પાકિસ્તાને અફઘાનિસ્તાનમાં 10 ઠેકાણાઓ પર કર્યા હવાઈ-ડ્રોન હુમલા, સરહદે ફરી વધ્યો તણાવ

ઇસ્લામાબાદ તા.24
પાકિસ્તાન અને અફઘાનિસ્તાન વચ્ચે ચાલી રહેલો તણાવ વધુ ગંભીર બન્યો છે. પાકિસ્તાને ગુરુવારે અફઘાનિસ્તાનની અંદર 10 સ્થળોને નિશાન બનાવી હવાઈ અને ડ્રોન હુમલા કર્યા હોવાનું જાહેર કર્યું છે. પાકિસ્તાનના માહિતી મંત્રી અતાઉલ્લાહ તરાડના જણાવ્યા મુજબ આ કાર્યવાહી એક દિવસ અગાઉ અફઘાનિસ્તાન તરફથી પાકિસ્તાની હવાઈ ક્ષેત્રમાં ડ્રોન મોકલવામાં આવ્યા હોવાના દાવાના જવાબમાં કરવામાં આવી હતી.
તરાડે જણાવ્યું હતું કે પાકિસ્તાને જે 10 સ્થળોને નિશાન બનાવ્યા તેનો ઉપયોગ ડ્રોન લોન્ચ કરવા અને તેને સંગ્રહિત કરવા માટે થતો હોવાનો પાકિસ્તાનનો દાવો છે. તેમણે આ હુમલાઓને ચોક્કસ લક્ષ્યો સુધી મર્યાદિત કાર્યવાહી ગણાવી હતી. પાકિસ્તાનના જણાવ્યા પ્રમાણે 23 સપ્ટેમ્બરે તેના હવાઈ ક્ષેત્રમાં પ્રવેશેલા ડ્રોનને એર ડિફેન્સ સિસ્ટમે શોધીને તોડી પાડ્યા હતા.
પાકિસ્તાની સુરક્ષા સૂત્રોએ બુધવારે દાવો કર્યો હતો કે અફઘાનિસ્તાન તરફથી આવેલા કુલ 8 ડ્રોન તોડી પાડવામાં આવ્યા હતા. જેમાં ચાર ડ્રોન તોરખમ સરહદ નજીક જ્યારે અન્ય ચાર કોહાટ સરહદ નજીકના પહાડી વિસ્તારમાં તોડી પાડવામાં આવ્યા હોવાનું જણાવાયું હતું. પાકિસ્તાની પક્ષના જણાવ્યા પ્રમાણે આ ઘટનામાં કોઈ નિર્ધારિત લક્ષ્યને નુકસાન પહોંચ્યું નહોતું.
જોકે અફઘાન તાલિબાન તરફથી પાકિસ્તાનના આક્ષેપોને નકારવામાં આવ્યા હતા. બીજી તરફ 24 સપ્ટેમ્બરના પાકિસ્તાની હુમલા બાદ તાલિબાન સરકારના પ્રવક્તા ઝબીહુલ્લાહ મુજાહિદે જણાવ્યું કે પાકિસ્તાની હુમલામાં ઓછામાં ઓછા ચાર લોકોનાં મોત થયા છે અને અફઘાનિસ્તાન આ કાર્યવાહીનો યોગ્ય જવાબ આપશે. આમ, પ્રારંભિક અહેવાલથી વિપરીત અફઘાન પક્ષ તરફથી હવે સત્તાવાર પ્રતિક્રિયા પણ સામે આવી છે.
બંને દેશો વચ્ચે તણાવ માત્ર ડ્રોન હુમલાના દાવા પૂરતો સીમિત નથી. પાકિસ્તાની સુરક્ષા સૂત્રોના જણાવ્યા પ્રમાણે અફઘાનિસ્તાનના નંગરહાર અને પક્તિયા તરફથી પાકિસ્તાનમાં ઘૂસણખોરીનો પ્રયાસ કરવામાં આવ્યો હતો. પાકિસ્તાન TTP સાથે જોડાયેલા આતંકીઓ માટે ‘ફિતના-ઉલ-ખવારિજ’ શબ્દનો ઉપયોગ કરે છે. પાકિસ્તાની દાવા મુજબ સુરક્ષા દળોએ ઘૂસણખોરીનો પ્રયાસ નિષ્ફળ બનાવ્યા બાદ અફઘાન તાલિબાન દળોએ પાકિસ્તાની સરહદી ચોકીઓ પર મોર્ટાર અને ભારે હથિયારોથી ગોળીબાર કર્યો હતો. જવાબમાં પાકિસ્તાની દળોએ સરહદ પારની ચોકીઓ અને મોર્ટાર પોઝિશનને નિશાન બનાવી હતી. આ દાવાઓ અંગે બંને પક્ષોના વર્ણનમાં મતભેદ છે.
તાજેતરના દિવસોમાં પાકિસ્તાન-અફઘાનિસ્તાન સરહદ પર સ્થિતિ સતત તણાવપૂર્ણ બની છે. 21 સપ્ટેમ્બરે પણ પાકિસ્તાને અફઘાનિસ્તાનમાં કથિત આતંકી ઠેકાણાઓને નિશાન બનાવી હવાઈ હુમલા કર્યા હતા. પાકિસ્તાને તેમાં 28 આતંકીઓ માર્યા ગયાનો દાવો કર્યો હતો, જ્યારે અફઘાન અધિકારીઓ અને સંયુક્ત રાષ્ટ્ર તરફથી ત્રણ નાગરિકોનાં મોતની માહિતી આપવામાં આવી હતી.
પાકિસ્તાન લાંબા સમયથી અફઘાનિસ્તાનની જમીન પરથી TTP અને અન્ય સશસ્ત્ર જૂથો હુમલા કરતા હોવાનો આક્ષેપ કરતું આવ્યું છે, જ્યારે કાબુલની તાલિબાન સરકાર આવા આક્ષેપોને નકારતી રહી છે. હવે ડ્રોન, સરહદી ગોળીબાર અને અફઘાનિસ્તાનની અંદર પાકિસ્તાનના તાજેતરના હવાઈ હુમલાઓને કારણે બંને પડોશી દેશો વચ્ચેનો તણાવ વધુ વધ્યો છે.