ચોકી ગામમાં રાષ્ટ્રીય કૃમિનાશક દિવસની ઉજવણી, બાળકોને અપાઈ કૃમિનાશક ગોળીઓ
આરોગ્ય વિભાગની ટીમે શાળા અને આંગણવાડી કેન્દ્રોની મુલાકાત લઈ બાળકો તથા વાલીઓને સ્વચ્છતા અને આરોગ્ય અંગે માર્ગદર્શન આપ્યું
saurashtrabhoomi 
જૂનાગઢ, તા. 11
બાળકોને કૃમિજન્ય બીમારીઓથી બચાવવા અને તેમના સ્વાસ્થ્ય તથા પોષણની સ્થિતિમાં સુધારો લાવવાના હેતુથી રાષ્ટ્રીય કૃમિનાશક દિવસ અંતર્ગત ચોકી ગામમાં આરોગ્ય વિભાગ દ્વારા વિશેષ કામગીરી હાથ ધરવામાં આવી હતી. આ અભિયાન દરમિયાન ગામની શાળાઓ અને આંગણવાડી કેન્દ્રોમાં બાળકોને કૃમિનાશક ગોળીઓનું વિતરણ કરવામાં આવ્યું હતું.
આરોગ્ય વિભાગના MPHW, FHW અને આશા બહેનોએ શાળા તેમજ આંગણવાડી કેન્દ્રોની મુલાકાત લઈને બાળકોને જરૂરી કૃમિનાશક દવા આપી હતી. દવા આપવાની સાથે બાળકો અને તેમના વાલીઓને કૃમિ સંક્રમણથી બચવા માટે રાખવાની સાવચેતી અંગે પણ સમજ આપવામાં આવી હતી. ખાસ કરીને વ્યક્તિગત સ્વચ્છતા, હાથ ધોવાની ટેવ, સ્વચ્છ પાણીનો ઉપયોગ અને આરોગ્યપ્રદ જીવનશૈલી અંગે જરૂરી માર્ગદર્શન આપવામાં આવ્યું હતું.
કૃમિ સંક્રમણ બાળકોના આરોગ્ય અને પોષણ પર અસર કરી શકે છે, ત્યારે સમયસર કૃમિનાશક દવા અને સ્વચ્છતાની યોગ્ય કાળજી અંગે જાગૃતિ ફેલાવવી આ અભિયાનનો મહત્વનો હેતુ રહ્યો હતો. આરોગ્યકર્મીઓએ બાળકોને સ્વચ્છતા જાળવવા અને આરોગ્ય પ્રત્યે સજાગ રહેવા માટે પ્રોત્સાહિત કર્યા હતા.
આ સમગ્ર કામગીરીમાં શાળાના શિક્ષકો, આંગણવાડી કાર્યકરો અને આરોગ્ય વિભાગના કર્મચારીઓએ સંકલન સાથે કામગીરી કરી હતી. તેમના સહયોગથી બાળકો સુધી કૃમિનાશક દવા પહોંચાડવાની કામગીરી સુચારૂ રીતે પૂર્ણ કરવામાં આવી હતી.
બાળકોને સ્વસ્થ અને તંદુરસ્ત રાખવાના હેતુથી યોજાયેલા આ અભિયાનને વાલીઓ તેમજ ગ્રામજનો તરફથી પણ સારો પ્રતિસાદ મળ્યો હતો. આરોગ્ય વિભાગ દ્વારા આવા અભિયાનો મારફતે બાળકોના સ્વાસ્થ્ય અંગે જાગૃતિ વધારવા અને કૃમિજન્ય રોગોથી બચાવ માટે સતત પ્રયાસ કરવામાં આવી રહ્યા છે.
