રક્ષાબંધનની જાહેરાતમાં કૃતિ સેનનનો લુક બન્યો ચર્ચાનો વિષય, સોશિયલ મીડિયા પર ટ્રોલિંગ
જ્વેલરી બ્રાન્ડની એડમાં એક્ટ્રેસના આઉટફિટ પર સવાલો, જ્યારે કેટલાક યુઝર્સે કર્યો બચાવ
saurashtrabhoomi 
મુંબઈ તા.24
રક્ષાબંધનના તહેવારને ધ્યાનમાં રાખીને બનાવવામાં આવેલી જ્વેલરી બ્રાન્ડની એક જાહેરાતને લઈને બોલિવૂડ એક્ટ્રેસ કૃતિ સેનન સોશિયલ મીડિયા પર ચર્ચામાં આવી છે. જાહેરાતમાં કૃતિના લુકને લઈને કેટલાક યુઝર્સે વાંધો વ્યક્ત કર્યો છે, જ્યારે બીજી તરફ કેટલાક લોકોએ અભિનેત્રીના સમર્થનમાં પણ પોતાની વાત રજૂ કરી છે.
જાહેરાતમાં કૃતિ સેનન બ્રાલેટ સ્ટાઈલના બ્લાઉઝ, કેપ અને ડ્રેપ્ડ સ્કર્ટમાં જોવા મળે છે. વીડિયો સામે આવ્યા બાદ સોશિયલ મીડિયા પર કેટલાક લોકોએ સવાલ કર્યો કે રક્ષાબંધન જેવા પરંપરાગત તહેવાર સાથે જોડાયેલી જાહેરાત માટે આ પ્રકારનો લુક કેટલો યોગ્ય છે. આ મુદ્દે અનેક કોમેન્ટ્સમાં અભિનેત્રીને ટ્રોલ પણ કરવામાં આવી છે.
જાહેરાતમાં કૃતિની સાથે એક ડોગ પણ જોવા મળે છે. વીડિયોની શરૂઆતમાં ડોગ કૃતિ તરફ ભસતો જોવા મળે છે અને ત્યારબાદ અભિનેત્રી તેને રાખડી બાંધે છે. જાહેરાતમાં પ્રાણીનો આ રીતે સમાવેશ કરાયો હોવા અંગે પણ કેટલાક સોશિયલ મીડિયા યુઝર્સે નારાજગી વ્યક્ત કરી છે. કેટલાક લોકોએ તો ડોગને રાખડી બાંધવાના દૃશ્યને ધાર્મિક ભાવનાઓ સાથે જોડીને ટીકા કરી છે.
જોકે, સોશિયલ મીડિયા પર દરેકની પ્રતિક્રિયા નકારાત્મક રહી નથી. કેટલાક યુઝર્સે કૃતિ સેનનનો બચાવ કરતાં કહ્યું કે કોઈપણ વ્યક્તિના કપડાંના આધારે તેના વિશે નિર્ણય લેવો યોગ્ય નથી. આ રીતે એક જ જાહેરાતને લઈને સોશિયલ મીડિયા પર અલગ-અલગ અભિપ્રાયો જોવા મળી રહ્યા છે.
વર્કફ્રન્ટની વાત કરીએ તો કૃતિ સેનન તાજેતરમાં ‘કોકટેલ 2’માં જોવા મળી હતી, જેમાં તેનો અલગ અને બોલ્ડ અંદાજ ચર્ચામાં રહ્યો હતો. આગામી પ્રોજેક્ટ્સને લઈને પણ અભિનેત્રીનું નામ ચર્ચામાં છે.
બીજી તરફ, કૃતિ સેનન પોતાની પર્સનલ લાઈફને કારણે પણ અવારનવાર ચર્ચામાં રહે છે. અભિનેત્રીનું નામ કબીર બહિયા સાથે જોડાયું છે અને બંનેને અગાઉ અનેક પ્રસંગોએ સાથે જોવા મળ્યાના અહેવાલો સામે આવ્યા છે. જોકે, બંને તરફથી તેમના સંબંધોને લઈને કોઈ સત્તાવાર પુષ્ટિ કરવામાં આવી નથી.
