બે વર્ષના સંબંધ બાદ અનન્યા પાંડે અને વોકર બ્લેન્કો વચ્ચે બ્રેકઅપની ચર્ચા, બંને તરફથી મૌન
વોકીના નામનો નેકલેસ પહેરીને ફરતી અનન્યા હવે અલગ થઈ હોવાની અટકળો; અગાઉ આદિત્ય રોય કપૂર સાથે પણ સંબંધ તૂટ્યો હતો
saurashtrabhoomi 
મુંબઈ, તા.૨૭
બોલિવૂડ અભિનેત્રી અનન્યા પાંડેના અંગત જીવનને લઈને ફરી એકવાર ચર્ચાઓ શરૂ થઈ છે. છેલ્લા બે વર્ષથી વોકર બ્લેન્કો સાથે રિલેશનશિપમાં હોવાની ચર્ચા બાદ હવે બંને વચ્ચે બ્રેકઅપ થઈ ગયું હોવાના અહેવાલો સામે આવી રહ્યા છે. જોકે, અનન્યા કે વોકર બંનેમાંથી કોઈએ અત્યાર સુધી તેમના સંબંધો કે બ્રેકઅપ અંગે સત્તાવાર રીતે કંઈ જાહેર કર્યું નથી.
મળતી માહિતી પ્રમાણે, બે વર્ષ સુધી સાથે રહ્યા બાદ અનન્યાએ ગયા અઠવાડિયે આ સંબંધને પૂર્ણ કરવાનો નિર્ણય લીધો હોવાનું કહેવાય છે. બંનેએ પરસ્પર સંમતિથી અલગ થવાનું નક્કી કર્યું હોવાની પણ ચર્ચા છે. જો આ અહેવાલો સાચા હોય તો અનન્યા અને વોકરનો લાંબો સંબંધ હવે અંતિમ તબક્કે પહોંચ્યો હોવાનું માનવામાં આવી રહ્યું છે.
એક સમય એવો હતો જ્યારે બંનેની નિકટતાની ચર્ચા સોશિયલ મીડિયા અને બોલિવૂડ સર્કલમાં સતત થતી હતી. અનન્યાના જન્મદિવસના પ્રસંગે વોકરે સોશિયલ મીડિયા પર તેના માટે ખાસ સંદેશ પણ લખ્યો હતો. તેણે અનન્યાને પોતાના માટે ખૂબ જ ખાસ ગણાવીને પ્રેમ વ્યક્ત કર્યો હતો. બીજી તરફ, અનન્યા વોકરને પ્રેમથી ‘વોકી’ કહીને બોલાવતી હોવાની વાત પણ સામે આવી હતી.
અનન્યાની વોકર સાથેની નિકટતાનો એક ખાસ સંકેત ત્યારે પણ જોવા મળ્યો હતો જ્યારે અભિનેત્રી વોકરના નામના પ્રથમ અક્ષર ધરાવતો નેકલેસ પહેરીને વિવિધ સ્થળોએ જોવા મળી હતી. આ બાબતને કારણે બંને વચ્ચેના સંબંધોની ચર્ચાને વધુ વેગ મળ્યો હતો. જોકે, બંનેએ ક્યારેય પોતાના સંબંધોને લઈને જાહેરમાં વિગતવાર વાત કરી નહોતી.
અનન્યા પાંડેના અંગત જીવનમાં આ પહેલીવાર નથી બન્યું કે જ્યારે તેના સંબંધને લઈને બ્રેકઅપની ચર્ચા થઈ હોય. વોકર બ્લેન્કો સાથે સંબંધમાં આવતાં પહેલાં અનન્યા અભિનેતા આદિત્ય રોય કપૂર સાથે પણ રિલેશનશિપમાં હોવાની ચર્ચા હતી. બંનેની સાથેની તસવીરો અને જાહેર કાર્યક્રમોમાં તેમની નિકટતાએ પણ તે સમયે ઘણી ચર્ચા જગાવી હતી.
અનન્યા અને આદિત્ય વચ્ચે પણ લાંબા સમય સુધી સંબંધ રહ્યા બાદ બ્રેકઅપ થયાની વાત સામે આવી હતી. જોકે, તેમના સંબંધોના અંત પાછળનું ચોક્કસ કારણ ક્યારેય જાહેર થયું નહોતું. હવે વોકર સાથેના સંબંધોને લઈને પણ આવી જ સ્થિતિ જોવા મળી રહી છે, કારણ કે બંને તરફથી હજુ સુધી કોઈ સ્પષ્ટતા કરવામાં આવી નથી.
હાલ અનન્યા પાંડેના વોકર બ્લેન્કો સાથેના કથિત બ્રેકઅપની ચર્ચા સોશિયલ મીડિયા અને મનોરંજન જગતમાં ચાલી રહી છે. જોકે, સત્તાવાર પુષ્ટિ ન થાય ત્યાં સુધી બંનેના સંબંધો અંગેના આ અહેવાલોને માત્ર અટકળો તરીકે જ જોવામાં આવી રહ્યા છે.
)
