અદાણી પોર્ટ્સ મુન્દ્રાએ સ્થાપ્યો નવો રાષ્ટ્રીય વિક્રમ : એક જ જહાજ પર ૨૧,૦૮૫ કન્ટેનર હેન્ડલિંગ કરીને સ્થાપ્યો નવો રાષ્ટ્રીય વિક્રમ

(પ્રતિનિધિ દ્વારા)
મુન્દ્રા તા.૩
અદાણી પોર્ટ્સના ફ્લેગશિપ મુન્દ્રા પોર્ટે કન્ટેનર જહાજ MSC AMBRA પર ૨૧,૦૮૫ TEUsનું એટલે કે કન્ટેનર હેન્ડલિંગ કરીને ઐતિહાસિક પોર્ટ ઓપરેશનલ સિદ્ધિ હાંસલ કરી છે. ભારતના કોઈ પણ પોર્ટ પર એક જ જહાજમાં હેન્ડલ કરવામાં આવેલું આ અત્યાર સુધીનું સૌથી વધુ કન્ટેનર વોલ્યુમ છે. આ સીમાચિહ્નરૂપ સિદ્ધિએ નવો રાષ્ટ્રીય વિક્રમ સ્થાપિત કરવાની સાથે ભારતના અગ્રણી વ્યાપારી પોર્ટ  તરીકે મુન્દ્રા પોર્ટનું સ્થાન વધુ મજબૂત બનાવ્યું છે. ઉપરાંત, દેશના સતત વિકસી રહેલા કન્ટેનરાઇઝ્ડ કાર્ગો વેપાર માટે વ્યૂહાત્મક રીતે મહત્ત્વપૂર્ણ પ્રવેશદ્વાર તરીકે પણ મુન્દ્રા પોર્ટની ભૂમિકા વધુ સુદ્રઢ બની છે. MSC AMBRA વિશ્વમાં કાર્યરત સૌથી વિશાળ કન્ટેનર જહાજોમાંનું એક છે. તેના વિરાટ કદનો અંદાજ લગાવવા ચાર ફૂટબોલ મેદાનને એક પછી એક સીધી હરોળમાં ગોઠવવામાં આવ્યાં હોય. આ જહાજની લંબાઈ ૪૦૦ મીટર અને પહોળાઈ ૬૧.૫૪ મીટર છે. તેનું ૨૫૬,૨૨૮ મેટ્રિક ટનનું ડિસ્પ્લેસમેન્ટ અંદાજે ૪૨,૭૦૦ હાથીઓના સંયુક્ત વજન જેટલું છે. આગમન સમયે જહાજનો ફોરવર્ડ ડ્રાફ્ટ ૧૫.૧૦ મીટર અને આફ્ટ ડ્રાફ્ટ ૧૫.૧૫ મીટર હતો. આટલા વિશાળ જહાજને સુરક્ષિત રીતે હેન્ડલ કરવા માટે જરૂરી અદ્યતન મરીન ઇન્ફ્રાસ્ટ્રક્ચર અને ડીપ-ડ્રાફ્ટ ક્ષમતાને આ ઓપરેશન પ્રતિબિંબિત કરે છે. આ પ્રસંગે અદાણી પોર્ટ્સ મુન્દ્રાના એક્ઝિક્યુટિવ ડિરેક્ટર રક્ષિતભાઈ શાહે જણાવ્યું હતું કે, “MSC AMBRA પર ૨૧,૦૮૫ TEUsનું હેન્ડલિંગ મુન્દ્રા પોર્ટ અને ભારતના મેરીટાઇમ ક્ષેત્ર માટે ગૌરવપૂર્ણ અને ઐતિહાસિક સિદ્ધિ છે. અગાઉના રાષ્ટ્રીય વિક્રમ કરતાં ૪,૫૧૬ TEUs વધુ હેન્ડલ કરવાથી અમારી વિશ્વસ્તરીય માળખાકીય સુવિધાઓ, અદ્યતન ટેક્નોલોજી અને ઓપરેશનલ ક્ષમતાઓની મજબૂતાઈ સાબિત થાય છે. આ સીમાચિહ્નરૂપ સિદ્ધિ ટીમ મુન્દ્રા પોર્ટ અને તમામ સહયોગી ટીમોના સુવ્યવસ્થિત આયોજન, સુમેળભર્યા સંકલન તેમજ સલામતી અને શ્રેષ્ઠ સેવા પ્રત્યેની અડગ પ્રતિબદ્ધતાનું પ્રમાણ છે. વૈશ્વિક શિપિંગ ઉદ્યોગ વધુ વિશાળ જહાજો અને મોટા પાયે કાર્ગો એકત્રીકરણ તરફ આગળ વધી રહ્યો છે ત્યારે મુન્દ્રા પોર્ટ ભવિષ્યલક્ષી ક્ષમતાઓ વિકસાવવા અને ભારતને વૈશ્વિક વેપાર તથા લોજિસ્ટિક્સ ક્ષેત્રે વધુ સ્પર્ધાત્મક બનાવવામાં પોતાનું યોગદાન આપવા માટે પ્રતિબદ્ધ છે.” આ નવી સિદ્ધિએ જાન્યુઆરી ૨૦૨૪માં MSC LIVORNO દ્વારા સ્થાપિત અગાઉના વિક્રમને પાછળ છોડ્યો છે. તે સમયે એક જ જહાજ પર ૧૬,૫૬૯ TEUsનું હેન્ડલિંગ કરવામાં આવ્યું હતું. MSC AMBRA પર ૨૧,૦૮૫ TEUsનું હેન્ડલિંગ કરીને અદાણી પોર્ટ્સની ટીમે અગાઉના વિક્રમ કરતાં ૪,૫૧૬ TEUs વધુ હેન્ડલ કર્યા છે, જે અંદાજે ૨૬.૯ ટકાનો વધારો દર્શાવે છે. MSC AMBRAનું સફળ હેન્ડલિંગ મુન્દ્રા પોર્ટની ટેક્નોલોજીકલ સજ્જતા, ઓપરેશનલ તૈયારી અને અલ્ટ્રા-લાર્જ કન્ટેનર જહાજોનું કાર્યક્ષમ રીતે સંચાલન કરવાની ક્ષમતાને દર્શાવે છે. રેકોર્ડ કન્ટેનર વોલ્યુમ ધરાવતા ૪૦૦ મીટર લાંબા જહાજના હેન્ડલિંગ માટે આગમન પહેલાંનું સુક્ષ્મ આયોજન, ચોક્કસ બર્થ ફાળવણી, વ્યૂહાત્મક ક્રેન ડિપ્લોયમેન્ટ, રિયલ-ટાઇમ યાર્ડ મેનેજમેન્ટ અને વિવિધ ટીમો વચ્ચે સુમેળભર્યા સંકલનની જરૂર હતી. પોર્ટની અદ્યતન ટમિર્નલ સુવિધાઓ, આધુનિક કાર્ગો-હેન્ડલિંગ ઉપકરણો, ડેટા આધારિત પ્રણાલીઓ અને અનુભવી કર્મચારીઓના સહયોગથી આ જટિલ ઓપરેશન સલામતી પર વિશેષ ભાર સાથે ચોકસાઈ અને કાર્યક્ષમતાપૂર્વક પૂર્ણ કરવામાં આવ્યું હતું.