કરણ જોહરની નવી વેબ સિરીઝની કમાન રૂચિર અરુણને, OTT પ્રોજેક્ટ પર કામ શરૂ
‘મુસાફિર કાફે’ બાદ દિગ્દર્શકને મળ્યું મોટું કામ; સિરીઝની વાર્તા અને કલાકારો અંગે વિગતો હજુ ગુપ્ત
saurashtrabhoomi 
મુંબઈ, તા. 17:
બોલિવૂડના જાણીતા ફિલ્મમેકર કરણ જોહર હવે એક નવી વેબ સિરીઝ સાથે OTT પર દર્શકોનું મનોરંજન કરવાની તૈયારીમાં છે. આ પ્રોજેક્ટના દિગ્દર્શન માટે કરણ જોહરે રૂચિર અરુણની પસંદગી કરી હોવાનું સામે આવ્યું છે. રૂચિર અરુણ તાજેતરમાં ‘મુસાફિર કાફે’ સાથે ચર્ચામાં આવ્યા છે.
રુચિર અરુણ અગાઉ ‘લિટલ થિંગ્સ’ અને ‘ઘર વાપસી’ જેવા પ્રોજેક્ટ્સ સાથે જોડાયેલા રહ્યા છે. પાત્રોને કેન્દ્રમાં રાખીને લાગણીસભર અને આત્મીય વાર્તાઓ રજૂ કરવાની તેમની શૈલીને દર્શકો તરફથી ઓળખ મળી છે. હવે કરણ જોહરના આગામી OTT પ્રોજેક્ટ સાથે જોડાતા તેમના કરિયરમાં વધુ એક મહત્વપૂર્ણ તક ઉમેરાઈ છે.
હાલમાં નવી વેબ સિરીઝની વાર્તા કયા વિષય પર આધારિત હશે તે અંગે કોઈ સત્તાવાર માહિતી સામે આવી નથી. ફિલ્મની કાસ્ટ અને જોનર અંગે પણ વિગતો જાહેર કરવામાં આવી નથી. આ ઉપરાંત કરણ જોહર આ સિરીઝને કયા OTT પ્લેટફોર્મ પર રિલીઝ કરશે તે પણ હજુ સ્પષ્ટ કરવામાં આવ્યું નથી.
રૂચિર અરુણની તાજેતરની સિરીઝ ‘મુસાફિર કાફે’ એક રોમેન્ટિક ડ્રામા છે, જેનું લેખન શરણ્યા રાજગોપાલે કર્યું છે. સિરીઝની વાર્તાને લઈને દર્શકોની પ્રતિક્રિયા મિશ્ર રહી હતી. જોકે, લાગણીસભર કથાનક અને પાત્રો વચ્ચેના સંબંધોને પસંદ કરનારા દર્શકોને આ પ્રોજેક્ટ પસંદ આવ્યો હતો.
માનવામાં આવે છે કે પાત્રોની લાગણીઓ અને સંબંધોને અસરકારક રીતે રજૂ કરવાની રૂચિર અરુણની ક્ષમતાથી કરણ જોહર પ્રભાવિત થયા છે. આ જ કારણસર તેમને નવા વેબ સિરીઝ પ્રોજેક્ટની જવાબદારી સોંપવામાં આવી હોવાનું ચર્ચાઈ રહ્યું છે.
હવે આ નવી સિરીઝની સત્તાવાર જાહેરાત ક્યારે થાય છે, તેમાં કયા કલાકારો જોવા મળશે અને તેને કયા OTT પ્લેટફોર્મ પર રજૂ કરવામાં આવશે તેના પર દર્શકોની નજર રહેશે. કરણ જોહર અને રૂચિર અરુણનું આ જોડાણ OTT પર કેવું પરિણામ આપે છે તે જોવું રસપ્રદ રહેશે.
