KBC-18નું હોસ્ટિંગ અમિતાભ બચ્ચન માટે બન્યું ‘હાર્ટ-બ્રેકિંગ’, સ્પર્ધકોની કહાનીઓ સાંભળી થયા ભાવુક
સ્પર્ધકોના જીવનના સંઘર્ષ અને મુશ્કેલ અનુભવોની અમિતાભે બ્લોગમાં કરી વાત; ‘સોચના પડેગા’ થીમ સાથે ચાલી રહી છે નવી સિઝન
saurashtrabhoomi 
મુંબઈ, તા.૧૨
અમિતાભ બચ્ચન ફરી એક વખત લોકપ્રિય ક્વિઝ શો ‘કૌન બનેગા કરોડપતિ’ની ૧૮મી સિઝનનું સંચાલન કરી રહ્યા છે. વર્ષોથી KBCના મંચ પર સ્પર્ધકો સાથે સવાલ-જવાબની સાથે હળવી અને લાગણીસભર વાતચીત કરતા જોવા મળતા અમિતાભ માટે આ સિઝનના કેટલાક અનુભવો અત્યંત ભાવુક બની રહ્યા છે.
KBCના હોટ સીટ પર પહોંચતા સ્પર્ધકો માત્ર પોતાના જ્ઞાનની પરીક્ષા જ નથી આપતા, પરંતુ અમિતાભ બચ્ચન સાથે પોતાના જીવનની અનેક અંગત વાતો પણ શેર કરે છે. કેટલાક સ્પર્ધકો પોતાની આર્થિક મુશ્કેલીઓ, પરિવારના સંઘર્ષ અને જીવનમાં આવેલા પડકારો અંગે વાત કરે છે. આવી કહાનીઓ સાંભળીને અમિતાભ પણ ઘણી વખત ભાવુક થઈ જાય છે.
અમિતાભ બચ્ચને પોતાના તાજેતરના બ્લોગમાં KBCના મંચ પર થઈ રહેલા આવા અનુભવોનો ઉલ્લેખ કર્યો છે. તેમણે લખ્યું છે કે કેટલાક સ્પર્ધકો એટલી ગંભીર અને લાગણીસભર વ્યક્તિગત કહાનીઓ લઈને આવે છે કે તેમની લાગણીઓને સંભાળવાની સાથે શોનું સંચાલન કરવું પણ મુશ્કેલ બની જાય છે. તેમણે આ અનુભવને ‘હાર્ટ-બ્રેકિંગ’ ગણાવ્યો છે.
‘કૌન બનેગા કરોડપતિ ૧૮’ની થીમ આ વખતે ‘સોચના પડેગા’ રાખવામાં આવી છે. આ થીમ દ્વારા એવો સંદેશ આપવામાં આવી રહ્યો છે કે આજના સમયમાં માહિતી સરળતાથી ઉપલબ્ધ છે, પરંતુ માત્ર સાચો જવાબ જાણવો પૂરતો નથી. કોઈ જવાબ કે નિર્ણય સુધી પહોંચતા પહેલાં યોગ્ય રીતે વિચારવું પણ એટલું જ જરૂરી છે.
અમિતાભ બચ્ચન લાંબા સમયથી KBC સાથે જોડાયેલા છે અને સ્પર્ધકો સાથેનો તેમનો સંવાદ શોની મહત્વપૂર્ણ ઓળખ બની ચૂક્યો છે. આ વખતે પણ જ્ઞાન અને રમતની સાથે સ્પર્ધકોની વ્યક્તિગત જીવનકથાઓ શોમાં ભાવનાત્મક પાસું ઉમેરી રહી છે.
‘કૌન બનેગા કરોડપતિ’ની ૧૮મી સિઝન ૧૦ ઓગસ્ટથી શરૂ થઈ છે અને સોમવારથી શુક્રવાર રાત્રે ૯ વાગ્યે સોની ટીવી તેમજ સોની લિવ પર પ્રસારિત થઈ રહી છે.
){kind=small}