, તો બીજી તરફ કેટલાક સોશિયલ મીડિયા યુઝર્સે ફિલ્મના CGI અને VFXને લઈને સવાલો ઉઠાવ્યા છે. હવે અભિનેતા રણબીર કપૂરે આ ટીકાઓ અંગે પોતાનો મત વ્યક્ત કર્યો છે.
એક ઈન્ટરવ્યુ દરમિયાન રણબીર કપૂરે જણાવ્યું કે છેલ્લા કેટલાક વર્ષોમાં દર્શકોમાં CGI અને વિઝ્યુઅલ ઈફેક્ટ્સને સમજવાની ઉત્સુકતા વધી છે. ખાસ કરીને આર્ટિફિશિયલ ઈન્ટેલિજન્સના વધતા ઉપયોગને કારણે લોકો હવે ફિલ્મોમાં CGI કેવી રીતે તૈયાર થાય છે અને સ્ક્રીન પર તેની અંતિમ અસર કેવી હોય છે તે અંગે વધુ ચર્ચા કરતા થયા છે.
રણબીરે કહ્યું કે આજકાલ મોટી સંખ્યામાં લોકો ટ્રેલર જોયા બાદ તરત જ CGI અંગે પોતાનો અભિપ્રાય આપવા લાગે છે. તેના મતે માત્ર ફોનની સ્ક્રીન પર ટ્રેલર જોઈને ફિલ્મના VFXની ગુણવત્તા અંગે અંતિમ નિર્ણય આપવો યોગ્ય નથી.
અભિનેતાએ ફિલ્મના VFX પાછળ ચાલી રહેલી મહેનતનો પણ ઉલ્લેખ કર્યો હતો. રણબીરના જણાવ્યા અનુસાર, દિગ્દર્શક નિતેશ તિવારી અને ટીમના સભ્યો ફિલ્મના વિઝ્યુઅલ્સને વધુ વાસ્તવિક અને અસરકારક બનાવવા માટે લાંબા સમયથી કામ કરી રહ્યા છે. નાની-નાની બાબતો પર પણ કલાકો સુધી ચર્ચા અને મહેનત કરવામાં આવી રહી હોવાનું તેણે જણાવ્યું હતું.
રણબીરે એ પણ સ્વીકાર્યું કે આજના સમયમાં દર્શકોને અસલી અને વિશ્વસનીય CGIથી પ્રભાવિત કરવાનું કામ અગાઉની સરખામણીએ વધુ પડકારજનક બન્યું છે. ટેક્નોલોજીના ઝડપી વિકાસ સાથે દર્શકોની અપેક્ષાઓ પણ સતત વધી રહી છે.
‘રામાયણ’ને મોટા બજેટ અને ભવ્ય પ્રોડક્શન સાથે તૈયાર કરવામાં આવી રહી છે અને ફિલ્મના વિઝ્યુઅલ્સ તેની સૌથી મોટી ખાસિયતોમાં સામેલ છે. ટ્રેલર બાદ સર્જાયેલી ચર્ચા વચ્ચે હવે દર્શકોની નજર ફિલ્મના અંતિમ પરિણામ પર છે. ફિલ્મ રિલીઝ થયા બાદ તેના VFX અને ભવ્યતા અંગેની ચર્ચા કઈ દિશામાં આગળ વધે છે તે જોવું રસપ્રદ રહેશે.
