જૂનાગઢમાં ૩૦૦ મહિલાઓની આંખોની તપાસ : નિ:શુલ્ક ચશ્માનું વિતરણ
saurashtrabhoomi 
જૂનાગઢ તા.૭
જૂનાગઢ શહેરના આઝાદ ચોક ખાતે આવેલ ઈન્ડિયન રેડક્રોસ સોસાયટી, જૂનાગઢ ખાતે આજે સેવાકીય પ્રવૃત્તિ અંતર્ગત જૂનાગઢ લાઈફ પ્રોજેક્ટ મહિલા મંડળની બહેનો માટે નિ:શુલ્ક આંખ તપાસ તથા ચશ્મા વિતરણ કાર્યક્રમનું આયોજન કરવામાં આવ્યું હતું. આ સેવાકીય કાર્યક્રમમાં ઈન્ડિયન રેડક્રોસ સોસાયટી, જૂનાગઢ તથા ભાવનગર ઈન્ડિયન રેડક્રોસ સોસાયટીના સહયોગથી આશરે ૩૦૦ જેટલી મહિલાઓની આંખોના નંબરનું નિદાન કરવામાં આવ્યું હતું. કાર્યક્રમ દરમ્યાન ઉપસ્થિત મહિલાઓની આંખોની નિષ્ણાત તબીબો દ્વારા તપાસ કરવામાં આવી હતી અને આંખોની દ્રષ્ટિ સંબંધિત જરૂરી તપાસ બાદ જે મહિલાઓને ચશ્માની જરૂરિયાત જણાઈ હતી તેમને નિ:શુલ્ક ચશ્માનું વિતરણ કરવામાં આવ્યું હતું. આ પ્રકારના સેવાકીય આયોજનથી આર્થિક રીતે જરૂરિયાતમંદ મહિલાઓને આંખોની તપાસ અને ચશ્માની સુવિધા મળી રહે તેવો મહત્વપૂર્ણ પ્રયાસ કરવામાં આવ્યો હતો. જૂનાગઢ લાઈફ પ્રોજેક્ટ મહિલા મંડળની આશરે ૩૦૦ બહેનોને એક જ સ્થળે આંખોની તપાસની સુવિધા મળી રહે તે માટે આયોજનબદ્ધ રીતે સમગ્ર કાર્યક્રમ યોજાયો હતો. આંખોની નિયમિત તપાસ કરાવવી અને દ્રષ્ટિમાં કોઈ તકલીફ જણાય તો સમયસર નિદાન કરાવવું જરૂરી છે, ત્યારે આ કાર્યક્રમ મહિલાઓ માટે ઉપયોગી અને સેવાભાવી પહેલ સાબિત થયો હતો. ઈન્ડિયન રેડક્રોસ સોસાયટી, જૂનાગઢ તથા ભાવનગર ઈન્ડિયન રેડક્રોસ સોસાયટી દ્વારા કરવામાં આવેલી આ સેવાકીય કામગીરીને ઉપસ્થિત મહિલાઓ દ્વારા આવકારવામાં આવી હતી. સમાજના જરૂરિયાતમંદ વર્ગ સુધી આરોગ્યલક્ષી સેવાઓ પહોંચાડવાના હેતુથી યોજાયેલા આ કાર્યક્રમથી મોટી સંખ્યામાં મહિલાઓને સીધો લાભ મળ્યો હતો. આ સમગ્ર આયોજન દરમ્યાન આંખોની તપાસ, નંબરનું નિદાન તથા જરૂરિયાત મુજબ નિ:શુલ્ક ચશ્મા વિતરણ કરવામાં આવતા મહિલાઓમાં પણ આનંદ જાેવા મળ્યો હતો. સેવાભાવી સંસ્થાઓ દ્વારા કરવામાં આવતી આવી આરોગ્યલક્ષી પ્રવૃત્તિઓ સમાજમાં માનવસેવા અને જનસેવાનો ઉત્તમ સંદેશ આપે છે.
