વરસાદમાં દીકરીઓના ચહેરા પર ખુશીનું મેઘધનુષ્ય..
ચૈતન્ય ચેરીટેબલ ટ્રસ્ટ દ્વારા ૨૦૦ દીકરીઓને નિ:શુલ્ક રેઈનકોટ વિતરણ
saurashtrabhoomi 
જામનગર, તા. ૭
"એક નાનો રેઈનકોટ માત્ર વરસાદથી બચાવતો નથી, પરંતુ એક બાળકના ચહેરા પર સુરક્ષા, આત્મવિશ્વાસ અને ખુશીનું સ્મિત પણ લાવે છે."
આ ભાવનાને સાકાર કરતાં ચૈતન્ય ચેરીટેબલ ટ્રસ્ટ, જામનગર દ્વારા બુધવાર, તા.૫ ઓગસ્ટ ૨૦૨૬ના રોજ સાંજે ૪:૩૦ વાગ્યે રાજીવનગર સ્થિત ટ્રસ્ટના શૈક્ષણિક સંકુલ ખાતે નિ:શુલ્ક રેઈનકોટ વિતરણ કાર્યક્રમનું સફળ આયોજન કરવામાં આવ્યું હતું.
આ કાર્યક્રમ અંતર્ગત રાજીવનગર વિસ્તારની ૨૦૦ દીકરીઓને તદ્દન નવા રેઈનકોટનું નિ:શુલ્ક વિતરણ કરવામાં આવ્યું હતું. અગાઉ યોજાયેલા પ્રથમ તબક્કામાં ૫૦ બાળકોને રેઈનકોટ આપવામાં આવ્યા હતા. આમ અત્યાર સુધી કુલ ૨૫૦ બાળકો સુધી આ સેવાયજ્ઞનો લાભ પહોંચ્યો છે.
જ્યારે નાનકડી દીકરીઓએ નવા રેઈનકોટ પોતાના હાથમાં લીધા ત્યારે તેમના ચહેરા પર છલકાતો આનંદ, ઉત્સાહ અને નિર્દોષ સ્મિત સમગ્ર કાર્યક્રમનું સૌથી સુંદર દૃશ્ય બની રહ્યું હતું. દરેક બાળકના ચહેરા પર ખુશીના રંગો ઝળકી રહ્યા હતા અને વરસાદી ઋતુ હવે તેમના માટે ચિંતા નહીં પરંતુ આનંદનો પ્રસંગ બની ગઈ હતી.
કાર્યક્રમના મુખ્ય અતિથિ તરીકે જામનગર મહાનગરપાલિકાના વોર્ડ નં. ૭ના કોર્પોરેટર સંજયભાઈ ચેતરીયા, જ્યોત્સનાબેન પાભર અને શીતલબેન વાઘેલા ઉપસ્થિત રહ્યા હતા. મહાનુભાવોએ પોતાના હસ્તે દીકરીઓને રેઈનકોટનું વિતરણ કરીને તેમને શિક્ષણમાં સતત આગળ વધવા અને જીવનમાં ઉચ્ચ સિદ્ધિઓ પ્રાપ્ત કરવા માટે પ્રેરણા આપી હતી.
આ પ્રસંગે સંબોધન કરતાં સંજયભાઈ ચેતરીયાએ ચૈતન્ય ચેરીટેબલ ટ્રસ્ટ દ્વારા છેલ્લા ૩૦ વર્ષથી સતત ચાલી રહેલી સેવાકીય, શૈક્ષણિક અને સમાજઉપયોગી પ્રવૃત્તિઓની પ્રશંસા કરી હતી અને ટ્રસ્ટના સ્થાપક હિતેશ પંડ્યા અને કાજલ પંડ્યાને અભિનંદન પાઠવ્યા હતા. કાર્યક્રમની એક વિશેષતા એ રહી કે ટ્રસ્ટ દ્વારા મહેમાનોનું સ્વાગત પરંપરાગત પુષ્પગુચ્છના બદલે પુસ્તક ભેટ આપી કરવામાં આવ્યું. ટ્રસ્ટ વર્ષોથી "બુકે નહીં, બુક" અભિયાન અંતર્ગત સમાજમાં વાંચન સંસ્કૃતિનો પ્રચાર-પ્રસાર કરી રહ્યું છે. "પુસ્તક આપણો સાચો અને જીવનભરનો મિત્ર છે" તેવા સુંદર સંદેશ સાથે તમામ મહેમાનોનું અનોખી રીતે સન્માન કરવામાં આવ્યું હતું. કાર્યક્રમની રૂપરેખા અને શાબ્દિક સ્વાગત હિતેશભાઈ પંડ્યા દ્વારા કરવામાં આવ્યું હતું. કાર્યક્રમના અંતે જ્યોતિ ફફલ દ્વારા આભારવિધિ વ્યક્ત કરવામાં આવી હતી.
ચૈતન્ય ચેરીટેબલ ટ્રસ્ટ છેલ્લા ત્રણ દાયકાથી શિક્ષણ, મહિલા સશક્તિકરણ, બાળ વિકાસ, પર્યાવરણ સંરક્ષણ, રોજગાર માર્ગદર્શન અને વિવિધ માનવસેવાના કાર્યો દ્વારા સમાજમાં સકારાત્મક પરિવર્તન લાવવા માટે સતત કાર્યરત છે. ટ્રસ્ટનો વિશ્વાસ છે કે "જ્યારે સમાજનો એક બાળક સુરક્ષિત, શિક્ષિત અને આત્મવિશ્વાસી બને છે, ત્યારે સમગ્ર સમાજનું ભવિષ્ય ઉજ્જવળ બને છે."
આવા સેવાયજ્ઞમાં સહભાગી બની સમાજના જરૂરિયાતમંદ બાળકોના જીવનમાં ખુશી લાવવા ઇચ્છતા દાતાશ્રીઓ અને સજ્જનો વધુ માહિતી માટે હિતેશ પંડ્યાનો સંપર્ક કરી શકે છે.
