‘રામાયણ’ના સંગીત પર એ.આર. રહેમાને તોડ્યું મૌન, ટીકા બાદ માફી માંગનારાઓને આપ્યો કટાક્ષભર્યો જવાબ

મુંબઈ, તા. 27
દિગ્દર્શક નિતેશ તિવારીની બહુચર્ચિત ફિલ્મ ‘રામાયણ’ના સંગીતને લઈને ચાલી રહેલી ચર્ચા વચ્ચે ઓસ્કાર વિજેતા સંગીતકાર એ.આર. રહેમાને પોતાનું મૌન તોડ્યું છે. ફિલ્મ માટે રહેમાન અને હોલીવુડના જાણીતા સંગીતકાર હંસ ઝિમરને સાથે લાવવામાં આવ્યા છે. ફિલ્મના ટાઇટલની જાહેરાત સાથે રજૂ કરવામાં આવેલા સંગીતના પ્રથમ અંશને દર્શકોએ પસંદ કર્યો હતો. જોકે, ત્યારબાદ રિલીઝ થયેલાં ગીતોને સોશિયલ મીડિયા પર શરૂઆતમાં ટીકા અને પછી પ્રશંસા સાથે મિશ્ર પ્રતિસાદ મળ્યો હતો.
આ સમગ્ર વિવાદ અને ચર્ચા વચ્ચે રહેમાને ફિલ્મના સંગીત સર્જન, હંસ ઝિમર સાથેના સહયોગ અને દર્શકોના પ્રતિસાદ અંગે પોતાનો દૃષ્ટિકોણ રજૂ કર્યો છે. ગીતોની ટીકા કર્યા બાદ કેટલાક લોકોએ માફી માગી હોવાના અહેવાલ વચ્ચે રહેમાનની પ્રતિક્રિયા પણ ચર્ચામાં આવી છે.
રહેમાને જણાવ્યું કે પોતાની કારકિર્દીનાં ત્રણ દાયકા બાદ ‘રામાયણ’ જેવી મહાકાવ્યાત્મક કથા માટે સંગીત તૈયાર કરવાની જવાબદારી મળી છે. તેમના મતે, કલાકારે પોતાની જૂની સફળતાઓને વળગી રહેવાને બદલે સતત કંઈક નવું સર્જતા રહેવું જોઈએ.
પોતાની સર્જનયાત્રા વિશે વાત કરતાં રહેમાને ‘રોકસ્ટાર’ અને ‘સ્લમડોગ મિલિયોનેર’ જેવી ફિલ્મોની સફળતાને યાદ કરી હતી. તેમણે કહ્યું કે કલાકાર એક જ પ્રકારના સંગીતમાં અટકી ન શકે. તેમણે પોતાની સર્જનપ્રક્રિયાની સરખામણી વહેતી નદી સાથે કરતાં સતત બદલાતા રહેવાની જરૂરિયાત પર ભાર મૂક્યો હતો.
રહેમાને વધુમાં જણાવ્યું કે ‘રામાયણ’ માત્ર એક ફિલ્મ નથી, પરંતુ ભારતના લોકો સાથે ઊંડાણપૂર્વક જોડાયેલી મહાકથા છે. ફિલ્મનાં ગીતો પાંચ અલગ-અલગ ભાષાઓમાં તૈયાર કરવામાં આવ્યાં છે. આટલી જાણીતી કથા માટે સંગીત તૈયાર કરવું તેમના માટે મોટું સન્માન હોવાની સાથે મોટી જવાબદારી પણ છે.
હંસ ઝિમર સાથે કામ કરવા અંગે રહેમાને એક રસપ્રદ વાત પણ જણાવી હતી. સામાન્ય રીતે તેઓ એકલા સંગીત સર્જવાનું પસંદ કરે છે અને અન્ય સંગીતકાર સાથે સહયોગ કરવાનું ટાળે છે. જોકે, ‘રામાયણ’ માટે તેમણે આ વલણમાં ફેરફાર કર્યો છે.
આ સહયોગ અંગે રહેમાને કહ્યું કે હંસ ઝિમરનું પ્રોજેક્ટ સાથે જોડાવું આશીર્વાદ સમાન છે, કારણ કે તેમના આવવાથી ફિલ્મ પ્રત્યેનો વૈશ્વિક દૃષ્ટિકોણ બદલાઈ શકે છે. આંતરરાષ્ટ્રીય સ્તરે હંસ ઝિમરનું નામ દર્શકોનું ધ્યાન ખેંચી શકે છે અને વિદેશી દર્શકોને પણ ફિલ્મ જોવા માટે પ્રેરિત કરી શકે છે. રહેમાને નિર્માતાઓના આ નિર્ણયને શાનદાર પગલું ગણાવ્યું હતું.
આ સાથે રહેમાને ભૂતકાળનો એક કિસ્સો પણ શેર કર્યો હતો. ‘સ્લમડોગ મિલિયોનેર’ બાદ ઓસ્કાર જીત્યા પછી તેમને લગભગ 14થી 15 વર્ષ પહેલાં હંસ ઝિમર સાથે કામ કરવાની ઓફર મળી હતી. જોકે, તે સમયે તેઓ આરામ કરવાના મૂડમાં હોવાથી તેમણે આ તક જતી કરી હતી. હવે ‘રામાયણ’ના માધ્યમથી બંને દિગ્ગજ સંગીતકારો સાથે કામ કરી રહ્યા છે.
‘રામાયણ’ના સંગીતને લઈને સોશિયલ મીડિયા પર થઈ રહેલી ચર્ચા વચ્ચે રહેમાનના આ નિવેદનથી ફિલ્મના સંગીત અને તેના આંતરરાષ્ટ્રીય સહયોગ અંગે ફરી ચર્ચા શરૂ થઈ છે. હવે ફિલ્મનાં ગીતો અને સંગીતને દર્શકો તરફથી કેવો પ્રતિસાદ મળે છે, તેના પર સૌની નજર રહેશે.