ટ્રમ્પે ફરી એકવાર ભારત-પાક. યુધ્ધ અટકાવવાનો અને ૩ કરોડ લોકોના જીવ બચાવવાનો દાવો કર્યો
saurashtrabhoomi 
યુનાઇટેડ નેશન્સ : તા.૨૩:
મંગળવારે યુનાઇટેડ નેશન્સ જનરલ એસેમ્બલીના ૮૧મા સત્રને ટ્રમ્પે સંબોધિત કર્યું હતું. તેમના સંબોધન દરમિયાન ટ્રમ્પે દાવો કર્યો કે તેમણે મે ૨૦૨૫ માં ભારત અને પાકિસ્તાન વચ્ચે યુદ્ધ વધતું અટકાવ્યું હતું. રાષ્ટ્રપતિ ટ્રમ્પે કહ્યું કે તેમણે તેમના બીજા કાર્યકાળ દરમિયાન આઠ યુદ્ધોનો અંત લાવવામાં મદદ કરી છે, જેમાં મે ૨૦૨૫ માં ભારત અને પાકિસ્તાન વચ્ચે લશ્કરી તણાવનો પણ સમાવેશ થાય છે. તેમણે પાકિસ્તાનના વડા પ્રધાન શાહબાઝ શરીફને એક અદ્ભુત વ્યક્તિ ગણાવ્યા અને કહ્યું કે શાહબાઝ યુદ્ધ અટકાવવા અને ૩૦ મિલિયન લોકોનો જીવ બચાવવા બદલ તેમનો આભાર માન્યો.
ટ્રમ્પના જણાવ્યા મુજબ, જે દેશો વચ્ચે તેમણે સંઘર્ષો અટકાવવામાં મદદ કરી હતી તેમના નેતાઓએ તેમને કૃતજ્ઞતા વ્યક્ત કરતા પત્ર લખ્યો છે. ટ્રમ્પે કહ્યું, ‘‘પાકિસ્તાનના વડા પ્રધાને કહ્યું કે ડોનાલ્ડ ટ્રમ્પ ૩ કરોડ લોકોના જીવ બચાવવા માટે જવાબદાર છે, અને કદાચ તેનાથી પણ વધુ.‘‘ટ્રમ્પે અગાઉ મે ૨૦૨૫માં ભારત અને પાકિસ્તાન વચ્ચે થયેલા યુદ્ધવિરામને તેમની મધ્યસ્થી તરીકે જવાબદાર ગણાવી હતી. પહેલગામ આતંકવાદી હુમલામાં ૨૬ નાગરિકોના મોત થયા બાદ, ભારતે પાકિસ્તાન સામે ઓપરેશન સિદૂર શરૂ કર્યું. ત્યારબાદ ઘણા દિવસો સુધી લશ્કરી તણાવ વધ્યો. ટ્રમ્પનો દાવો છે કે તેમણે આ સમય દરમિયાન બંને દેશો વચ્ચે યુદ્ધ અટકાવવામાં ભૂમિકા ભજવી હતી.
