સોમનાથ તીર્થ આજે જયાપાર્વતી વ્રતમય બન્યું, શિવાલયોમાં ભક્તોની ભારે ભીડ
યુવતીઓ અને મહિલાઓએ શિવ-પાર્વતીની આરાધના કરી, પરિવારની સુખાકારી અને પતિના દીર્ઘ આયુષ્ય માટે કરી પ્રાર્થના
saurashtrabhoomi 
સોમનાથ, તા. 27
પવિત્ર શ્રાવણ માસ દરમિયાન આજે સોમનાથ તીર્થ જયાપાર્વતી વ્રતની ભક્તિ અને આસ્થાથી છલકાઈ ઊઠ્યું. વહેલી સવારથી યુવતીઓ અને મહિલાઓ સ્વચ્છ વસ્ત્રો પરિધાન કરી પૂજાની થાળ અને જવારા સાથે સોમનાથ સહિત વિવિધ શિવાલયોમાં ભગવાન શિવ અને માતા પાર્વતીની આરાધના કરવા ઉમટી પડી હતી.
જયાપાર્વતી વ્રત દરમિયાન ભક્તોએ દહીં, દૂધ, મધ, પુષ્પ, ફળ, અબીલ-ગુલાલ સહિતની પૂજા સામગ્રી વડે વિધિવત પૂજા-અર્ચના કરી હતી. પંડિતોના વેદમંત્રોના મંગળોચ્ચાર વચ્ચે પરિવારના સુખ-સમૃદ્ધિ, કલ્યાણ અને પતિના દીર્ઘ આયુષ્ય માટે પ્રાર્થનાઓ કરવામાં આવી હતી.
આ વ્રતમાં ઉપયોગમાં લેવાતા પાંચ ધાન્યમાંથી તૈયાર થતા જવારા ભક્તોએ ઘરે ઉગાડેલા તેમજ બજારમાં ઉપલબ્ધ જવારાનો ઉપયોગ કરીને પૂજામાં અર્પણ કર્યા હતા. પરંપરા મુજબ યુવતીઓ પાંચ દિવસ સુધી મોળાકત વ્રત અને જાગરણ કરીને વ્રતનું સમાપન કરે છે.
અપરિણીત યુવતીઓ સારા જીવનસાથી, ઉજ્જવળ ભવિષ્ય અને મનોકામના પૂર્ણ થવાની ભાવના સાથે જયાપાર્વતી વ્રત કરે છે, જ્યારે પરિણીત મહિલાઓ પોતાના પરિવારના કલ્યાણ અને પતિના લાંબા આયુષ્ય માટે આ પવિત્ર વ્રતનું પાલન કરે છે.
આજે સોમનાથના શિવાલયોમાં ભક્તિ, શ્રદ્ધા અને આધ્યાત્મિકતાનો અનોખો માહોલ જોવા મળ્યો હતો, જ્યાં મોટી સંખ્યામાં ભક્તોએ દર્શન અને પૂજનનો લાભ લીધો.
