જૂનાગઢ શહેરમાં રખડતા કુતરાઓના ત્રાસથી શહેરીજનો ત્રાહિમામ : કોર્પોરેશન પાસે કોઈ નક્કર આયોજન જ નથી

જૂનાગઢ તા.ર૮
જૂનાગઢ શહેરના મોટાભાગના વિસ્તારોમાં શેરીઓ-ગલીઓમાં અને રસ્તા ઉપર શ્વાનનાં સામાન્ય દ્રશ્ય છે રસ્તે જતા લોકોને અચાનક પાછળથી આવી અને કરડવાના બનાવો બની રહ્યા છે. અને જેની સામે કેટલીક શેરીઓમાં તો પુરતી સાવચેતી સાથે નીકળવું પડે તેવી સ્થિતિ છે અને જાે બેદરકારીથી ચાલતા જઈ રહ્યા હોય અને ત્યારે શ્વાનના આતંકનો ભોગ બને તે નક્કી નહીં તેવું ભયભીત વાતાવરણ છે. રસ્તે રખડતા શ્વાનના આતંકને નાબુદ કરવા તેમજ લોકોને વારંવાર બચકા ભરી અને ઈજાગ્રસ્ત બનાવતા શ્વાનોને પકડી લેવાની અને અન્યત્ર છોડી દેવાની કોર્પોરેશન તંત્ર દ્વારા કાર્યવાહી કરવામાં આવે તેવી માંગણી ઉઠી છે પરંતુ કોર્પોરેશન તંત્ર પાસે હાલ કુતરાને રાખવા માટેનું શેલ્ટર હોમ ન હોવાને કારણે કુતરાને તેઓ પકડી અને પુરી શકતા નથી. જાેકે, નજીકના સમયમાં જૂનાગઢ શહેરમાં કુતરાને રાખવા માટેનું શેલ્ટર હોમનું નિર્માણ કરવામાં આવશે તેવા નિર્દેશો મળી રહ્યા છે.
સૌરાષ્ટ્રના લગભગ મોટાભાગના શહેરોમાં કુતરા કરડવાના બનાવો સતત વધી રહ્યા છે. જૂનાગઢ શહેરમાં પણ ગલીએ ગલીએ રખડતા કુતરાઓનો ત્રાસ રહેલો છે અને રસ્તે જઈ રહેલા લોકો તેના હુમલાનો ભોગ પણ બની રહ્યા છે. કુતરૂ કરડે એટલે ધનુરવા અને હડકવાનો રોગ ન થાય તેના માટે નિયમ મુજબ ઈન્જેકશનો લેવા પડે તેમજ કેટલોક સમય પરેજી પણ રાખવી પડે તેવી તબીબો દ્વારા અપાયેલી સારવાર અને સુચનાનું પાલન કરવું જ પડે. દરમ્યાન જૂનાગઢ શહેરમાં મુખ્ય માર્ગોથી લઈ દરેક ચોકમાં પણ જ્યાં જુઓ ત્યાં કુતરા બેઠેલા જોવા મળતા હોય છે. કયાંક તો ૭-૮ની સંખ્યામાં કુતરાનું ટોળુ બેઠુ હોય છે અને તેવા રસ્તા પરથી પસાર થાવું એટલે ખતરો તો રહે છે કારણ કે, રસ્તે પસાર થનાર રાહદારીને એ તો ખબર નથી કે અહીં બેઠેલા આ કુતરાઓમાંથી કયુ કુતરૂ હુમલો કરશે ? પરંતુ એક બાબત ચોક્કસ છે કે, જેમ સિંહ, વાઘ, દીપડા કે અન્ય હિંસક પ્રાણીઓ હોય તે માણસનું લોહી ચાખી જાય અને વારંવાર હુમલા કરે છે ત્યારે શ્વાનમાં પણ એક લક્ષણ જાેવા મળ્યું છે કે, જે કુતરૂ એકવાર માણસને બચકા ભરે તે કુતરૂ બચકા ભરવા માટેનું હેવાયુ થઈ જાય છે અને તેને લઈને પણ આવા બનાવો સતત વધી રહ્યા છે. કુતરાના આતંક સામે પગલા કેવી રીતે ભરી શકાય તે અંગે જાેઈએ તો સામાન્ય રીતે કોર્પોરેશન તંત્ર દ્વારા જે-તે વિસ્તારમાં કુતરાનો આતંક હોય ત્યાંથી કુતરાને પકડી અને અન્યત્ર છોડી મુકવામાં આવતા હોય છે પરંતુ હાલ એ શકય નથી. તેવા નિર્દેશો મળી રહ્યા છે. બે માસ પહેલા સુપ્રિમ કોર્ટની એવી ગાઈડલાઈન હતી કે, જે શ્વાન આતંક ફેલાવતા હોય તેવા શ્વાનોને પકડી અને શેલ્ટર હોમમાં તેને રાખવા જાેઈએ. તો જૂનાગઢમાં તો હાલ કોર્પોરેશન પાસે શેલ્ટર હોમ નથી જેથી શ્વાનને રાખી શકાય તેમ નથી. ફકત ને ફકત ખસીકરણ અને રસીકરણ કરી શકાય તેમ છે. 
જૂનાગઢ કોર્પોરેશનના વેટરનરી ડોકટર રાહુલ વાણીયા એ સૌરાષ્ટ્રભૂમિ સાથેની વાતચીતમાં જણાવ્યું હતું કે, જાહેર સ્થળો જેવા કે, કચેરીઓ, દવાખાના, હોસ્પિટલો, બગીચાઓ, નરસિંહ મહેતા સરોવર કે અન્ય જાહેર સ્થળો કે, જયાં નાના બાળકો સહિત તમામ લોકોની વિશેષ અવર-જવર રહેતી હોય તેવા સ્થળ ઉપર જાે કુતરા અંગેની ફરિયાદો રહેલી હોય તો આવા શ્વાનને પકડી અને તેનું રસીકરણ અને ખસીકરણ કરવામાં આવે છે. પરંતુ હાલ કોર્પોરેશન પાસે કુતરા માટેનું શેલ્ટર હોમ નથી. જૂનાગઢ કોર્પોરેશન પાસે કુતરાને રસીકરણ અને ખસીકરણ કરવા માટેનું કેન્દ્ર રહેલું છે. અને તે ઝાંઝરડા બાયપાસ રોડ ઉપર આવેલ ત્રિનેત્ર મંદિર નજીક છે. અને ર૦ર૬ના આ વર્ષ દરમ્યાન કુતરા માટેનું એક જ શેલ્ટર હોમ નિર્માણ કરવામાં આવનાર છે. કુતરા પકડીને પુરવા માટે સૌપ્રથમ તેના રહેવા અને ખાવાપીવા સહિતની તમામ વ્યવસ્થા ઉભી કરવી પડે અને તેના માટે શેલ્ટરહોમ બનાવવું પડે. આ શેલ્ટર હોમ નિર્માણ થયા બાદ કુતરાઓને પકડી અને તેમાં આશ્રય આપી શકશે. તેમ જણાવ્યું હતું.